କିଏ ହେବେ ମୋଦିଙ୍କ ମନ୍ତ୍ରୀ ! କାଲି କେନ୍ଦ୍ର ମନ୍ତ୍ରିମଣ୍ଡଳରେ ବଡଧରଣର ପରିବର୍ତ୍ତନ, ଗୁଡବୁକରେ ଧର୍ମେନ୍ଦ୍ର ପ୍ରଧାନ
କନକ ବ୍ୟୁରୋ : ଆସନ୍ତାକାଲି ବଦଳିଯିବ ମୋଦି କ୍ୟାବିନେଟର ସ୍ୱରୂପ । ମୋଦି କ୍ଷମତାକୁ ଆସିବା ପରେ ତୃତୀୟ ଥର ପାଇଁ ମନ୍ତ୍ରିମଣ୍ଡଳରେ ପରିବର୍ତ୍ତନ ହେଉଥିବା ବେଳେ କୁହାଯାଉଛି, ୨୦୧୯ ନିର୍ବାଚନ ପୂର୍ବରୁ ଏହା ଶେଷ ପ୍ରୟାସ । ଆଉ ଏଥିପାଇଁ ପ୍ରସ୍ତୁତ ରହିଛି ରାଷ୍ଟ୍ରପତି ଭବନ । ବିଜେପିର ଦୁଇ କିଙ୍ଗ ମେକର ଅମିତ ଶାହା ଏବଂ ନରେନ୍ଦ୍ର ମୋଦି ଚୁଡାନ୍ତ କରିଛନ୍ତି, ନୂଆ କ୍ୟାବିନେଟର ସ୍ୱରୁପ । ଆସନ୍ତାକାଲି ୧୦ଟା ବେଳେ ହେବ ନୂଆ ମନ୍ତ୍ରିମଣ୍ଡଳର ଶପଥ ଗ୍ରହଣ । ଆଉ ଏସବୁ ଭିତରେ କିଏ, କେଉଁ ମନ୍ତ୍ରୀ ହେବ ତାକୁ ନେଇ ଜୋରଦାର ଚର୍ଚ୍ଚା । ମୋଦିଙ୍କ ଗୁଡବୁକରେ ଥିବା ଧର୍ମେନ୍ଦ୍ର ପ୍ରଧାନଙ୍କୁ ମିଳିପାରେ ଏକ ଗୁରୁତ୍ୱପୂର୍ଣ୍ଣ ବିଭାଗ । ଆଉ କୁହାଯାଉଛି ଏହି ନୂଆ ମନ୍ତ୍ରିମଣ୍ଡଳରେ ପ୍ରାୟ ଡଜନେ ନୂଆମନ୍ତ୍ରୀ ସାମିଲ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚର୍ଚ୍ଚା ହେଉଛି ମୋଦିଙ୍କ ନୂଆ ଟିମରେ ସାମିଲ ହେବାକୁ ଯାଉଛନ୍ତି ପ୍ରାୟ ଗୋଟିଏ ଡଜନ୍ ନୂଆ ଚେହେରା ।୨୦୧୯ ନିର୍ବାଚନକୁ ଦୃଷ୍ଟିରେ ରଖି ମନ୍ତ୍ରୀମଣ୍ଡଳର ସ୍ୱରପ ନିର୍ଦ୍ଧାରଣ କରିଛନ୍ତି ମୋଦି-ଶାହା ଯୋଡ଼ି । ଆଉ ଏହି ତାଲିକାରେ ରାଜସ୍ତାନର ଯୁବ ନେତା ସିପି ଯୋଶୀ, କର୍ଣ୍ଣାଟକର ଲିଙ୍ଗାୟତ ସଂପ୍ରଦାୟର ନେତା ସୁରେଶ ଅଙ୍ଗାଡି, ଦିଲ୍ଲୀର ପ୍ରବେଶ ବର୍ମାଙ୍କ ଭଳି ଚେହେରା, ମନ୍ତ୍ରୀମଣ୍ଡଳରେ ସ୍ଥାନ ପାଇବା ନେଇ ଚର୍ଚ୍ଚା ହେଉଛି ।
ଏସବୁ ଭିତରେ ଏନଡିଏ ସହଯୋଗୀ ଦଳକୁ କେମିତି ସନ୍ତୁଷ୍ଟ କରିବେ ମୋଦି, ତାକୁ ନେଇ ଦେଖା ଦେଇଛି ବଡ ପ୍ରଶ୍ନବାଚୀ । କ’ଣ ରହିବ ସହଯୋଗୀ ଦଳର ଭୂମିକା । କୁହାଯାଉଛି-ବିଜେପିର ଅଫରରେ ଖୁସ୍ ନାହାଁନ୍ତି ଜେଡିୟୁ ମୁଖ୍ୟ ନୀତିଶ କୁମାର । ଏମିତିକି ଅମିତ ଶାହା ଏହି ପ୍ରସଙ୍ଗରେ କୌଣସି ଆଲୋଚନା କରିନଥିବା ଖୋଲାଖୋଲି ଦଳୀୟ ନେତା କହିବୁଲୁଛନ୍ତି । ଅନ୍ୟପଟେ ଏଆଇଡିଏମକେ ଦଳୀୟ କନ୍ଦଳ ଭିତରେ ଛନ୍ଦି ହୋଇଥିବାରୁ ଏଯାଏଁ ନିଷ୍ପତି ନେଇପାରିନି, ମୋଦିଙ୍କ ହାତଧରିବ କି ନାହିଁ । ଶିବସେନା କିନ୍ତୁ ମନ୍ତ୍ରୀମଣ୍ଡଳ ଅଦଳବଦଳ ନେଇ କୌଣସି ଦାବି ରଖିନି ।
ଚର୍ଚ୍ଚାରେ ଗୁଡବୁକରେ ଥିବା ୩ ମନ୍ତ୍ରୀ ! ପ୍ରୋଫାଇଲରେ ପ୍ରମୋସନ ନେଇ ଚର୍ଚ୍ଚା :
ମୋଦି ମନ୍ତ୍ରୀମଣ୍ଡଳର ଗୁଟ୍ବୁକ ତାଲିକାରେ ଅଛନ୍ତି ୩ଜଣମନ୍ତ୍ରୀ । ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ମାନବ ସମ୍ବଳ ବିକାଶମନ୍ତ୍ରୀ ପ୍ରକାଶ ଜାଭଡେକର ଏବଂ ଶକ୍ତିମନ୍ତ୍ରୀ ପିୟୁଷ ଗୋୟଲ । ପ୍ରଦର୍ଶନ ଭିତିରେ ଧର୍ମେନ୍ଦ୍ରଙ୍କୁ କ୍ୟାବିନେଟ୍ ପାହ୍ୟା ମିଳିବା ନେଇ ଚର୍ଚ୍ଚା ହେଉଥିବା ବେଳେ ପିୟୁଷ ଗୋୟଲ ଏବଂ ପ୍ରକାଶ ଜାଭଡେକରଙ୍କୁ ମଧ୍ୟ ମିଳିପାରେ ପ୍ରମୋସନ ।
କ’ଣ ହେବ ମନ୍ତ୍ରୀମଣ୍ଡଳର ସ୍ୱରୁପ ! ଛୋଟ କ୍ୟାବିନେଟ ବାଛିବେ କି ମୋଦି :
ମିନିମମ୍ ଗଭମେଂଟ୍, ମେକ୍ସିମମ୍ ଗଭର୍ଣ୍ଣାସର ନାରା ଦେଉଥିବା ମୋଦି, ଏଥର କ’ଣ କରିବେ? ବର୍ତମାନ ମନ୍ତ୍ରୀମଣ୍ଡଳର ସଂଖ୍ୟା ୭୩ ଥିବା ବେଳେ ଏହାକୁ ସର୍ବାଧିକ ୮୧ ଯାଏଁ ବଢ଼ାଯାଇପାରିବ । ପୂର୍ବରୁ ଦୁଇ ଦୁଇ ଥର ମନ୍ତ୍ରୀମଣ୍ଡଳ ଅଦଳବଦଳ ବେଳେ ଏହି ସଂଖ୍ୟାକୁ ସୀମିତ ରଖିଥିଲେ ମୋଦି ସରକାର । ତେଣୁ ସମସ୍ତଙ୍କ ନଜର ଏଥର କଣ କରିବେ ।
୨୦୧୪ରେ ମୋଦି କ୍ଷମତାକୁ ଆସିବା ପରେ ଏହା ହେଉଛି ତୃତୀୟ ମନ୍ତ୍ରୀମଣ୍ଡଳ ଅଦଳବଦଳ । ଆଉ ୨୦୧୯ ନିର୍ବାଚନ ପୂର୍ବରୁ ହୁଏତ ମନ୍ତ୍ରୀମଣ୍ଡଳ ଅଦଳବଦଳର ଏହା ଶେଷ ପ୍ରୟାସ । ତେଣୁ ଏବେ ସମସ୍ତଙ୍କ ନଜର କାହାକୁ କେଉଁ ବିଭାଗର ଦାୟିତ୍ୱ ମିଳୁଛି । ଆଉ ମାତ୍ର ଗୋଟିଏ ଦିନ ପରେ ସ୍ପଷ୍ଟ ହୋଇଯିବ ଚିତ୍ର ।