ବମ୍ବେ ଷ୍ଟକ ଏକ୍ସଚେଞ୍ଜରୁ ବିଦା ହେବେ ୨୦୦ କମ୍ପାନି !
କନକ ବ୍ୟୁରୋ : ବମ୍ବେ ଷ୍ଟକ ଏକ୍ସଚେଞ୍ଜରୁ ତଡା ଖାଇବେ ୨୦୦ କମ୍ପାନୀ । ଚଳିତ ମାସ ୨୩ ତାରିଖରେ ୨୦୦ଟି କଂପାନିକୁ ବମ୍ବେ ଷ୍ଟକ ଏକ୍ସଚେଞ୍ଜ ପକ୍ଷରୁ ଡିଲିଷ୍ଟ୍ (ତାଲିକାରୁ ବାଦ ଦେବା) କରାଯିବ। ଏନେଇ ସୋମବାର ଘୋଷଣା କରିଛି ବିଏସଇ । ଯାହାଫଳରେ ଏହିସବୁ କଂପାନିଗୁଡ଼ିକର ସେୟାର କାରବାର ବନ୍ଦ ହୋଇଯିବ । ଏହି କଂପାନିଗୁଡ଼ିକର ସେୟାର କାରବାର ବିଗତ ୧୦ ବର୍ଷ ଧରି ବନ୍ଦ ରହିଥିବାରୁ ବିଏସ୍ଇ କାର୍ଯ୍ୟାନୁଷ୍ଠାନ ସ୍ୱରୂପ ଏଭଳି ପଦକ୍ଷେପ ଗ୍ରହଣ କରିବାକୁ ନିଷ୍ପତି ନେଇଛି । ବିଏସଇରୁ ବାଦ ପଡିବାକୁ ଥିବା ଏହି ୨୦୦ କଂପାନିର ପ୍ରମୋଟରମାନଙ୍କ ଉପରେ ୧୦ ବର୍ଷ ବାସନ୍ଦ ଲାଗୁ କରାଯିବ । ଫଳରେ ଏହି ସମୟସୀମା ଭିତରେ ସେମାନେ ଷ୍ଟକ ବଜାରରେ ପ୍ରବେଶ କରିପାରିବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଡିଲିଷ୍ଟ୍ ହେବାକୁ ଥିବା କଂପାନିଗୁଡ଼ିକ ଭିତରେ ୟୁରୋଫାର୍ମା ଲାବୋରେଟୋରି, ଏଥେନା ଫାଇନାନ୍ସିଆଲ୍ ସର୍ଭିସେସ୍, ମ୍ୟାଗ୍ନସ୍ ରବର୍ ଇଣ୍ଡଷ୍ଟ୍ରିଜ୍ ଏବଂ ଡୁପଣ୍ଟ୍ ସୁଜ୍ ଭଳି କଂପାନିର ନାମ ରହିଛି । ଅଜଣା କଂପାନି ଜରିଆରେ ମନି ଲଣ୍ଡରିଂ କାମ କରାଯାଉଥିବା ଜଣାପଡ଼ିବା ପରେ ସରକାର ଏଭଳି କଂପାନିଗୁଡ଼ିକ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି । ଅଦୃଶ୍ୟ କଂପାନି ବୋଲି ବିଚାର କରାଯାଉଥିବା ୩୩୧ଟି କଂପାନି ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିକଟରେ ଭାରତୀୟ ପ୍ରତିଭୂତି ଏବଂ ବିନିମୟ ବୋର୍ଡ (ସେବି) ପକ୍ଷରୁ ଦେଶର ଷ୍ଟକ ଏକ୍ସଚେଞ୍ଜଗୁଡ଼ିକୁ ନିର୍ଦ୍ଦେଶ ଦିଆଯାଇଥିଲା । ସେହିପରି କେନ୍ଦ୍ର ସରକାର ୧.୭୫ ଲକ୍ଷ କଂପାନିର ପଞ୍ଜୀକରଣକୁ ରଦ୍ଦ କରିଛନ୍ତି ଯେଉଁମାନେ ଦୀର୍ଘ ଦିନ ଧରି କୌଣସି କାରବାର କରିନାହାନ୍ତି ।