ବିଜେଡି ପାଇଁ ଚାଲେଂଜ ବିଜେପୁର । ଜିଲ୍ଲାରେ ନେତା ମାଳ ମାଳ, ହେଲେ ମନ କିନ୍ତୁ ମିଶୁନି । ପ୍ରସନ୍ନ ଆଉ ସୁଶାନ୍ତଙ୍କ ଭିତରେ କ୍ଷମତାର ଲଢେଇ, ଦଳ ସାମ୍ନାରେ ଆହ୍ୱାନ ।
ବିଜେପୁରରେ ହେଉଥିବା ଲଢେଇ ତିନି ପ୍ରମୁଖ ରାଜନୈତିକ ଦଳର ଶୀର୍ଷ ସ୍ତରୀୟ ନେତାଙ୍କ ପାଇଁ ସମ୍ମାନର ପ୍ରଶ୍ନ ଥିବା ବେଳେ, ସ୍ଥାନୀୟ ସ୍ତରର ନେତୃତ୍ୱଙ୍କ ପାଇଁ ମଧ୍ୟ ଗୁରୁତ୍ୱପୁର୍ଣ୍ଣ । ଖାସ କରି ବରଗଡ ରାଜନୀତିରେ ବିଜେଡିର ତିନି ଚେହେରା ନିଜ ଭିତରେ କିଭଳି ସମନ୍ୱୟ ରଖି ଆଗକୁ ବଢୁଛନ୍ତି ଏବଂ ସେମାନଙ୍କର ଅଭିକ୍ଷତାକୁ ଦଳ କିଭଳି ବ୍ୟବହାର କରୁଛି, ତାହା ମଧ୍ୟ ରହିବ ନଜରରେ । ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ, ଶ୍ରମମନ୍ତ୍ରୀ ସୁଶାନ୍ତ ସିଂ ଏବଂ ବୟନଶିଳ୍ପ ମନ୍ତ୍ରୀ ସ୍ନେହାଙ୍ଗିନୀ ଛୁରିଆ ବରଗଡ ରାଜନୀତିର ଜଣେ ଜଣେ ଟାଣୁଆ ଚେହେରା । ୨୦୧୪ରେ ସୁବଳ ସାହୁଙ୍କ ନିକଟରୁ ଯଦିଓ ପ୍ରସନ୍ନ ଆଚାର୍ଯ୍ୟ ବହୁ କମ ଭୋଟରେ ପରାଜିତ ହୋଇଥିଲେ, ତଥାପି ଜିଲ୍ଲା ରାଜନୀତିରେ ଆଚାର୍ଯ୍ୟ ପରିବାରର ବହୁ ଦବଦବା ରହିଛି । ପ୍ରଥମରୁ ରୀତା ସାହୁଙ୍କ ପ୍ରାର୍ଥୀତ୍ୱକୁ ନେଇ ଯଦିଓ ପ୍ରସନ୍ନ, ଅପ୍ରସନ୍ନ ଥିବା କୁହାଯାଉଥିଲା, ତେବେ ପରବର୍ତ୍ତୀ ପର୍ଯ୍ୟାୟରେ ତାଙ୍କୁ ନବୀନ ବୁଝାଇବାରେ ସମର୍ଥ ହୋଇଥିବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ରୀତା ସାହୁଙ୍କୁ ଦଳକୁ ଆଣିବାରେ ପ୍ରମୁଖ ଭୁମିକା ଗ୍ରହଣ କରିଥିବା ସୁଶାନ୍ତ ସିଂ, ଏବେ ନବୀନ ପଟ୍ଟନାୟକଙ୍କର ବିଜେପୁର ଗୋଟି ହୋଇଥିବା କୁହାଯାଉଛି । କୃଷକ ସେଲର ଦାୟିତ୍ୱରେ ଥିବା ଏହି ନେତା, ବରଗଡ ରାଜନୀତିରେ ଜଣେ ବେଶ ଭଲ ସଂଗଠକ । ଏପରିକି ଚାଷୀ ଆତ୍ମହତ୍ୟା ସମୟରେ ଭଟଲିରେ ଯେଉଁ ବିରାଟ ସମାବେଶ କରାଇଥିଲେ, ସେତେବେଳେ ନିଜ ସାମର୍ଥ୍ୟର ଉଦାହରଣ ଦେଇଥିବା କୁହାଗଲା । ବିଜେଡିର କୋଟେରୀ ଗୋଷ୍ଠୀର ଅତ୍ୟନ୍ତ ଅନୁଗତ ଏହି ନେତାଙ୍କ ଉପରେ ବିଜେଡିର ଅନ୍ଦର ମହଲ କୁଆଡେ ବେଶ ଭରସା କରିଛି । ଏପରିକି ବିଜେପୁର ଗୋଟିଚାଳନା ସମୟରେ ସୁଶାନ୍ତ ଆଗୁଆ ରହୁଥିବା ଦେଖିବାକୁ ମିଳିଛି । ବୟନଶିଳ୍ପ ମନ୍ତ୍ରୀ ସ୍ନେହାଙ୍ଗିନୀ ଛୁରିଆ ମଧ୍ୟ ବିଜେପୁର ଉପନିର୍ବାଚନରେ ବେଶ ବଡ ଭୁମିକାରେ ଆସିବେ । ଖାସ କରି ପ୍ରତ୍ୟେକ କର୍ମୀଙ୍କୁ କ୍ରିୟାଶୀଳ କରିବା ସହ ବିଜେପୁରକୁ ଫୋକସରେ ରଖି ସେ କାମ କରୁଥିବାର ଦେଖିବାକୁ ମିଳୁଛି । ମୋଟ ଉପରେ କହିବାକୁ ଗଲେ ଭଟଲି ଆଉ ଅତାବିରା ନିର୍ବାଚନ ମଣ୍ଡଳୀର ଏହି ଦୁଇ ନେତା ପଡୋଶୀ ବିଜେପୁର ଉପରେ ବେଶ ପ୍ରଭାବୀ ସାବ୍ୟସ୍ତ ହୋଇପାରନ୍ତି । ଉଭୟେ ମନ୍ତ୍ରୀ ମଧ୍ୟ ଅଛନ୍ତି । ଏପରିକି ଚାଷ ଆଉ ବୁଣାକାର, ଯେଉଁ ଦୁଇଟି ପ୍ରସଙ୍ଗ ବିଜେପୁରରେ ଗୁରୁତ୍ୱ ବହନ କରିବ, ସେହି ଦାୟିତ୍ୱରେ ମଧ୍ୟ ଜଡିତ ଅଛନ୍ତି । ତେବେ ନେତାଙ୍କ ଭିତରେ ଥିବା ମନୋମାଳିନ୍ୟ କିନ୍ତୁ ବିଜେଡି ପାଇଁ ଚିନ୍ତାର ବିଷୟ ହେବ । କାହିଁକି ନା ରୀତା ସାହୁଙ୍କୁ ନେଇ ପ୍ରସନ୍ନ ଆଉ ସୁଶାନ୍ତଙ୍କ ମଧ୍ୟରେ ଏକ ଫାଟ ତିଆରି ହୋଇଥିଲା ।