କନକ ବ୍ୟୁରୋ : ନଗଡା ଭଳି ଅପପୁଷ୍ଟିର ଶିକାର ହେଉଥିବା ପିଲାଙ୍କୁ ପୁଷ୍ଟିସାର ଯୋଗାଇବା ପାଇଁ ସରକାର ମାଗଣାରେ ଅଙ୍ଗନୱାଡି ଜରିଆରେ ପୁଷ୍ଟିକର ଛତୁଆ ଯୋଗାଇଛନ୍ତି । କିନ୍ତୁ ବିଧାନସଭାରେ ଉପସ୍ଥାପିତ ସିଏଜିଙ୍କ ରିପୋର୍ଟରେ ମାଗଣାରେ ମିଳୁଥିବା ଏହି ସରକାରୀ ଛତୁଆ କିଭଳି ସ୍କାମ ଘେରରେ ରହିଛି, ତାର ପ୍ରମାଣ ମିଳିଛି । ମଝିରେ ରହୁଥିବା ଦଲାଲ ଆଉ ଠକମାନେ କିଭଳି ସରକାରଙ୍କ ଏହି ଛତୁଆକୁ ନିମ୍ନ ମାନର କରିଛନ୍ତି, ଆଉ ଆମ ପିଲା ଓ ଗର୍ଭବତୀ ମହିଳ ଅପପୁଷ୍ଟିର ଶିକାର ହେଉଛନ୍ତି, ସିଏଜି ତାର ଠୋସ ପ୍ରମାଣ ପାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅଡିଟ ରିପୋର୍ଟରୁ ଜଣାପଡିଛି, ଛଅ ମାସରୁ ତିନି ବର୍ଷ ଯାଏଁ ଶିଶୁ, ଅତିଶୟ ପୁଷ୍ଟିହୀନ ଶିଶୁ, ଗର୍ଭବତୀ ମହିଳା ଏବଂ ପ୍ରସୁତୀ ମହିଳାଙ୍କୁ ଯୋଗାଯାଉଥିବା ଛତୁଆରେ ଅନିୟମିତତା ହୋଇଛି ଓ ଏହା ନିମ୍ନମାନର । ଛତୁଆ ପ୍ରସ୍ତୁତ ପାଇଁ ସ୍ୱୟଂ ସହାୟକ ଗୋଷ୍ଠୀ ଚୟନରେ ସ୍ୱଛତା ନଥିଲା । ନିୟମ ଅନୁସାରେ ପ୍ରତି ୬ ମାସରେ ଛତୁଆର ଗୁଣବତ୍ତା ପରୀକ୍ଷା ପାଇଁ ନମୁନା ସଂଗ୍ରହ କରିବା କଥା । ଯଦି ରିପୋର୍ଟ ପ୍ରତିକୁଳ ଆସେ ତେବେ ଛତୁଆକୁ ଜବତ କରିବା ସହ ଉକ୍ତ ସଂସ୍ଥାର କାମ ଖାରଜ କରିବା କଥା । ହେଲେ ପ୍ରତି ମାସରେ ଏହି ନିୟମକୁ ପାଳନ କରାଯାଉନଥିଲା । ସେହିଭଳି ଯାଂଚ ରିପୋର୍ଟ ମିଳିବାରେ ବିଳମ୍ବ ହେତୁ ପାଖାପାଖି ୩ କୋଟିର ଛତୁଆକୁ ନଷ୍ଟ କରାଯାଇପାରିନଥିଲା ।
ଅର୍ଥାତ୍ ଏହି ପରିମାଣର ଛତୁଆ ମହିଳା ଓ ଶିଶୁଙ୍କୁ ଦିଆଯାଇଥିଲା, ଯାହାର ମାନ ନିକୃଷ୍ଟ ଥିଲା । ୨୦୧୪ ରୁ ୨୦୧୬ ଭିତରେ ୭୯୨୯ ନମୁନାରୁ ୯୩୫ ନମୁନା ଅର୍ଥାତ୍ ୧୨ ପ୍ରତିଶତ ନିକୃଷ୍ଟ ମାନର ଥିବା ତଥ୍ୟ ମିଳିଛି । ସେହିଭଳି ଛତୁଆ ତିଆରି ସମୟରେ ସିଡିପିଓ/ସୁପରଭାଇଜର୍ ସ୍ୱୟଂ ସହାୟକ ଗୋଷ୍ଠୀ ପରିଦର୍ଶନରେ ଯାଇ ଅନୁଧ୍ୟାନ କରିବାର ଥିଲେ ବି ଏହାକୁ ପାଳନ କରାଯାଉନଥିଲା । ସ୍ୱୟଂ ସହାୟକ ଗୋଷ୍ଠୀଙ୍କୁ କିଭଳି ୭ ଲକ୍ଷ ଟଙ୍କାର ଫାଇଦା ମିଳିଛ, ତାକୁ ମଧ୍ୟ ରିପୋର୍ଟରେ ଉଲ୍ଲେଖ କରାଯାଇଛି । କିଲେ ଛତୁଆରେ ୬୨୫ ଗ୍ରାମ ଗହମ, ୧୨୫ ଗ୍ରାମ ବୁଟଡାଲି, ୯୪ ଗ୍ରାମ୍ ଚିନାବାଦାମ, ୧୫୬ ଗ୍ରାମ ଚିନି ପଡିବା କଥା ।
ହେଲେ ଏହାର ଖିଲାଫ ହୋଇଥିବା କଥା ସ୍ପଷ୍ଟ ଭାବେ ଜଣାପଡୁଛି । କାରଣ କିଛି ସ୍ଥାନରେ ଛତୁଆର ମାନ ନିକୃଷ୍ଟ ଥିବା ପ୍ରମାଣିତ ହୋଇଛି । ରାଜ୍ୟରେ ଗମ୍ଭୀର ଭାବେ ଅପପୁଷ୍ଟିର ଶିକାର ହୋଇଥିବା ଶିଶୁଙ୍କୁ ସଠିକ ଚିକିତ୍ସା ସୁବିଧା ମିଳିନଥିଲା । ଏପରିକି ମାତୃ ଓ ଶିଶୁ ମୃତ୍ୟୁ ହାର ବଢିଚାଲିଥିବା ବେଳେ ରାଜ୍ୟ ସରକାର କୈାଣସି ବାର୍ଷିକ ଯୋଜନା ମଧ୍ୟ କରିନଥିଲେ । ରାଜ୍ୟରେ ନଗଡା ଭଳି ଅଂଚଳରେ ଅପପୁଷ୍ଟିର ଶିକାର ହୋଇ ମୃତ୍ୟୁବରଣ କରୁଥିବା ବେଳେ ସିଏଜିଙ୍କ ଏହି ରିପୋର୍ଟ, ହୋଇଥିବା ବ୍ୟାପକ ଅନିୟମିତତାକୁ ସାମ୍ନାକୁ ଆଣିଛି ।