ଦିଲ୍ଲୀ ପହଞ୍ଚିଲା କୋଲକତା ଝଡ଼! ସିବିଆଇ-ପଶ୍ଚିମବଙ୍ଗ ପୁଲିସ୍ ବିବାଦକୁ ନେଇ ସଂସଦରେ ହଙ୍ଗାମା, ବିରୋଧୀଙ୍କ ଟାର୍ଗେଟରେ ମୋଦି ସରକାର ।
କନକ ବ୍ୟୁରୋ : ସଂସଦରେ ପଶ୍ଚିମବଙ୍ଗ ଝଡ । କୋଲକାତାରେ ସିବିଆଇ ବନାମ ପୋଲିସକୁ ନେଇ ସୃଷ୍ଟି ହୋଇଥିବା ବିବାଦ ଆଜି ପାର୍ଲାମେଂଟରେ ସରକାର ବନାମ ବିରୋଧୀ ଲଢ଼େଇର ରୁପ ନେଇଛି । ସିବିଆଇର କାର୍ଯ୍ୟାନୁଷ୍ଠାନକୁ ବିରୋଧ କରି ଉଭୟ ଲୋକସଭା ଏବଂ ରାଜ୍ୟସଭାରେ ହଙ୍ଗାମା କରିଛନ୍ତି ବିରୋଧୀ । ସେପଟେ ଗୃହମନ୍ତ୍ରୀ କହିଛନ୍ତି, ମମତାଙ୍କ ଆଚରଣ ସଂଘୀୟ ବ୍ୟବସ୍ଥା ପ୍ରତି ବିପଦ ।
Kanak News is now on WhatsApp
Join and get latest news updates delivered to you via WhatsApp
ସିବିଆଇ ଭର୍ସେସ୍ ପଶ୍ଚିମବଙ୍ଗ ପୁଲିସ୍ ବିବାଦ କୋଲକତାରୁ ଦିଲ୍ଲୀ ପହଂଚିବା ଭିତରେ ହୁଏତ ବଦଳି ଯାଇଛି, ସିବିଆଇ ଝଡ଼ର ସ୍ୱରୂପ । ଏହି ବିବାଦ କେବଳ ଚିଟଫଣ୍ଡ ତଦନ୍ତ କିମ୍ବା ସିବିଆଇ-ପୁଲିସ୍ ବିବାଦ ହୋଇ ରହିନି ବରଂ ସଂସଦ ଭବନରେ ପହଂଚିଲା ବେଳକୁ ଏହା ସରକାର ବନାମ ବିରୋଧୀ ଲଢ଼େଇର ରୁପ ନେଇଛି । ସିବିଆଇର କାର୍ଯ୍ୟାନୁଷ୍ଠାନକୁ ବିରୋଧ କରି ଉଭୟ ଲୋକସଭା ଏବଂ ରାଜ୍ୟସଭାରେ ହଙ୍ଗାମା କରିଛନ୍ତି ବିରୋଧୀ ।
ମୋଦି ଓ କେନ୍ଦ୍ର ସରକାର ସିବିଆଇ ଲଗାଇ ବିରୋଧୀଙ୍କୁ ମୁଳପୋଛ କରିବାକୁ ଉଦ୍ୟମ କରୁଥିବା ବିରୋଧୀ ଅଭିଯୋଗ କରିଥିବା ବେଳେ ଗୃହମନ୍ତ୍ରୀ କହିଛନ୍ତି- ମମତାଙ୍କ ଆଚରଣ ସଂଘୀୟ ବ୍ୟବସ୍ଥା ପ୍ରତି ବିପଦ । ଆଉ ଏହାରି ଭିତରେ ମମତାଙ୍କ ସମର୍ଥନରେ ମୈଦାନକୁ ଓହ୍ଲାଇ ଆସିଛନ୍ତି ମୋଦି ବିରୋଧୀ ଶକ୍ତି । କଂଗ୍ରେସ, ଆପ୍, ସମାଜବାଦୀ ପାର୍ଟି ମମତାଙ୍କୁ ସମର୍ଥନ କରିବା ସହ ମୋଦିଙ୍କ ଉପରେ ବର୍ଷିଛନ୍ତି ।
ଆଉ ଏପଟେ ବିରୋଧୀଙ୍କ ହମଲାର ଜବାବ୍ ରଖିବାକୁ ମୈଦାନକୁ ଓହ୍ଲାଇ ଆସିଛି ବିଜେପି ବ୍ରିଗେଡ୍ । କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର ମମତାଙ୍କୁ ସମାଲୋଚନା କରି କହିଛନ୍ତି-ଏହା ମମତାଙ୍କ ଜରୁରୀ ପରିସ୍ଥିତି, ଆମର ନୁହେଁ । ଆଉ ଏହି ଜରୁରୀ ପରିସ୍ଥିତି ସହ ଲଢ଼ିବାକୁ ଆମେ ପ୍ରସ୍ତୁତ ବୋଲି ଆହ୍ୱାନ ଦେଇଛନ୍ତି । ଅନରୁପ ଢ଼ଙ୍ଗରେ ପ୍ରତିରକ୍ଷା ମନ୍ତ୍ରୀ ଏବଂ ସଂଖ୍ୟାଲଘୁ ବ୍ୟାପରମନ୍ତ୍ରୀ ମଧ୍ୟ ଟିଏମ୍ସିର ହସ୍ତକ୍ଷେପକୁ ନିନ୍ଦା କରିଛନ୍ତି ।
ରାଜନୀତିର ଏହି ଆରୋପ-ପ୍ରତ୍ୟାରୋପ ଭିତରେ ସଂସଦରେ ପ୍ରଭାବିତ ହୋଇଛି ଉଭୟ ଗୃହ କାର୍ଯ୍ୟ । ଏପଟେ ମମତା ବାନାର୍ଜୀ ସିବିଆଇ କାର୍ଯ୍ୟାନୁଷ୍ଠାନ ବିରୋଧରେ ଲଢ଼େଇ ଜାରି ରଖିଛନ୍ତି । କୋଲକାତା ସଂକଟ ପ୍ରସଙ୍ଗରେ ସଂସଦରେ ଆଲୋଚନା ବେଳେ ସିବିଆଇକୁ ରାଜନୈତିକ ଅସ୍ତ୍ର ଭାବେ ବ୍ୟବହାର କରାଯାଉଛି ବୋଲି ମତ ଦେଇଛି ବିଜେଡି । ବିଜେଡି ସଂସଦୀୟ ଦଳର ନେତା ଭର୍ତୃହରି ମହତାବ କହିଛନ୍ତି, ଓଡ଼ିଶାର ପଂଚାୟତ ନିର୍ବାଚନ ପୂର୍ବରୁ ଏବଂ ବର୍ତମାନ ନିର୍ବାଚନ ପାଖେଇ ଆସୁଥିବା ବେଳେ ସିବିଆଇ ଯେଉଁଭଳି ଭାବେ କାର୍ଯ୍ୟ କରୁଛି, ତାହା ସିବିଆଇର ବୃତିଗତ ମନୋଭାବକୁ ଦର୍ଶାଉନାହିଁ । ସିବିଆଇ ତା’ର ଗାରିମାକୁ ବଜାୟ ରଖିବାକୁ ପରାମର୍ଶ ଦେଇଛନ୍ତି ଭର୍ତୃହରି । ସେପଟେ ପିସିସି ସଭାପତି ନିରଂଜନ ପଟ୍ଟନାୟକ କହିଛନ୍ତି ସିବିଆଇକୁ ହାତବାରିସୀ କରି ରାଜନୈତିକ ଆକ୍ରୋଶ ରଖିବା ଠିକ୍ ନୁହେଁ । ତେବେ ରାଜ୍ୟ ବିଜେପି ସଭାପତି କହିଛନ୍ତି ସିବିଆଇ ତା’ର ଦାୟିତ୍ୱ ନିର୍ବାହ କରୁଛି ।