ବିଏସଏଫ ଯବାନଙ୍କୁ ନୂତନ ତାଲିମ ! ପାକିସ୍ତାନକୁ ମାତ୍ ଦେବା ପାଇଁ ଇସ୍ରାଏଲ ସ୍ନାଇପର୍ ଠାରୁ ତାଲିମ ନେବେ ସେନା ।
ଲାଇନ ଅଫ କଣ୍ଟ୍ରୋଲ (ଏଲ.ଓ.ସି) ଠାରେ ପାକିସ୍ତାନ କୂଟନିତୀ ପ୍ରୟୋଗ କରି ଭାରତୀୟ ବିଏସଏଫ ଯବାନଙ୍କୁ ସ୍ନାଇପିଙ୍ଗ ଜରିଆରେ ଟାର୍ଗେଟ କରୁଥିବା ଦେଖିବାକୁ ମିଳିଛି । ଏହାର ପ୍ରତିଯବାବ ଦେବାପାଇଁ ଭାରତକୁ ମିଳିଛି ଏକ ନୂଆ ଉପାୟ । ଖୁବ ଶୀଘ୍ର ଭାରତୀୟ ବର୍ଡର ସିକ୍ୟୁରିଟି ଫୋର୍ସ ଏବେ ଇସ୍ରାଏଲ ସ୍ନାଇପିଙ୍ଗଙ୍କ ଠାରୁ ପ୍ରଶିକ୍ଷଣ ନେବା ପାଇଁ ନିଷ୍ପତି ନେଇଛନ୍ତି । ଏନେଇ ଗୃହମନ୍ତ୍ରୀ ରାଜନାଥ ସିଂଙ୍କୁ ବିଏସଏଫ ବରିଷ୍ଠ ଅଧିକାରୀ ଏକ ପ୍ରସ୍ତାବ ଚିଠି ମାଧ୍ୟମରେ ଦେଇଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ସ୍ନାଇପର ପ୍ରଶିକ୍ଷଣ ନେବା ପାଇଁ ବିଏସଏଫର କିଛି କମାଣ୍ଡର ଇସ୍ରାଏଲ ସ୍ନାଇପର୍ସଙ୍କ ସହ ଅଭ୍ୟାସ କରିବେ ବୋଲି ସୂଚନା ମିଳିଛି । ଗୃହମନ୍ତ୍ରଣାଳୟରୁ ମଞ୍ଜୁରି ମିଳିବା ପରେ ଆସନ୍ତା ଜୁଲାଇ ୬ ରୁ ୧୧ ତାରିଖ ପର୍ଯ୍ୟନ୍ତ ଇସ୍ରାଏଲରେ ହେବାକୁଥିବା ସ୍ନାଇପର ପ୍ରତିଯୋଗିତାରେ ବିଏସଏଫର ଏକ ଟିମ ଭାଗ ନେବା ପାଇଁ ଇସ୍ରାଏଲ ଯିବ । ସୂଚନା ମୁତାବକ ଯଦି ଏହାକୁ ନେଇ ସମସ୍ତ ପଦକ୍ଷେପ ଉଚିତ୍ ରହେ ତେବେ ଆଗାମୀ ଦିନରେ ବିଏସଏଫର ଦ୍ୱିତୀୟ ଟିମ ଇସ୍ରାଏଲର ସ୍ନାଇପର୍ସ କ୍ୟାମ୍ପକୁ ଯାଇ ତାଲିମ ନେବ ବୋଲି ଜଣାପଡିଲେ ।
ଗୁଇନ୍ଦା ବିଭାଗ ସୂଚନା ଅନୁସାରେ ବର୍ତ୍ତମାନ ଲାଇନ ଅଫ୍ କଣ୍ଟ୍ରୋଲ (ଏଲଓସି) ଠାରେ ପାକିସ୍ତାନର ୧୪୫ରୁ ଅଧିକ ସ୍ନାଇପର୍ସ ମୂତୟନ ଅଛନ୍ତି । ଯେଉଁମାନେ ବର୍ତ୍ତମାନ ଭାରତକୁ ଟାର୍ଗେଟ କରିବା ପାଇଁ ରଣନୀତି ପ୍ରସ୍ତୁତ କରୁଛନ୍ତି ବୋଲି ଗୁଇନ୍ଦା ବିଭାଗକୁ ସୁଚନା ମିଳିଛି । କାରଣ ପାକିସ୍ତାନ ତାର ଦକ୍ଷ ସ୍ନାଇପରମାନଙ୍କୁ ଭିନ୍ନ ଭିନ୍ନ ଡିଓପି ଠାରେ ନିୟୋଜିତ କରିଥିବା ସୁରାଖ ଭାରତୀୟ ଗୁଇନ୍ଦା ବିଭାଗ ହାତରେ ଲାଗିଛି । ପାକିସ୍ତାନ ଏଭଳି ସର୍ପା ସୁଟରଙ୍କ ଜରିଆରେ ପୂର୍ବରୁ ଅନେକଥର ଭାରତୀୟ ବିଏସଏଫ ଯବାନଙ୍କୁ ଟାର୍ଗେଟ କରିବା ପାଇଁ ଉଦ୍ୟମ କରିଛି ।
ଏକ ରିପୋର୍ଟ ମୁତାବକ ଏଲଓସିର ଅପରପକ୍ଷେ ପାକିସ୍ତାନ ଅଧିକୃତ କାଶ୍ମୀର ଠାରେ ପାକିସ୍ତାନୀ ଯବାନ ମଚ୍ଛଳ, ଉରୀ, ତଙ୍ଗଧାର, ପୁଂଛ୍ , ବିମ୍ବର ଗାଲୀ, ରାମପୁର, କୃଷ୍ଣା ଘାଟୀ ଭଳି ସ୍ଥାନରେ ନିଜର ଦକ୍ଷ ସ୍ନାଇପରଙ୍କୁ ନିୟୋଜିତ କରିଛି । ପାକିସ୍ତାନ ଭାରତୀୟ ଜବାନଙ୍କୁ ଗୁଳି କରିବା ପାଇଁ ଏହି ଆତଙ୍କୀ ସ୍ନାଇପର୍ସଙ୍କୁ ୧ଲକ୍ଷ ଟଙ୍କା ମଧ୍ୟ ଦେଉଥିବା ଖବର ମିଳିଛି । କାରଣ ପି.ଓ.କେ କ୍ୟାମ୍ପରେ ଏହି ସ୍ନାଇପର୍ସମାନଙ୍କୁ “ସ୍ପେଶାଲ ଅପରେସନ ଟିମ” ଭଳି ପ୍ରଶିକ୍ଷଣ ଦିଆଯାଇଥାଏ । କେବଳ ବର୍ଡର ଉପରେ ନୁହେଁ ବରଂ ବିଶ୍ୱର ଆତଙ୍କୀ ସଂଗଠନ ଯଥା ଲସ୍କର-ଇ-ତୋଇବା, ଜୈଶ ଏବଂ ହିଜବୁଲ ଭଳି ଆତଙ୍କି ସଂଗଠନରେ ପାକିସ୍ତାନ ଏହି ସ୍ନାଇପର୍ସକୁ ଭର୍ତ୍ତି କରାଉଛି । ତେଣୁ ପାକିସ୍ତାନର ଏଭଳି ଚକ୍ରାନ୍ତକୁ ରୋକିବାକୁ ହେଲେ ଇସ୍ରାଏଲ ସ୍ନାଇପର୍ସଙ୍କ ଭଳି ଭାରତୀୟ ଯବାନଙ୍କୁ ମଧ୍ୟ ଏହାର ତାଲିମ ନେବା ଆବଶ୍ୟକ ହୋଇ ପଡିଛି ।