୪ ସେପ୍ଟେମ୍ବର ପୂର୍ବରୁ ବଦଳିବ ମୋଦି କ୍ୟାବିନେଟର ଚେହେରା ! ନିର୍ବାଚନକୁ ଆଖି ଆଗରେ ରଖି ହୋଇପାରେ ପୁନର୍ବିନ୍ୟାସ
କନକ ବ୍ୟୁରୋ : ମଉକା ଦେଖି ଚଉକା ମାରିଛନ୍ତି ମୋଦି । ରାଜନୀତିର ପଶାପାଲିରେ କେତେବେଳେ କେଉଁ ସମୟରେ କେଉଁ ଗୋଟି ଚାଳନା କରିବାକୁ ପଡେ ତାହା ମୋଦିଙ୍କଠାରୁ ଭଲ କେହି ଜାଣିନଥିବେ । ଆଉ ଏହାର ଏକ ଉଦାହରଣ ଏବେ ଆସିଛି ସାମ୍ନାକୁ । ସମୟ ପୂର୍ବରୁ ମୋଦି କ୍ୟାବିନେଟରେ ହୋଇପାରେ ଅଦଳ ବଦଳ । ୨୦୧୯ ନିର୍ବାଚନ ଏବଂ ସୁରେଶ ପ୍ରଭୁଙ୍କ ଇସ୍ତଫାକୁ ଆଖି ଆଗରେ ରଖି କେନ୍ଦ୍ର ସରକାର ୪ ସେପ୍ଟେମ୍ବର ପୂର୍ବରୁ ମନ୍ତ୍ରୀମଣ୍ଡଳରେ କରିପାରନ୍ତି ବଡ ଧରଣର ଅଦଳ ବଦଳ । ଆଉ ଏହି ଅଦଳ ବଦଳ ସୁରେଶ ପ୍ରଭୁଙ୍କ କରିପାରେ ଛୁଟି । ଅର୍ଥାତ୍ ସରକାର ରେଳମନ୍ତ୍ରୀଙ୍କ ଇସ୍ତଫାକୁ ଟ୍ରେନ୍ ଦୁର୍ଘଟଣା ସହ ଯୋଡିବାକୁ ଚାହୁଁନାହାନ୍ତି । ବରଂ ଏପରି କରି ଜଣାଇବାକୁ ଚାହୁଁଛନ୍ତି ବିଭାଗ ପରିବର୍ତ୍ତନ ଯୋଗୁଁ ସୁରେଶ ପ୍ରଭୁଙ୍କୁ ହଟାଗଲା ।
Kanak News is now on WhatsApp
Join and get latest news updates delivered to you via WhatsApp
ବର୍ତ୍ତମାନ ମୋଦି ସରକାରଙ୍କ ପାଖରେ ଏମିତି କିଛି ମନ୍ତ୍ରୀ ଅଛନ୍ତି ଯାହାଙ୍କ ପାଖରେ ଏକାଧିକ ଗୁରୁତ୍ୱପୂର୍ଣ୍ଣ ମନ୍ତ୍ରାଳୟ ରହିଛି । ଯେମିତି କି ଅରୁଣ ଜେଟଲୀ । ମନୋହର ପାରିକର ଗୋଆର ମୁଖ୍ୟମନ୍ତ୍ରୀ ହେବା ପରେ ଅରୁଣ ଜେଟଲୀଙ୍କ ହାତରେ ଅର୍ଥ ବିଭାଗ ଏବଂ ରକ୍ଷା ମନ୍ତ୍ରାଳୟ ଭଳି ଦୁଇଟି ବଡ ବିଭାଗ ରହିଛି । ହେଲେ ବର୍ତ୍ତମାନ ପରିସ୍ଥିତିରେ ଯେଉଁଭଳି ଭାବରେ ଚୀନ୍ ଚିନ୍ତା ବଢାଇଛି ତାକୁ ସେଥିପାଇଁ ଜଣେ ଫୁଲ୍ ଟାଇମ୍ ରକ୍ଷା ମନ୍ତ୍ରୀ ଆବଶ୍ୟକ କରୁଛି ଦେଶ ।
ଅନ୍ୟପଟେ ଭେଙ୍କେୟା ନାଇଡୁ ଉପରାଷ୍ଟ୍ରପତି ହୋଇଯିବା ପରେ ସୂଚନା ଏବଂ ପ୍ରସାରଣ ବିଭାଗ ସହ ସହର ବିକାଶ ମନ୍ତ୍ରାଳୟ ଖାଲି ପଡିଥିଲା । ତେବେ ସହାରୀ ବିକାଶ ମନ୍ତ୍ରାଳୟ ନରେନ୍ଦ୍ର ସିଂହ ତୋମରଙ୍କୁ ମିଳିବା ପରେ ଏବେ ତାଙ୍କ ହାତରେ ରହିଛି ୫ଟି ବିଭାଗ । ସେହିପରି ସ୍ମୃତି ଇରାନୀଙ୍କ ହାତରେ ରହିଛି ଦୁଇଟି ବିଭାଗର ଭାର ।
ହେଲେ ବର୍ତ୍ତମାନ ସମୟରେ ସବୁଠାରୁ ଗୁରୁତ୍ୱପୂର୍ଣ୍ଣ ବିଭାଗ ହେଉଛି ରକ୍ଷା ମନ୍ତ୍ରାଳୟ ଏବଂ ରେଳ ମନ୍ତ୍ରାଳୟ । ଆଉ ଅଦଳ ବଦଳରେ ସମୟରେ ଏହି ଦୁଇ ବିଭାଗରେ ରହିବ ସମସ୍ତଙ୍କ ନଜର । ସୁରେଶ ପ୍ରଭୁଙ୍କ ପରେ କିଏ ହେବ ଦେଶର ଆଗାମୀ ରେଳମନ୍ତ୍ରୀ ତାହା ଉପରେ ତ ସମସ୍ତଙ୍କ ନଜର ରହିବ ହିଁ । ହେଲେ ଚୀନର ବିବାଦ ପରେ ପୁରା ଦେଶର ନଜରକୁ ଆସି ଯାଇଛି ରକ୍ଷା ବିଭାଗ । ଏବେ ଦେଖିବାକୁ ବାକି ରହିଛି ଅରୁଣ ଜେଟଲୀଙ୍କ ଠାରୁ କେଉଁ ବିଭାଗ ଫେରାଇନେବେ ମୋଦି ।
ତେବେ ଆଗାମୀ ୨୦୧୯ ନିର୍ବାଚନକୁ ଆଖି ଆଗରେ ରଖି ଏହି ଅଦଳ ବଦଳ କରାଯାଉଥିବାର ସୂଚନା ମିଳିଛି । ରକ୍ଷା ମନ୍ତ୍ରାଳୟ ସହ ଚାରିଟି ଗୁରୁତ୍ୱପୂର୍ଣ୍ଣ ବିଭାଗର ଭାଗ୍ୟ ନିର୍ଦ୍ଧାରଣ କରିବ ଏହି ଅଦଳ ବଦଳ । ଏହା ସହ କାମ କରୁଥିବା ମନ୍ତ୍ରୀ ମାନଙ୍କର ମଧ୍ୟ ହୋଇପାରେ ଛୁଟି । ଆସନ୍ତା ଦୁଇ ବର୍ଷ ମଧ୍ୟରେ ଓଡିଶା, ଆନ୍ଧ୍ର ପ୍ରଦେଶ ଏବଂ କର୍ଣ୍ଣାଟକ ହେବ ନିର୍ବାଚନ । ତେଣୁ ଲୋକସଭା ନିର୍ବାଚନକୁ ଆଖି ଆଗରେ ରଖି ମୋଦିଙ୍କ କ୍ୟାବିନେଟରେ କିଛି ଦକ୍ଷିଣ ଚେହେରା ମଧ୍ୟ ନଜର ଆସି ପାରନ୍ତି । ତେବେ ୨୦୧୯ ନିର୍ବାଚନ ପୂର୍ବରୁ ଏହା ଅନ୍ତିମ ପରିବର୍ତ୍ତନ ବୋଲି ପ୍ରମାଣିତ ହୋଇପାରେ ।