କୋଲକାତାର କଳି ସଂସଦରେ ଗର୍ଜନ ! ରାଜ୍ୟ ରାଜନୀତିରେ କେଉଁ ନେତା କହିଲେ କ’ଣ ?
ଗତକାଲି କୋଲକାତା ପୁଲିସ କମିଶନରଙ୍କ ଘରେ ସିବିଆଇ ପସିବା ଘଟଣା ପରେ ଉଠିଥିବା ଝଡ଼କୁ ନେଇ ରାଜ୍ୟ ନେତାମାନେ ପ୍ରତିକ୍ରିୟା ରଖିଛନ୍ତି ।
କନକ ବ୍ୟୁରୋ: ବଢ଼ିଲା ସିବିଆଇ ବନାମ ପୋଲିସ ବିବାଦ । ଏନେଇ ପଶ୍ଚିମବଙ୍ଗରୁ ଦିଲ୍ଲୀ ଓ ରାଜ୍ୟ ରାଜନୀତିରେ ଉଷ୍ମତା ଆଣିଛି । ଗତକାଲି କୋଲକାତା ପୁଲିସ କମିଶନରଙ୍କ ଘରେ ସିବିଆଇ ପସିବା ଘଟଣା ପରେ ଉଠିଥିବା ଝଡ଼କୁ ନେଇ ରାଜ୍ୟ ନେତାମାନେ ପ୍ରତିକ୍ରିୟା ରଖିଛନ୍ତି । ବିଜେଡି ସାଂସଦ ଭର୍ତ୍ତୃହରି ମହତାବ କହିଛନ୍ତି ଯେ, ସର୍ବୋଚ୍ଚ ସଂସ୍ଥାଗୁଡିକର ଅଖଣ୍ଡତା ବଜାୟ ରହୁ । ସବୁ ସ୍ଥାନରେ ବୃତିଗତ ସ୍ୱାଧୀନତା ରହିବା ଦରକାର । ବିଜେଡି କହିଛି, ପଂଚାୟତ ନିର୍ବାଚନ ପୂର୍ବରୁ ଓ ବର୍ତମାନ ସାଧାରଣ ନିର୍ବାଚନ ପୂର୍ବରୁ ସିବିଆଇର ହଠାତ କାର୍ଯ୍ୟାନୁଷ୍ଠାନ ଅଣପେଶାଦାର ମନୋଭାବକୁ ଦର୍ଶାଉଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି ଯେ, ସିବିଆଇକୁ ହାତ ବାରିସି କରି ରାଜନୈତିକ ଆକ୍ରୋଶ ରଖିବା ଉଚିତ୍ ନୁହେଁ । ଯଦି ପଶ୍ଚିମବଙ୍ଗରେ ମମତାଙ୍କ ବିରୋଧରେ ଆକ୍ରୋଶମୂଳକଭାବେ ସିବିଆଇକୁ ବ୍ୟବହାର କରାଯାଉଥାଏ ତେବେ ଏହା ନିନ୍ଦନୀୟ ଘଟଣା । ଓଡ଼ିଶାରେ ମଧ୍ୟ ସିବିଆକୁ ଖଣ୍ଡା ଭଳି ବ୍ୟବହାର କରାଯାଉଛି । ଯେଉଁଥିରେ ନବୀନ ବାବୁଙ୍କୁ ଡ଼ରାଯାଉଛି ବୋଲି କହିଛନ୍ତି ପିସିସି ସଭାପତି । ସେହିଭଳି କଂଗ୍ରେସ ବିରୋଧୀଦଳ ନେତା ନରସିଂହ ମିଶ୍ର କହିଛନ୍ତି ଯେ, କେନ୍ଦ୍ରସରକାର ସିବିଆଇକୁ ରାଜନୈତିକ ଉଦେଶ୍ୟ ରଖି ବ୍ୟବହାର କରୁଛନ୍ତି । କାହାକୁ ଡ଼ରାଇବା ପାଇଁ ତ କାହାକୁ ଗିରଫ କରିବା ପାଇଁ ସିବିଆଇ ଜରିଆରେ ଧମକ ଦେଉଛନ୍ତି ମୋଦି ସରକାର । ଯାହ ଦର୍ଶାଉଛି ସାମ୍ବିଧାନିକ ବ୍ୟବସ୍ଥା ଉପରେ ପ୍ରଶ୍ନ ବାଚୀ ସୃଷ୍ଟି କରିଛି ।
ସେହିଭଳି ବରିଷ୍ଠ ନେତା ବିଜୟ ମହାପାତ୍ର କହିଛନ୍ତି ଯେ, ସିବିଆଇ ତା’ର କାର୍ଯ୍ୟ ନିରପକ୍ଷ ଭାବେ କରୁନାହିଁ । ସିବିଆଇ ସଂସ୍ଥା ଆଦୌ ନିରପକ୍ଷ ନୁହନ୍ତି ନଚେତ୍ ୪ ବର୍ଷ ହୋଇଗଲା ଚିଟଫଣ୍ଡ ମାମଲାର ଚେର ପାଖରେ ପହଁଚିପାରୁ ନାହାନ୍ତି । ଏବଂ ସିବିଆଇ ବିରୋଧରେ ମମତା ଯେଉଁ ପ୍ରତିବାଦ କରୁଛନ୍ତି ତାହା ଅଭନନ୍ଦନୀୟ ବୋଲି କହିଛନ୍ତି ବିଜୟ ।
ଶେଷରେ ବିଜେପି ଏହାର ଉତ୍ତରରେ କହିଛି, ଓଡ଼ିଶାରେ ମଧ୍ୟ ଚିଟଫଣ୍ଡ ଚୋରଙ୍କ ଆଡ୍ଡା ରହିଛି । ପାଖାପାଖି ୨୦ ହଜାର କୋଟି ଟଙ୍କା ରାଜ୍ୟବାସୀଙ୍କର ଚଳୁ କରିଛନ୍ତି । ନବୀନ ସରକାରଙ୍କ ବିଭିନ୍ନ ନେତା ଏହି ଘୋଟାଲାରେ ସଂପୃକ୍ତି ରହିଛନ୍ତି । ତେଣୁ ପଶ୍ଚିମବଙ୍ଗରେ ମମତା ବାନାର୍ଜୀ କରୁଥିବା ନାଟକରେ ବିଜେଡି ଛାନିଆ ହୋଇପଡ଼ିଛି ବୋଲି ବିଜେପି ବିଧାୟକ ପ୍ରଦୀପ ପୁରୋହିତ କହିଛନ୍ତି ।