ଅଣସର ଘରେ ଜ୍ୱରରେ କମ୍ପୁଛନ୍ତି ମହାପ୍ରଭୁ ! ଶ୍ରୀକ୍ଷେତ୍ରରେ ଶ୍ରୀଜିଉଙ୍କ ଆଜି ଚଳାବିଜେ ନୀତି, ଜାଣନ୍ତୁ ଏହି ‘ଚଳାବିଜେ’ ନୀତି ବାସ୍ତବରେ କଣ
କନକ ବ୍ୟୁରୋ: ମହାପ୍ରଭୁଙ୍କ ଅଣସରରେ ଆଜି ହେଲା ଦଶମ ଦିନ । ୧୦୮ ଗରାରେ ଗାଧେଇବା ପରେ ଅସୁସ୍ଥ ହୋଇପଡିଥିଲେ ଶ୍ରୀଜିଉ । ତେବେ ଗୁପ୍ତନୀତି ପରେ ଧୀରେ ଧୀେରେ ସୁସ୍ଥ ହେଉଛନ୍ତି ଶ୍ରୀଜିଉ । ଆଜି ଶ୍ରୀମନ୍ଦିରରେ ଶ୍ରୀଜିଉଙ୍କ ଚକାବିଜେ ନୀତି ଅନୁଷ୍ଠିତ ହେବ । ଦଇତାପତି ସେବକମାନେ ଅସୁସ୍ଥ ମହାପ୍ରଭୁଙ୍କ ଏହି ଚଳାବିଜେ ନୀତି କରାଇବେ ତେବେ ୧୦୮ ଗରାରେ ଗାଧୋଇବା ପରେ ଅସୁସ୍ଥ ହୋଇ ଅଣସର ପିଣ୍ଡିରେ ଜ୍ୱରରେ କମ୍ପୁଥିବା ମହାପ୍ରଭୁ ଧିରେ ଧିରେ ସୁସ୍ଥ ହେଉଛନ୍ତି । ଦଇତାପତି ସେବକ ମାନେ ମହାପ୍ରଭୁଙ୍କୁ ଚକା ଉପରକୁ ବିଜେ କରାଇଥାନ୍ତି । ଯାହାକି ମୁଗୁନି ପଥରରେ ନିର୍ମିତ ହୋଇଥାଏ । ଏହାପରେ ଆସନ୍ତା କାଲି ଅଣସରର ସବୁଠାରୁ ବଡ ନୀତି ଅନୁଷ୍ଠିତ ହେବ ।
Kanak News is now on WhatsApp
Join and get latest news updates delivered to you via WhatsApp
ମହାପ୍ରଭୁଙ୍କ ସଂପୂର୍ଣ୍ଣ ସୁସ୍ଥ ପାଇଁ ପୁରୀ ଗଜପତିଙ୍କ ନିର୍ଦ୍ଦେଶକ୍ରମେ ରାଜବୈଦ ଦଶମୂଳ ମୋଦକ ପ୍ରସ୍ତୁତ କରି ଦଶମୀ ତିଥି ତଥା ଆଜି ଶ୍ରୀମନ୍ଦିରକୁ ଆଣିବେ । ତାଳପୂର୍ଣ୍ଣି , ଗମ୍ଭାରୀ, ବଲ୍ଲ, ପଣପଣା, ଗୋଖରା ଆଦି ଚୂର୍ଣ୍ଣ କରି ସେଥିରେ ଖୁଆ, ଘିଆ ମହୁ ଆଦି ଗୋଳାଇ ଏହି ଦଶମୂଳ ମୋଦକ ପ୍ରସ୍ତୁତ କରାଯାଇଥାଏ । ଆଉ ଏହି ମୋଦକକୁ ଏକାଦଶୀ ଦିନ ପତି ମହାମାତ୍ରସେବକ ମହାପ୍ରଭୁଙ୍କୁ ସମର୍ପି ଦେଇଥାନ୍ତି । ଆଉ ଏହି ଦଶମୂଳ ସେବନ ପରେ ମହାପ୍ରଭୁ ସଂପୂର୍ଣ୍ଣ ଭାବେ ସୁସ୍ଥ ହୋଇଯାଆନ୍ତି । ଦ୍ୱାଦଶ ଦିନ ମହାପ୍ରଭୁଙ୍କ ସୁସ୍ଥ ହେବା ଖବର ଗଜପତି ମହାରାଜଙ୍କୁ ପ୍ରଦାନ କରାଯାଇଥାଏ ।
ସେପଟେ ମୁଖ୍ୟମନ୍ତ୍ରୀଙ୍କୁ ଭେଟିବେ ଶ୍ରୀମନ୍ଦିର ସେବାୟତ । ଶ୍ରୀମନ୍ଦିର ସେବାୟତଙ୍କ ସବୁ ନିଯୋଗର ପ୍ରତିନିଧି ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିବେ । ଶ୍ରୀମନ୍ଦିରରେ ସଂସ୍କାର ଆଣିବାକୁ ସୁପ୍ରିମକୋର୍ଟଙ୍କ ସଂସ୍କାର ପ୍ରସ୍ତାବ ପରେ ସେବାୟତଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ଫଳରେ ଏ ନେଇ ମୁଖ୍ୟମନ୍ତ୍ରୀଙ୍କ ସହ ସେବାୟତଙ୍କ ଏକ ପ୍ରତିନିଧି ଦଳ ଭୁବନେଶ୍ୱରରେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିବା ସହ ଏ ସଂପର୍କରେ ସବିଶେଷ ଆଲୋଚନା କରିବେ । ଆଜି ଦିନ ୧୨ଟାରେ ଏହି ସାକ୍ଷାତ କାର୍ଯ୍ୟକ୍ରମ ରହିଛି । ବିଶେଷ କରି ଶ୍ରୀମନ୍ଦିର ଭିତରକୁ ଅଣହିନ୍ଦୁ ପ୍ରବେଶ କରି ପାରିିବେ କି ନାହିଁ, ବଂଶାନୁକ୍ରମିକ ସେବାୟତ ପରମ୍ପରା ବନ୍ଦ ହେବ କି ନାହିଁ, ସୁପ୍ରିମକୋର୍ଟଙ୍କ ପ୍ରସ୍ତାବ ପରେ ସୃଷ୍ଟି ହୋଇଛି ବଡ଼ ଧରଣର ବିତର୍କ । ଏ ନେଇ ସେବାୟତଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।