ଗୋଟିଏ ପଟେ ଡ୍ରାଗନ ସେନା, ଆରପଟେ ଛକି ବସିଛି ପାକିସ୍ତାନ ! ହେଲେ ଯୁଦ୍ଧ ପାଇଁ ଭାରତ ପାଖରେ ନାହିଁ ଗୋଳାବାରୁଦ, ସିଏଜିର ଚାଂଚଲ୍ୟକର ରିପୋର୍ଟ
କନକ ବ୍ୟୁରୋ : ଗୋଟିଏ ପଟେ ଯୁଦ୍ଧ ପାଇଁ ଚୀନର ବାରମ୍ବାର ଧମକ । ଅନ୍ୟପଟେ ସାମନାକୁ ଆସିଲା ସିଏଜିଙ୍କ ଚିନ୍ତାଜନକ ରିପୋର୍ଟ । ଭାରତୀୟ ସେନା ପାଖରେ ଗୁଳି ଗୋଳାର ଅଭାବ, ସଂସଦରେ ଏପରି ଉଦବେଗଜନକ ରିପୋର୍ଟ ଉପସ୍ଥାପନା କରିଛନ୍ତି ସିଏଜି । ଅସ୍ତ୍ରଶସ୍ତ୍ର ବା ଗୋଳା ବାରୁଦର ପରିମାଣ ସଂପର୍କରେ ତଥ୍ୟ ପ୍ରଦାନ କରିଛନ୍ତି ସିଏଜି । ବଡ ଆଶ୍ଚର୍ଯ୍ୟକର କଥା ଏହି ରିପୋର୍ଟରେ ଉଲ୍ଲେଖ ଅଛି ଯେ ଏକ ପୂର୍ଣ୍ଣାଙ୍ଗ ଯୁଦ୍ଧ କରିବା ପାଇଁ ପର୍ଯ୍ୟାପ୍ତ ପରିମାଣର ଗୋଳା ବାରୁଦ ନାହିଁ ଭାରତ ପାଖରେ । ସେନା ପାଖରେ ଖୁବ୍ କମ୍ ପରିମାଣର ଗୋଳା ବାରୁଦ ଥିବା ତଥ୍ୟ ପ୍ରକାଶ ପାଇବା ପରେ ଏ ନେଇ ଆଶଙ୍କା ବଢିଯାଇଛି । ଯେତେବେଳେ ସୀମାରେ ଦୁଇ ପଡୋଶୀଙ୍କ ସହ ଛକାପଂଝା ଚରମ ସୀମାରେ ପହଁଚିଛି, ସେତେବେଳେ ସିଏଜିଙ୍କ ଏପରି ରିପୋର୍ଟ ଚିନ୍ତା ବଢାଇ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ଣ୍ଣାଙ୍ଗ ଲଢେଇ ହେଲେ ଦେଶ ପାଖରେ ସର୍ବନିମ୍ନ ୪୦ ଦିନ ପର୍ଯ୍ୟନ୍ତ ଲଢିବାକୁ ଅସ୍ତ୍ରଶସ୍ତ୍ର ବା ଗୋଳା ବାରୁଦ ମହଜୁଦ ରହିବା ଆବଶ୍ୟକ । ହେଲେ ସିଏଜି କହିଛି ଯଦି ଲଗାତର ୧୦ଦିନ ପର୍ଯ୍ୟନ୍ତ ଯୁଦ୍ଧ କରିବାକୁ ପଡେ ତେବେ ଭାରତୀୟ ସେନା ପାଖରେ ଥିବା ଆମୁନେସନ୍ ଶେଷ ହୋଇଯିବ । ଯାହାକୁ ଖଣ୍ଡନ କରିଛନ୍ତି ପ୍ରତିରକ୍ଷା ବିଶେଷଜ୍ଞ ।
ସିଏଜି ଦର୍ଶାଇଛନ୍ତି ୪୦ ପ୍ରତିଶତ ଅସ୍ତ୍ରଶସ୍ତ୍ର ଅତି ସଂକଟଜନକ ସ୍ଥିତିରେ ରହିଛି । ଯେତିକି ଷ୍ଟକ ରହିଛି, ଯୁଦ୍ଧ ହେଲେ ମାତ୍ର ୧୦ ଦିନରେ ନିଅଂଟ ପଡିବ । ସେହିପରି ୫୫ ପ୍ରତିଶତ ପ୍ରକାର ଅସ୍ତ୍ରଶସ୍ତ୍ର ସର୍ବନିମ୍ନ ଗ୍ରହଣୀୟ ରିସ୍କ ସ୍ତରରୁ ବି କମ୍ ରହିଛି ।