ମାତ୍ର ୧୬ ମିନିଟରେ ମହାକାଶରେ ପହଁଚିବେ ୩ ଭାରତୀୟ ମହାକାଶଚାରୀ । ଇସ୍ରୋ ମହାକାଶ ଗବେଷଣା କେନ୍ଦ୍ରରୁ ଗଗନଯାନ ଲଂଚ ହେବାର ମାତ୍ର ୧୬ମିନିଟରେ ମହାକାଶଚାରୀ ମହାକାଶରେ ପହଁଚିବେ ବୋଲି କହିଛନ୍ତି ଇସ୍ରୋ ନିର୍ଦ୍ଦେଶକ । ଏଥିପାଇଁ ତିନି ଜଣଙ୍କୁ ଚୟନ କରାଯାଇଛି ଓ ସେମାନଙ୍କ ପ୍ରଶିକ୍ଷଣ ନିମନ୍ତେ ବ୍ୟବସ୍ଥା କରାଯାଇଛି । ସେପଟେ ଆସନ୍ତା ବର୍ଷ ଜାନୁଆରୀ ମାସରେ ଚନ୍ଦ୍ରଯାନ ୨ ପ୍ରେରଣ କରିବ ଭାରତୀୟ ମହାକାଶ ବିଜ୍ଞାନ ସଂସ୍ଥାନ ଇସ୍ରୋ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଚନ୍ଦ୍ରଯାନ ପ୍ରେରଣ ନେଇ ଅନେକ ଥର ସମୟ ପରିବର୍ତନ କରାଯିବା ପରେ ଇସ୍ରୋ ଏହାକୁ ୨୦୧୯ ମାର୍ଚ୍ଚ ମାସ ପୂର୍ବରୁ ସାରିବାକୁ ନିଷ୍ପତି ନେଇଛି । ଚନ୍ଦ୍ରଯାନ ପ୍ରେରଣ କଲେ ଆମେରିକା, ଋଷ ଓ ଚୀନ ପରେ ଚତୁର୍ଥ ଦେଶ ଭାବେ ଏହି ତାଲିକାରେ ସ୍ଥାନ ପାଇବ ଭାରତ । ଚନ୍ଦ୍ରର ଦକ୍ଷିଣ ପାଶ୍ୱର୍ ଉପରେ ବିଶେଷ ଗବେଷଣା କରା ଯାଇନଥିବାରୁ ଇସ୍ରୋ ଏସମ୍ପର୍କରେ ଅନୁସନ୍ଧାନ କରିବ ବୋଲି କୁହାଯାଇଛି । ଚନ୍ଦ୍ରଯାନ ୨ ମିସନରେ ୮୦୦ କୋଟି ଟଙ୍କା ବ୍ୟୟ ହେବାର ଅନୁମାନ କରାଯାଉଛି । ପୂର୍ବରୁ ମାତ୍ର ୪୭୦ କୋଟି ଟଙ୍କାରେ ଇସ୍ରୋର ମଙ୍ଗଳଯାନ ଅଭିଯାନ ସଫଳ ହୋଇଥିଲା । ଅଭିଯାନ ସଫଳ କରିବାକୁ ମହାକାଶ ଗବେଷଣା ପ୍ରତିଷ୍ଠାନର ପ୍ରସ୍ତୁତି ଚୂଡ଼ାନ୍ତ ସ୍ତରରେ ପହଂଚଥିବା ଜଣାପଡ଼ିଛି ।
ଚନ୍ଦ୍ରଯାନ ୨ରେ ଅନେକ ସ୍ୱତନ୍ତ୍ରତା ରହିଛି । ଏହାର ଓଜନ ୩ହଜାର ୨୯୦ କିଲୋଗ୍ରାମ ରହିବ । ପୃଥିବୀ ଠାରୁ ଚନ୍ଦ୍ର ୩ ଲକ୍ଷ ୮୨ ହଜାର କିମି ଦୂରରେ ଥିବାରୁ ମାସେରୁ ୨ମାସ ମଧ୍ୟରେ ଏହା ଚନ୍ଦ୍ରପୃଷ୍ଠରେ ପହଂଚିବ । ଚନ୍ଦ୍ରର ଦକ୍ଷିଣ ପାଶ୍ୱର୍ରେ ଚନ୍ଦ୍ର ଯାନ ୨ ଅବତରଣ କରିବ । ଅବତରଣ ପରେ ଏହା ପ୍ରେରକ ଯାନରୁ ଅଲଗା ହୋଇ ସ୍ୱତନ୍ତ୍ର ଭାବେ କାମ କରିବ । ଚନ୍ଦ୍ରଯାନ ୨ ବା ରୋଭର୍ ଚନ୍ଦ୍ରପୃଷ୍ଠରେ ୧୪ ଦିନ ରହି ୧୫୦ରୁ ୨୦୦ କିମି ପର୍ଯ୍ୟନ୍ତ ଯାତ୍ରାକରିବ । ୧୪ ଦିନ ପରେ ଏହା ସ୍ଲିପିଙ୍ଗ୍ ମୋଡକୁ ଚାଲିଯିବ । ତେବେ ଦରକାର ପଡ଼ିଲେ ସୂର୍ଯ୍ୟାଲୋକରୁ ଶକ୍ତି ସଂଗ୍ରହ କରି ଏହା ପୁଣି କାର୍ଯ୍ୟକ୍ଷମ ହୋଇପାରିବ ।