କନକ ବ୍ୟୁରୋ : କାଲିଠାରୁ ଦେଶର ସମସ୍ତ ପେଟ୍ରୋଲ ପମ୍ପରେ କାର୍ଡରେ ପେମେଂଟ୍ ନିଆଯିବ ନାହିଁ । ଦେଶର ପେଟ୍ରୋଲ ପମ୍ପ୍ ଡିଲରମାନେ ଏଭଳି ଘୋଷଣା କରିଛନ୍ତି । ପେଟ୍ରୋଲ ପମ୍ପଗୁଡିକରେ ଡେବିଟ୍ କିମ୍ବା କ୍ରେଡିଟ୍ କାର୍ଡ ଗ୍ରହଣ କରିବେ ନାହିଁ । କେବଳ ନଗଦ ଅର୍ଥରେ ପେଟ୍ରୋଲ-ଡିଜେଲ୍ ବିକିବେ । ବ୍ୟାଙ୍କଗୁଡିକ କାର୍ଡ ପେମେଂଟ୍ ଉପରେ ୧ ପ୍ରତିଶତ ଟ୍ରାନଜାକ୍ସନ ଚାର୍ଜ ନେଉଥିବାରୁ ଏହାକୁ ବିରୋଧ କରିଛନ୍ତି ପେଟ୍ରୋଲ ପମ୍ପ୍ ମାଲିକ । ପେଟ୍ରୋଲ ଓ ଡିଜେଲ୍ ଭଳି ତୈଳଗୁଡ଼ିକ କେତେ ଲାଭରେ ବିକ୍ରି ହେବ ତାହା ସ୍ଥିର କରିଥାନ୍ତି ତୈଳ ବିପଣନ କମ୍ପାନୀ ।
Kanak News is now on WhatsApp
Join and get latest news updates delivered to you via WhatsApp
ତୈଳ କାରବାର ଉପରେ ପେଟ୍ରୋଲ ପମ୍ପ୍ ମାଲିକଙ୍କୁ ମାତ୍ର ୦.୩ ପ୍ରତିଶତରୁ ୦.୫ ପ୍ରତିଶତ ପର୍ଯ୍ୟନ୍ତ ଲାଭ ମିଳିଥାଏ । ଏପରିସ୍ଥଳେ ସେମାନେ ବ୍ୟାଙ୍କ ଗୁଡ଼ିକୁ କାହିଁକି ୧ ପ୍ରତିଶତ ଫି ଦେବେ ବୋଲି ପ୍ରଶ୍ନ କରିଛନ୍ତି । କ୍ୟାସଲେସ୍ ବା ନଗଦବିହୀନ କାରବାରକୁ ସରକାର ପ୍ରୋତ୍ସାହନ ଦେବାକୁ କହୁଥିବା ବେଳେ ଏହା ତାର ବିରୋଧାଚରଣ କରୁଛି ବୋଲି କହିଛନ୍ତି ବାଂଗାଲୋର ପେଟ୍ରୋଲିୟମ୍ ଡିଲର୍ସ ଆସୋସିଏସନ୍ ସଭାପତି ବି. ବି. ରବୀନ୍ଦ୍ରନାଥ ।
ଓଡ଼ିଶାରେ ବି ପେଟ୍ରୋଲ ପମ୍ପ୍ ମାଲିକମାନେ ଆସନ୍ତାକାଲିଠାରୁ ଘରୋଇ କାର୍ଡରେ ପେମେଂଟ୍ ଗ୍ରହଣ କରିବେ ନାହିଁ ବୋଲି ଚେତାବନୀ ଦେଇଛନ୍ତି । ଆକ୍ସିସ, ଏଚଡିଏଫସି ଭଳି ଘରୋଇ ବ୍ୟାଙ୍କଗୁଡ଼ିକ ଟ୍ରାନଜାକ୍ସନ୍ ଉପରେ ୧ ପ୍ରତିଶତ ଫି ନେଉଛନ୍ତି । ଏହାକୁ ବିରୋଧ କରିଛି ଉତ୍କଳ ପେଟ୍ରୋଲିୟମ୍ ଡିଲର୍ସ ଆସୋସିଏସନ୍ । ଆସୋସିଏସନ୍ ସାଧାରଣ ସଂପାଦକ ସଂଜୟ ଲାଠ୍ କହିଛନ୍ତି- ସରକାର କ୍ୟାସଲେସ୍ କାରବାରକୁ ପ୍ରୋତ୍ସାହିତ କରୁଥିବା ବେଳେ ଘରୋଇ ବ୍ୟାଙ୍କଗୁଡ଼ିକର ୧ ପ୍ରତିଶତ ଟ୍ରାନଜାକ୍ସନ୍ ଫିକୁ ଆମେ ବିରୋଧ କରୁଛୁ ।