ଖଲିସ୍ତାନ ଆତଙ୍କବାଦୀ ସହ ଫଟୋକୁ ନେଇ ଚର୍ଚ୍ଚା ଭିତରେ ଦିଲ୍ଲୀରେ ମୋଦିଙ୍କୁ ଭେଟିଲେ କାନାଡା ପ୍ରଧାନମନ୍ତ୍ରୀ : ଜସପାଲ ଅଟୱଲ ସହ ଫଟୋ ଉଠାଇଥିଲେ ଜଷ୍ଟିନ ଟ୍ରୁଡ଼ୋଙ୍କ ପତ୍ନୀ
କନକ ବ୍ୟୁରୋ : ଭାରତ ଗସ୍ତର ପଂଚମ ଦିନରେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଲେ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡ଼ୋ । ଦୁଇ ନେତାଙ୍କ ଭିତରେ ସାକ୍ଷାତରେ ବିଳମ୍ବକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିବାବେଳେ ଗତକାଲି ଏନେଇ ଟ୍ୱିଟ କରିଥିଲେ ପ୍ରଧାନମନ୍ତ୍ରୀ ମୋଦି । କାନାଡା ପ୍ରଧାନମନ୍ତ୍ରୀ ଓ ତାଙ୍କ ପରିବାରକୁ ଭେଟିବା ଲାଗି ସେ ବିଶେଷ ଆଗ୍ରହୀ ବୋଲି ଟ୍ୱିଟ କରିଥିଲେ ମୋଦି । ଏପରିକି ୨୦୧୫ ତାଙ୍କ କାନାଡା ଗସ୍ତ ସମୟର ଏକ ଫଟୋକୁ ମଧ୍ୟ ଟ୍ୟାଗ କରିଥିଲେ । ଏହାପରେ ଆଜି ଦିଲ୍ଲୀରେ ଦୁଇ ନେତାଙ୍କ ମଧ୍ୟରେ ରାଷ୍ଟ୍ରପତି ଭବନରେ ସାକ୍ଷାତ ହୋଇଛି । ଜଷ୍ଟିନ ଟ୍ରୁଡ଼ୋଙ୍କ ପୁଅ, ଝିଅଙ୍କ ସହ ମଧ୍ୟ ମୋଦି ଫଟୋ ଉଠାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଖଲିସ୍ତାନ ଆନ୍ଦୋଳନର ସମର୍ଥକ ଜସପାଲ ଅଟୱଲକୁ କାନାଡାର ସରକାରୀ କାର୍ଯ୍ୟକ୍ରମରେ ଦେଖିବାକୁ ମିଳିଥିବାବେଳେ ପ୍ରଧାନମନ୍ତ୍ରୀଙ୍କ ପତ୍ନୀଙ୍କ ସହ ତାଙ୍କ ଫଟୋକୁ ନେଇ ବେଶ ବିବାଦରେ ରହିଛି ଜଷ୍ଟିନ ଟ୍ରୁଡ଼ୋଙ୍କ ଏହି ଗସ୍ତ । ଏପରିକି ପ୍ରଧାନମନ୍ତ୍ରୀ ମୋଦି ଆଜିଯାଏ ତାଙ୍କୁ ସାକ୍ଷାତ ନକରିବା ପଛରେ ଏହା ମୁଖ୍ୟ କାରଣ ବୋଲି ଚର୍ଚ୍ଚା ହେଉଥିଲା । ହେଲେ ପଂଜାବ ଗସ୍ତ ସମୟରେ କାନାଡା କୌଣସି ବିଚ୍ଛିନ୍ନତାବାଦୀ ଆନ୍ଦୋଳନକୁ ସମର୍ଥନ କରୁନାହାନ୍ତି ବୋଲି କ୍ୟାପଟେନ ଅମରିନ୍ଦର ସିଂଙ୍କୁ ଆଶ୍ୱାସନା ଦେଇଥିଲେ । ଏହାପରେ ପ୍ରଧାନମନ୍ତ୍ରୀ ମୋଦି ତାଙ୍କ ସାକ୍ଷାତ କରିଥିବା କୁହାଯାଉଛି । ଦୁଇ ନେତାଙ୍କ ମଧ୍ୟରେ ଆଜି ଦିଲ୍ଲୀରେ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗରେ ଆଲୋଚନା ହେବ ବୋଲି ଜଣାପଡିଛି ।