ରାଜ୍ୟରେ ଏବେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ହୀରାକୁଦକୁ ଉପମୁଣ୍ଡରୁ ପ୍ରଚୁର ମାତ୍ରାରେ ପାଣି ପ୍ରବେଶ କରୁଥିବାରୁ ଏଭଳି ଆଶଙ୍କା ତିଆରି ହୋଇଛି । ଖରାଦିନେ କଲମାର ସବୁ ଗେଟ ପକାଇ ରଖିଥିବା ଛତିଶଗଡ ସରକାର ବର୍ଷା ହେବାରୁ ସବୁ ଗେଟ ଖୋଲିଦେଇଛନ୍ତି । ଫଳରେ ଓଡିଶାରେ ବନ୍ୟା ସ୍ଥିତି ସୃଷ୍ଟି ହୋଇଥିବା ଆଶଙ୍କା କରାଯାଉଛି । ସିଧାସଳଖ ନହେଲେ ମଧ୍ୟ ବୁଲେଇ ବଙ୍କେଇ ସୃଷ୍ଟି ହୋଇଥିବା ବନ୍ୟା ସ୍ଥିତି ପାଇଁ ଛତିଶଗଡକୁ ଦାୟୀ କରିଛି ରାଜ୍ୟ ଜଳସଂପଦ ବିଭାଗ । ସୂଚନା ଅନୁସାରେ, କଲମା ବ୍ୟାରେଜର ସମସ୍ତ ୬୬ଟି ଗେଟକୁ ଖୋଲିଦେଇଛନ୍ତି ଛତିଶଗଡ ସରକାର । ଆଉ ହୀରାକୁଦକୁ ଆସୁଥିବା ପାଣିକୁ ଆଖି ଆଗରେ ରଖି ଆସନ୍ତାକାଲି ଡ୍ୟାମର ଗେଟ ଖୋଲାଯିବ ବୋଲି ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାରେ ବନ୍ୟା, ଛତିଶଗଡ ଦାୟୀ?
ଯଦି ରାଜ୍ୟ ଜଳସଂପଦ ବିଭାଗର ଇଙ୍ଗିତ ବାସ୍ତବତା ବୋଲି ଜଣାପଡେ ତେବେ ଆଗାମୀ ଦିନରେ ଓଡିଶା ଉପରେ ଅଧିକ ବିପଦର ଆଶଙ୍କା ରହିଛି । କାରଣ ଖରାଦିନେ ମରୁଡି ଆଉ ବର୍ଷାଦିନେ ବନ୍ୟା ସ୍ଥିତି ସୃଷ୍ଟି କରିବ ଛତିଶଗଡ । ବିଭିନ୍ନ ଶିଳ୍ପସଂସ୍ଥା ସହ ମିଶି ମହାନଦୀର ଉପରମୁଣ୍ଡରେ ଯେଉଁ ବନ୍ଧ ବାନ୍ଧିଛନ୍ତି ରମଣ ସରକାର ସେଥିରୁ ପାଣି ନେବା ପାଇଁ ଖରାଦିନେ ଗେଟକୁ ବନ୍ଦ କରି ରଖାଯାଉଥିବାର ଅଭିଯୋଗ ଅତୀତରେ ବିଜେଡି କରିଛି । ଏପରିକି ବିଦ୍ୟୁତ ଉତ୍ପାଦନ ପ୍ରଭାବିତ ହୋଇଥିବା ବେଳେ ଜମିକୁ ଜଳସେଚନ କମ ହେଉଥିବା ସାମ୍ବାଦିକ ସମ୍ମିଳନୀରେ ବିଜେଡି କହିଥିଲା । ଯାହାକୁ ନେଇ ବଡ ରାଜନୈତିକ ଝଡ ମଧ୍ୟ ସୃଷ୍ଟି ହୋଇଥିଲା ।
ଖୋଲିଦେଲେ କଲମା ଗେଟ
ଆଉ ଏବେ କଲମା ବ୍ୟାରେଜର ପଡି ରହିଥିବା ସମସ୍ତ ଗେଟକୁ ଛତିଶଗଡ ସରକାର ଖୋଲିଦେଇଛନ୍ତି । ୬୬ଟି ଯାକ ଗେଟ ଦେଇ ହୀରାକୁଦକୁ ପାଣି ପ୍ରବେଶ କରୁଛି । ଫଳରେ ହୀରାକୁଦର ଜଳସ୍ତର ବଢିବାରେ ଲାଗିଛି । ଆସନ୍ତାକାଲି ହୀରାକୁଦର ଗେଟ ଖୋଲାଯାଇ ବନ୍ୟାଜଳ ନିଷ୍କାସନ କରାଯିବ । ହୀରାକୁଦର ଜଳଧାରଣର କ୍ଷମତା ୬୩୦ ଫୁଟ ହୋଇଥିବା ବେଳେ ପଟୁ ପୋତି ହୋଇ ଜଳଧାରଣର କ୍ଷମତା କମିଛି । ହୀରାକୁଦର ଉପରମୁଣ୍ଡରେ ବର୍ଷା ହେଉଥିବା ବେଳେ ହୀରାକୁଦ ଜଳଭଣ୍ଡାର ଉପରେ ତୀକ୍ଷ୍ଣ ନଜର ରଖାଯାଇ, ବନ୍ୟାଜଳ ପରିଚାଳନା କରିବାକୁ ନିଷ୍ପତି ହୋଇଥିବା ସୂଚନା ଦିଆଯାଇଛି ।
ଛତିଶଗଡ ବଢାଉଛି ଚିନ୍ତା
କଲମା ବ୍ୟାରେଜର ୬୬ଟି ଗେଟ ଏବେ ଖୋଲାଯାଇଛି । ରାଜ୍ୟ ଅଧିକାରୀ ଛତିଶଗଡ ଅଧିକାରୀଙ୍କ ସହ କଥାବାର୍ତ୍ତା କରୁଛନ୍ତି । ଛତିଶଗଡ ଯେତେବେଳେ ସବୁ ଗେଟ ଖୋଲିଦେବ, ଅଧିକ ପାଣି ଆସିବ ଆଉ ହୀରାକୁଦରେ ଜଳଧରଣର କ୍ଷମତା ଏତେ ନାହିଁ । ହୀରାକୁଦ ତଳମୁଣ୍ଡରେ ଯେହେତୁ ଆଉ କିଛି ବ୍ୟାରେଜ ନାହିଁ, ତେଣୁ ଆଗାମୀ ଦିନରେ ଏହା ଉପରେ ଚିନ୍ତା କରାଯିବାର ଆବଶ୍ୟକତା ରହିଛି । ଯଦି ଛତିଶଗଡ ସରକାର, ରାଜ୍ୟ ସରକାରଙ୍କୁ ନଜଣାଇ ସବୁ ଗେଟ ଖୋଲିଦେବେ ତେବେ ବଡ ଧରଣର ବିପଦ ଆଶଙ୍କା ରହୁଛି । ଜଳସଂପଦ ବିଭାଗର ପ୍ରମୁଖ ସଚିବ ହୁଅନ୍ତୁ କିମ୍ବା ହୀରାକୁଦ ଡ୍ୟାମର ଅଧିକାରୀ ପ୍ରସଙ୍ଗ ଉପରେ ତୀକ୍ଷ୍ଣ ନଜର ରଖିଛନ୍ତି । ଆବଶ୍ୟକ ପଡିଲେ ଗେଟ ବନ୍ଦ କରିବାକୁ ରାଜ୍ୟ ସରକାର ଛତିଶଗଡ ସରକାରଙ୍କୁ ଅନୁରୋଧ କରିବେ ।
ଓଡିଶାରେ ମଧ୍ୟମ ଧରଣର ବନ୍ୟା
ଜଳସଂପଦ ବିଭାଗର ସୂଚନା ଅନୁସାରେ, ରାଜ୍ୟରେ ମଧ୍ୟମ ଧରଣର ବନ୍ୟା ଆଶଙ୍କା ରହିଛି । ମୁଂଡୁଳି ନିକଟରେ ୬.୨୨ ଲକ୍ଷ କ୍ୟୁସେକ ଜଳ ପ୍ରବାହିତ ହେଉଛି । ତେଣୁ ସେମିତି ବିଶେଷ କ୍ଷତି ହେବାର ଆଶଙ୍କା ନାହିଁ । ଯେହେତୁ ପ୍ରଥମ ବନ୍ୟାଜଳ ଆସୁଛି, ତେଣୁ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି । ଜଳସଂପଦ ବିଭାଗ ତରଫରୁ ମହାନଦୀ ଅବବାହିକାରେ ଥିବା ଜିଲ୍ଲା ପ୍ରଶାସନକୁ ସତର୍କ ରହିବାକୁ କୁହାଯାଇଛି । ଯାହା ପୂର୍ବନୁମାନ ହୋଇଛି ତାଠାରୁ ଅଧିକ ବନ୍ୟା ଆସିବାର ନାହିଁ ବୋଲି ଜଳସଂପଦ ବିଭାଗ ସ୍ପଷ୍ଟ କରିଛି ।
ରୁଲକର୍ଭ ନିୟମ ମାନିଥିଲେ ବଡ ବନ୍ୟା!
ରୁଲକର୍ଭକୁ ଯଦି ଜଳସଂପଦ ବିଭାଗ କାର୍ଯ୍ୟ କରିଥାନ୍ତା ତେବେ ୫୯୯ ଫୁଟରେ ଥିଲା ଜଳସ୍ତର ଆଉ ଆଜି ଭିୁତରେ ଏହା ୬୨୦ ଫୁଟ ହୋଇଯିବା କଥା । ୨ – ୩ ଦିନ ଭିତରେ ପାଣି ବଢିଗଲା ପାଖାପାଖି ୨୦ ଫୁଟ । ଯଦି ରୁଲ କର୍ଭକୁ ମାନିଥାନ୍ତୁ ତେବେ ତେଲ ଆଉ ଅନ୍ୟ ଅବବାହିକାରୁ ଆସୁଥିବା ପାଣି ଯୋଗୁଁ ୧୨ ଲକ୍ଷ କ୍ୟୁସେକ ବନ୍ୟାଜଳ ପ୍ରବାବିତ ହୋଇଥାନ୍ତା । ହୀରାକୁଦ ଗେଟ ଖୋଲିନଥିବାରୁ ମଧ୍ୟମ ଧରଣର ବନ୍ୟା ହେଉଛି, ନଚେତ ବଡ ବନ୍ୟା ଆସିଥାନ୍ତା ।
କାଲି ଖୋଲିବ ହୀରାକୁଦ ଗେଟ
ଦିଆଯାଇଥିବା ତଥ୍ୟ ଅନୁସାରେ, ରାଜ୍ୟରେ ବର୍ଷାର ପରିମାଣ କମୁଛି । ଯେଉଁ ପରିମାଣରେ ବନ୍ୟା ଜଳ ଏବେ ମୁଂଡୁଳି ନିକଟରେ ପ୍ରବାହିତ ହେଉଛି ତାହା ସମୁଦ୍ରରେ ମିଶିବାରେ ଅସୁବିଧା ନାହିଁ । ସେହିଭଳି ଆସନ୍ତାକାଲି ହୀରାକୁଦରେ ଗେଟ ଖୋଲିବା ବେଳେ ଯେଉଁ ଜଳ ନିଷ୍କାସନ ହେବ ତାହା ମୁଂଡୁଳି ନିକଟରେ ପହଂଚିବାକୁ ୨୪ ରୁ ୩୬ ଘଂଟା ଲାଗିବ । ଆଉ ସେହି ସମୟ ବେଳକୁ ପୂର୍ବରୁ ପ୍ରବାହିତ ଜଳ ସମୁଦ୍ରରେ ମିଶି ସାରିଥିବ । ଫଳରେ ମୁଂଡୁଳି ନିକଟରେ ବନ୍ୟାଜଳ ଆଉ ଅଧିକ ବଢିବ ନାହିଁ ।
ଏସବୁ ଜିଲ୍ଲାକୁ ସତର୍କ ସୂଚନା
ମହାନଦୀର ନିମ୍ନ ଅବବାହିକାରେ ଥିବା ଜିଲ୍ଲା ଯଥା ନୟାଗଡ, ପୁରୀ କେନ୍ଦ୍ରାପଡା, ଜଗତସିଂହପୁର କଟକ ଜିଲ୍ଲା ପ୍ରଶାସନକୁ ସତର୍କ ରହିବାକୁ କୁହାଯାଇଛି । ଯେଉଁଭଳି ରାଜ୍ୟରେ ବନ୍ୟା ସ୍ଥିତି ଆଉ ସଂକଟ ସୃଷ୍ଟି ନକରିବ ତାଉପରେ ସତର୍କ ନଜର ରଖାଯାଇଛି । ଯେହେତୁ ଅପର କ୍ୟାଚମେଂଟରେ ବର୍ଷା ହେଉଛି ତେଣୁ ହୀରାକୁଦକୁ ପଶୁଥିବା ଜଳ ଆଉ ବାହାରୁଥିବା ଜଳ ଉପରେ ଜଳସଂପଦ ବିଭାଗ ତରଫରୁ ନଜର ରଖାଯାଇଛି । ହୀରାକୁଦ ଅପରଷ୍ଟ୍ରିମରେ ୪୧ ମିମି ବର୍ଷା ହୋଇଥିବା ବେଳେ ଡାଉନଷ୍ଟ୍ରୀମରେ ୧୭ ମିମି ବର୍ଷା ରେକର୍ଡ କରାଯାଇଛି । ଛତିଶଗଡ ପଟୁ ହୀରାକୁଦକୁ ଇନଫ୍ଲୋ ବଢିବାର ଅଶଙ୍କା ରହୁଛି ତେଣୁ ଆଉଟଫ୍ଲୋକୁ କିଭଳି ନିୟନ୍ତ୍ରଣ କରାଯିବ, ତାହା ଉପରେ ନଜର ରହିଛି ।