କନକ ନ୍ୟୁଜର ରିଅଲିଟି ଚେକ୍ : ଦାନ ପାଇଁ ପଡିଛି ଥାଳି, ହେଲେ ହଇରାଣ କରୁନାହାଁନ୍ତି ସେବାୟତ । ଭକ୍ତ କହିଲେ, ସୁରୁଖୁରୁରେ ହେଲା ଜଗା ଦର୍ଶନ
କନକ ବ୍ୟୁରୋ : ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଚର୍ଚ୍ଚାରେ ଶ୍ରୀମନ୍ଦିରରେ ସଂସ୍କାର । ଏପରିକି ଏ ନେଇ ଆମିକସ କ୍ୟୁରୀ ଗୋପାଳ ସୁବ୍ରମଣ୍ୟମ ଗତ ସପ୍ତାହରେ ପୁରୀ ଆସି ଶଙ୍କାରାଚାର୍ଯ୍ୟ, ଗଜପତି, ଶ୍ରୀମନ୍ଦିର ପ୍ରଶାସନ ଓ ସେବାୟତଙ୍କ ସହ ଆଲୋଚନା କରିଛନ୍ତି । ଏଠାରେ ବଡ ପ୍ରଶ୍ନ ଉଠୁଛି, ଶ୍ରୀମନ୍ଦିରରେ ଆସୁଛି କି ସଂସ୍କାର । ଆମିକସ କ୍ୟୁରୀ ଯିବାର ଦୁଇଦିନ ପରେ ଶ୍ରୀମନ୍ଦିରରେ କ’ଣ ପରିବର୍ତ୍ତନ ହୋଇଛି ସେ ନେଇ କନକ ନ୍ୟୁଜ କରିଥିଲା ରିଏଲଟି ଚେକ୍ । ଶ୍ରୀମନ୍ଦିର ଭିତର ସହ ପାଶ୍ୱର୍ ଦେବାଦେବୀରେ କ’ଣ ପରବର୍ତ୍ତନ ହୋଇଛି ସେ ନେଇ ପରଖିଥିଲା ସ୍ଥିତି । ଏହି ସମୟରେ ଦେଖାଦେଇଥିଲା, ମନ୍ଦିର ଭିତରେ ଥାଳି ପୂର୍ବଭଳି ରହିଛି । ସେବାୟତମାନେ କିନ୍ତୁ ଜୋରଜବରଦସ୍ତି ଦାନ ମାଗୁନାହାନ୍ତି । ଅର୍ଥାତ୍ ମୋଟାମୋଟି ଭାବେ ଶ୍ରୀମନ୍ଦିରରେ ଆଂଶିକ ପରିବର୍ତ୍ତନ ଆସିଥିବା ଚର୍ଚ୍ଚା ଜୋର ଧରିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଶୁକ୍ରବାର ଭୋର ୫ଟା ପୂର୍ବରୁ ସାଧାରଣ ଭକ୍ତ ଭାବରେ ଶ୍ରୀମନ୍ଦିର ଭିତରେ ପ୍ରବେଶ କରିଥିଲେ ଗୋପାଳ ସୁବ୍ରମଣ୍ୟମ । ହେଲେ ଗର୍ଭଗୃହ ବନ୍ଦ ଥିଲା ଏବଂ ବହୁ ସଂଖ୍ୟାରେ ଭକ୍ତ ଦର୍ଶନ ପାଇଁ ଅପେକ୍ଷା କରିଥିଲେ । ନିର୍ଦ୍ଧାରିତ ସମୟରେ କାହିଁକି ଗର୍ଭଗୃହ ଖୋଲା ଯାଇନଥିଲା ସେନେଇ ଅସନ୍ତୋଷ ପ୍ରକାଶ କରିଥିଲେ ।
ଶ୍ରୀମନ୍ଦିରରେ ସଂସ୍କାର ଆଣିବା ପାଇଁ ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ଆମିକସ କ୍ୟୁରୀ ଗୋପାଳ ସୁବ୍ରମଣ୍ୟମ ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କରିବା ଲାଗି ଭକ୍ତଙ୍କ ବେଶରେ ପହଂଚିଥିଲେ । ଏହାସହ ଆମିକସ କ୍ୟୁରି ଗୋପାଳ ସୁବ୍ରମଣ୍ୟମ ପୁରୀ ଗୋବର୍ଦ୍ଧନ ପୀଠର ଶଙ୍କରାଚାର୍ଯ୍ୟ ସ୍ୱାମୀ ନିଶ୍ଚଳାନନ୍ଦ ସରସ୍ୱତୀଙ୍କୁ ମଧ୍ୟ ସାକ୍ଷାତ କରି ମନ୍ଦିର ବ୍ୟବସ୍ଥାବଳୀ ସଂପର୍କରେ ବିସ୍ତୃତ ଆଲୋଚନା ମଧ୍ୟ କରିଥିଲେ । ଗଜପତି ମହାରାଜଙ୍କୁ ଭେଟି ଶ୍ରୀମନ୍ଦିରରେ ସଂସ୍କାର ପାଇଁ ବିଷଦ ଭାବେ ଆଲୋଚନା କରିବା ପରେ ଶ୍ରୀମନ୍ଦିର ପରିଚାଳନା ବୈଠକରେ ବଡ ନିଷ୍ପତି ନିଆଯାଇଥିଲା ।
ଏଣିକି ମନ୍ଦିର ଭିତରେ ଦାନ ଓ ଦକ୍ଷିଣା ନେଇ ପାରିବେନି ସେବାୟତ । ସବୁଠୁ ବଡ କଥା ହେଲା, ମନ୍ଦିର ମଧ୍ୟରେ ଥାଳି ଓ ଦାନ ପାତ୍ର ରହିବ ନାହିଁ । ଶ୍ରୀମନ୍ଦିର ମଧ୍ୟରେ ଥିବା ପାଶ୍ୱର୍ ଦେବାଦେବୀଙ୍କ ଦାୟିତ୍ୱ ସମ୍ପୂର୍ଣ୍ଣ ଭାବେ ପ୍ରଶାସନ ହାତରେ ରହିବ । ଏହାଛଡା ସେବାୟତଙ୍କ ଦାନ ଓ ଦକ୍ଷିଣା ଉପରେ ରୋକ ଲଗାଇବାକୁ ୪ ଦ୍ୱାରରେ ୪ଟି ହୁଣ୍ଡି ଲଗାଯିବ । ଏସବୁକୁ ଅନୁଧ୍ୟାନ କରିବାକୁ ଆମିକସ କ୍ୟୁରି ପ୍ରତି ୨ ମାସରେ ଶ୍ରୀମନ୍ଦିର ଆସିବେ ।