କନ୍ୟାପିତାର ବଡ ହୃଦୟ ! ଝିଅ ବାହାଘରେ ଗରିବଙ୍କୁ ଦାନ କଲେ ୯୦ଟି ଘର
ବିଜେପି ମନ୍ତ୍ରୀ ଜନାର୍ଦ୍ଦନ ରେଡ୍ଡୀଙ୍କ ପରେ ଏବେ ଔରଙ୍ଗାବାଦର ଜଣେ ବ୍ୟବସାୟୀ ନିଜ ଝିଅ ବାହାଘର ପାଇଁ ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି । ହେଲେ ଜନାର୍ଦ୍ଦନଙ୍କ ପରି ୫୦୦ କୋଟି ଟଙ୍କା ଖର୍ଚ୍ଚ କରି ନୁହେଁ ବରଂ ଗରିବଙ୍କ ମୁହଁରେ ହସ ଫୁଟାଇ । ମନୋଜ ମୁନୋଟ ନାମକ ଏହି ବ୍ୟବସାୟୀ ଝିଅ ବାହାଘର ଉପଲକ୍ଷେ ୯୦ ଜଣ ଗୃହହୀନଙ୍କୁ ଘର ପ୍ରଦାନ କରି ସୃଷ୍ଟି କରିଛନ୍ତି ଏକ ନିଆରା ଉଦାହରଣ । ଏଥିପାଇଁ କଲୋନୀ ସଦୃଶ ୯୦ଟି ଘର ନିର୍ମାଣ କରାଯାଇଛି । ଯେଉଁଥିରେ ୯୦ଟି ଗରିବ ପରିବାର ରହିବେ ।
Kanak News is now on WhatsApp
Join and get latest news updates delivered to you via WhatsApp
କୋଟି କୋଟି ଟଙ୍କା ଖର୍ଚ୍ଚ କରି ଧୁମଧାମରେ ଝିଅକୁ ବିଦା କରିବାକୁ ଲକ୍ଷ୍ୟ ରଖିଥିବା ମନୋଜ ହଠାତ୍ ବିବାହ ପୂର୍ବରୁ ନିଜ ନିଷ୍ପତି ବଦଳାଇଥିଲେ । ଆଉ ପ୍ରାୟ ୧.୫୦ କୋଟି ଟଙ୍କା ଖର୍ଚ୍ଚ କରି ବାସହରା ମାନଙ୍କ ପାଇଁ ହସ କିଣିବାକୁ ଏହି ପଦକ୍ଷେପ ନେଇଥିଲେ । ସେପଟେ ବାପାଙ୍କ ଏହି ନିଷ୍ପତିରେ ଖୁସି ଥିବା ଝିଅ କହିଛନ୍ତି ଏହା ହେଉଛି ତାଙ୍କ ପାଇଁ ସବୁଠାରୁ ବଡ ଉପହାର । ତେବେ ଝିଅ ଦାନ ସହ ଆଉ ଏକ ପୁଣ୍ୟ କାମ କରି ଥିବାରୁ ଚର୍ଚ୍ଚାରେ ମନୋଜ ।