ଓଡ଼ିଶାର ଏମିତି ଏକ ଗାଁ । ଯେଉଁଠି ପୂରା ଗାଁକୁ ଜଗିଛି ସିସିଟିଭି ।
କନକ ବ୍ୟୁରୋ : ବଦଳୁଛି ଓଡ଼ିଶା, ବଦଳୁଛି ଗାଁ । ଦିନକୁ ଦିନ ହାଇଟେକ ହେଉଛି ଗାଁ । ସେହିଭଳି ଏକ ଗାଁ ହେଉଛି ବଲାଙ୍ଗୀର ଜିଲ୍ଲା ମୁରିବାହାଲ ବ୍ଲକର ହଳଦୀ ଗାଁ । ରାଜ୍ୟର ସବୁଠୁ ସୁରକ୍ଷିତ ଗାଁ ଭାବେ ଏବେ ଚର୍ଚ୍ଚାକୁ ଆସିଛି ହଳଦୀ ଗାଁ । କାରଣ ସିସିଟିଭି ରାଡାରରେ ରହିଛି ପୂରା ଗାଁ ।
Kanak News is now on WhatsApp
Join and get latest news updates delivered to you via WhatsApp
ସାବଧାନ । ପୂରା ଗାଁକୁ ଜଗିଛି ସିସିଟିଭି । ଛକରୁ ଆରମ୍ଭ କରି ଗାଁ ଗଳି ସବୁଠି ରହିଛି ସିସିଟିଭିର ନଜର । ଗାଁ ଭିତରକୁ କିଏ ଆସୁଛି, କଣ କରୁଛି ତାହାର ପ୍ରତିଟି ଗତିବିଧି ଉପରେ ନଜର ରଖିଛି ସିସିଟିଭି । ଆଉ ଏଭଳି କରି ପୂରା ଗାଁକୁ ସିସିଟିଭିର ସୁରକ୍ଷା ବଳୟ ମଧ୍ୟରେ ରଖାଯାଇଛି । ହଳଦୀ ଗାଁର ଏଭଳି ହାଇଟେକ ବ୍ୟବସ୍ଥା ଏବେ ରାଜ୍ୟର ଅନ୍ୟ ଗାଁ ଗୁଡିକ ପାଇଁ ଉଦାହରଣ ସାଜିଛି ।
ତେବେ ଏହି ଗାଁରେ ସିସିଟିଭି ଲଗାଯିବା ପଛରେ ଏକ ବଡ କାରଣ ରହିଛି । କାରଣ ସିସିଟିଭି ଲାଗିବା ପୂର୍ବରୁ ଗାଁରେ ବାରମ୍ବାର ଚୋରି ହେବା ସହ ରାତି ହେଲେ ମଦୁଆଙ୍କ ଦୌରାତ୍ମ ଦେଖିବାକୁ ମିଳୁଥିଲା । ତେବେ ସିସିଟିଭି ଲଗାଯିବା ପରେ ଗାଁରୁ ଚୋରି ସମ୍ପୂର୍ଣ୍ଣ ବନ୍ଦ ହୋଇଥିବା ବେଳେ ମଦୁଆଙ୍କ ଦୌରାତ୍ମ୍ୟ ମଧ୍ୟ କମିଛି ।
ତେବେ ଗାଁରେ ସିସିଟିଭି ଲଗାଇବା ପଛର ମୁଖ୍ୟ ସୁତ୍ରଧର ଥିଲେ ସ୍ଥାନୀୟ ସରପଞ୍ଚ ଗୋପୀନାଥ ପାଣିଗ୍ରାହୀ । ଦୀର୍ଘ ବର୍ଷ ଧରି ଗାଁରେ ଲାଗି ରହିଥିବା ଏହି ସମସ୍ୟାର ସମାଧାନ ପାଇଁ ସିସିଟିଭି ଲଗାଇବାକୁ ନିଷ୍ପତି ନେଇଥିଲେ । ତେବେ ଗୋପୀନାଥଙ୍କ ଏହି ନିଷ୍ପତିକୁ ପ୍ରଥମେ ବିରୋଧ କରିଥିଲେ ଗ୍ରାମବାସୀ । କିନ୍ତୁ କାହା କଥାକୁ ଭ୍ରୃକ୍ଷେପ ନ କରି ପଞ୍ଚାୟତ ପାଣ୍ଠିରୁ ପ୍ରାୟ ୩ ଲକ୍ଷ ଟଙ୍କା ବ୍ୟୟରେ ୨୯ଟି ସିସିଟିଭି ଲଗାଇଥିଲେ ଗୋପୀନାଥ ।
ସିସିଟିଭି ଲାଗିବା ପରେ ଗତ ଗୋଟିଏ ବର୍ଷ ମଧ୍ୟରେ ଗାଁରୁ ଚୋରି, ଗଣ୍ଡଗୋଳ କମିଛି । ଏହାସହ ରାଜ୍ୟର ପ୍ରଥମ ଗାଁ ଭାବେ ପୂରା ସିସିଟିଭି ରାଡାରରେ ରହିଛି ହଳଦୀ ଗାଁ । ଏଭଳି ଅନେକ ପଦକ୍ଷେପ ଏବେ ହଳଦୀ ଗାଁକୁ ଆଦର୍ଶ ଗ୍ରାମ ଭାବେ ଗଢି ତୋଳିଛି ।