ଲୋକଙ୍କ ଜୀବନ ସହ ଖେଳ : ପାଚିଲା କଦଳୀରେ ବିଷାକ୍ତ ରସାୟନ !
କନକ ବ୍ୟୁରୋ : ଲୋକଙ୍କ ଜୀବନ ସହ ସାଙ୍ଘାତିକ ଖେଳ । କିଛି ମୁନାଫାଖୋର୍ ବ୍ୟବସାୟୀ ଅଧିକ ଲାଭ ଆଶାରେ ମଣିଷ ଜୀବନକୁ ବିଷାକ୍ତ କରି ପକାଉଛନ୍ତି । ବ୍ୟସ୍ତବହୁଳ ଜୀବନ ଭିତରେ କେହି ବି କିଛି ଯାଞ୍ଚ କରିବାକୁ ସମୟ ପାଉ ନାହାନ୍ତି । ଯେଉଁଠି ଯାହା ମିଳିଲା, କିଣି ନେଉଛନ୍ତି । ଉପରକୁ ତଟକା ଓ ତାଜା ଦେଖାଯାଉଥିବା ଖାଦ୍ୟ ପଦାର୍ଥ ପ୍ରକୃତରେ ଯେ କେତେ ମାରାତ୍ମକ, ତାହା ସାଧାରଣ ଲୋକଙ୍କ କଳ୍ପନା ବାହାରେ । ଆମେ ପ୍ରତିଦିନ ଖାଉଥିବା ପନିପରିବାଠାରୁ ଆରମ୍ଭ କରି ଚାଉଳ, ଡାଲି, ତେଲ, ମିଠା, ଥଣ୍ଡା ପାନୀୟ, ଫଳ ଆଦି ଖାଦ୍ୟ ସାମଗ୍ରୀରେ କିଛି ନା କିଛି ରାସାୟନିକ ଉପାଦାନ ରହିଛି । ମାତ୍ର ଏଗୁଡ଼ିକ ତତକ୍ଷଣାତ ଶରୀର ଉପରେ ପ୍ରଭାବ ପକାଉ ନଥିବାରୁ ଆମେ ଏହାର କୁ-ପ୍ରଭାବକୁ ଅଣଦେଖା କରିଦେଇଥାଉ । ଫଳରେ ଧୀରେ ଧୀରେ ଏଗୁଡ଼ିକ ଆମକୁ ମୃତ୍ୟୁ ମୁଖକୁ ଟାଣି ନେବାର ଯଥେଷ୍ଟ ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ତଳେ ଲିଚିରେ ରସାୟନ ଦିଆଯାଉଥିବା ନେଇ ଚର୍ଚ୍ଚା ହେବା ପରେ ଏବେ ପାଚିଲା କଦଳୀକୁ ନେଇ ଗ୍ରାହକଙ୍କ ମନରେ ଅନେକ ପ୍ରଶ୍ନ ଉଙ୍କି ମାରୁଛି । କଦଳୀରେ ରସାୟନ ଦିଆଯାଉଛି କି ? ଏହାକୁ ଖାଇବା କେତେ ନିରାପଦ ? ସେ ନେଇ ଅନୁସନ୍ଧାନ କରାଯାଇଥିଲା । ଅନୁସନ୍ଧାନରୁ ତାହା ଚମକାଇଦେବା ଭଳି ତଥ୍ୟ ମିଳିଛି । ଭୁବନେଶ୍ବରର ସବୁଠାରୁ ବଡ଼ କଦଳୀ ଗୋଦାମ କଳ୍ପନାସ୍ଥିତ ‘କଦଳୀ ଗୋଦାମ ବସ୍ତି’ରେ ପଚରାଉଚରା କରି ସତ ବାହାର କରିବା ପାଇଁ ଚେଷ୍ଟା କରାଯାଇଥିଲା । କଦଳୀ ଭର୍ତି ବଡ଼ ବଡ଼ ଟ୍ରକ୍ ଲାଗିଥିଲା ବସ୍ତିରେ ।
ଜଣେ ଦୋକାନୀଙ୍କୁ ପାଚିଲା କଦଳୀ ମାଗିବା ପରେ ଦୋକାନୀ ଜଣକ କହିଲା ପାଚିଲା କଦଳୀ ହେବନି, ମାଲ୍ ଏବେ ଆସୁଛି । ଖରା ବେଳେ କିମ୍ବା ସଂଧ୍ୟା ବେଳକୁ ଆସ । ସମ୍ପୂର୍ଣ୍ଣ ନୀଳ ଦେଖା ଯାଉଥିବା କଦଳୀ କ’ଣ ସଂଧ୍ୟା ବେଳକୁ ପାଚିଯିବ ବୋଲି ଆମେ ପ୍ରଶ୍ନ କରାଯାଇଥିଲା । ଉତ୍ତର ମିଳିଲା, ସ୍ପ୍ରେ’ ଦେଇ ପଚାଯିବ। ତେବେ ଦେହ ପାଇଁ ତାହା ଖରାପ ନୁହଁ ବୋଲି ପଚାରିବାରୁ ଦୋକାନୀଜଣଙ୍କ ରାଗି ଯାଇ କୌଣସି ଉତ୍ତର ଦେଇନଥିଲେ ।
ବଜାରରେ ସବୁବେଳେ କଦଳୀର ଚାହିଦା ଦେଖି ବେପାରୀମାନେ ଅଳ୍ପ ସମୟ ଭିତରେ ଅଧିକ ବେପାର କରିବାକୁ ଏହି ଉପାୟ ଅବଲମ୍ବନ କରୁଛନ୍ତି । ହେଲେ ଏହି ରସାୟନ ଯେ ମଣିଷ ଶରୀର ପାଇଁ କେତେ କ୍ଷତିକାରକ, ସେଥିପ୍ରତି କାହାର ନିଘା ନାହିଁ । ଅସମୟରେ ଓ ଅପରିପକ୍ବ ଫଳ ପଚାଇବା ପାଇଁ କ୍ୟାଲ୍ସିୟମ୍ କାର୍ବାଇଡ୍ ବ୍ୟବହାର କରାଯାଇଥାଏ । ଏହା ଶରୀର ପାଇଁ ହାନିକାରକ ହୋଇଥିବାରୁ ଭାରତରେ ‘ଖାଦ୍ୟ ଅପମିଶ୍ରଣ ନିବାରଣ ଆଇନ୍ ଧାରା ୪୪(କକ)’ ଅନୁଯାୟୀ ଏହାର ବ୍ୟବହାରକୁ ନିଷେଧ କରାଯାଇଛି । ଏହା ସତ୍ତ୍ବେ ସରକାରଙ୍କ ଅପାରଗତା ଯୋଗୁଁ ଏହି ଆଇନ ଏ ପର୍ଯ୍ୟନ୍ତ କଡ଼ାକଡ଼ି ଭାବେ ଲାଗୁ ହୋଇପାରିନାହିଁ ।
ଖାଲି କଦଳୀ ନୁହେଁ, ଆମ୍ବ, ଆତ ଓ ପଣସ ଆଦି ଫଳ ମଧ୍ୟ ଏହି ଭଳି ଉପାୟରେ ପଚା ଯାଉଛି । କାରବାଇଡରେ ପ୍ରଚୁର ପରିମାଣର ଫସଫରସ୍ ଓ ଆରସେନିକ୍ ରହିଛି । ଯାହାକି ତାପମାତ୍ରା ବୃଦ୍ଧିରେ ସାହାଯ୍ୟ କରିବା ସହ ଅପରିପକ୍ବ ଫଳଗୁଡ଼ିକ ହଳଦିଆ ଓ କମଳା ରଙ୍ଗର ହୋଇ ପାଚିବାକୁ ଆରମ୍ଭ କରେ । ଏହି ଉପାୟରେ ଆମ୍ବ, କଦଳୀ, କମଳା ଓ ତରଭୁଜ ଆଦିକୁ ପଚା ଯାଇଥାଏ ।
କାରବାଇଡରେ ବିଷାକ୍ତ ପଦାର୍ଥ ବହୁ ପରିମାଣରେ ଥିବାରୁ ଏହା ଶରୀର ପାଇଁ ଅତ୍ୟନ୍ତ କ୍ଷତିକାରକ । ଏସିଟିଲିନ୍ ଗ୍ୟାସ୍ କାରବାଇଡରେ ଏକ ଉତ୍ପାଦ, ଯାହାକି ଉତ୍ତାପ ଉତ୍ପନ୍ନ କରିଥାଏ । ଏହାକୁ ଖାଇବା ଦ୍ବାରା ସ୍ନାୟୁଜନିତ ବିଭିନ୍ନ ସମସ୍ୟା ଦେଖାଯାଇଥାଏ । କାରବାଇଡରେ ବିଭିନ୍ନ ବିଷାକ୍ତ ଦ୍ରବ୍ୟ ଥିବାରୁ ଏହା ଖାଇବା ଦ୍ବାରା ଅଚେତ ହୋଇଯିବା, ହାତ, ଗୋଡ଼ ଓ ଶରୀର ଦୁର୍ବଳ ହେବା, ଚର୍ମ ଖରାପ ହେବା ଓ ନିମ୍ନ ରକ୍ତଚାପ ଆଦି ସମସ୍ୟା ଦେଖା ଦେଇଥାଏ ।