କାହିଁକି କମିଲା ପାସ୍ ହାର ? ଶିକ୍ଷକ ଆନ୍ଦୋଳନର ପଡ଼ିଲା କି ପ୍ରଭାବ ? ତେବେ ପରୀକ୍ଷାର୍ଥୀଙ୍କ ପ୍ରଦର୍ଶନରେ ଅବନ୍ନତି ହେଲା କାହିଁକି
କନକ ବ୍ୟୁରୋ: ଅନେକ ବାଧାବିଘ୍ନ ଭିତରେ ଆଜି ପ୍ରକାଶ ପାଇଛି ମାଟ୍ରିକ୍ ଫଳ । ହେଲେ ଗତବର୍ଷ ତୁଳନାରେ ଚଳିତବର୍ଷର ପରୀକ୍ଷା ଫଳ ଅତ୍ୟନ୍ତ ନୈରାଶ୍ୟଜନକ ରହିଛି । ଗତବର୍ଷ ଅପେକ୍ଷା ଚଳିତବର୍ଷର ପାସ୍ ହାର କମିଥିବା ବେଳେ ଏ-ୱାନ୍ ଗ୍ରେଡ୍ରେ ଉତିର୍ଣ୍ଣ ହୋଇଥିବା ଛାତ୍ରଛାତ୍ରୀଙ୍କ ସଂଖ୍ୟା ବି ଢ଼େର କମିଛି । ନିର୍ଣ୍ଣାରିତ ସମୟରେ ମାଟ୍ରିକ୍ ରେଜଲ୍ଟ ବାହାରିବା ପରୀକ୍ଷାର୍ଥୀଙ୍କୁ ଯେମିତିକ ଉତ୍ସାହିତ କରିଛି, ପରୀକ୍ଷାର ଫଳ, ସେମିତି ଓଡ଼ିଶାବାସୀଙ୍କୁ ଚିନ୍ତାରେ ପକାଇ ଦେଇଛି । କାରଣ ଗତବର୍ଷ ତୁଳନାରେ ବହୁ ଦିଗରେ ପଛରେ ପଡ଼ିଛି ଚଳିତବର୍ଷର ପରୀକ୍ଷା ଫଳ ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷର ମାଟ୍ରିକ୍ ପରୀକ୍ଷା ଫଳ ସହ ଯଦି ଚଳିତବର୍ଷର ରେଜଲ୍ଟକୁ ତୁଳନା କରାଯାଏ, ତେବେ ଅଧିକ ଖୁସି ହେବାର କୌଣସି କାରଣ ନାହିଁ । ବର୍ଷକୁ ବର୍ଷ ପରୀକ୍ଷା ଫଳରେ ସୁଧାର ଆସିବା ବଦଳରେ ଚଳିତବର୍ଷ ଏହାର ବ୍ୟତିକ୍ରମ ଦେଖାଯାଇଛି । କାରଣ ଗତବର୍ଷ ତୁଳନାରେ ଚଳିତବର୍ଷର ରେଜଲ୍ଟ ନୈରାଶ୍ୟଜନକ ରହିଛି । ଗତବର୍ଷ ପାସ୍ ହାର ୮୬.୩୭% ଥିବା ବେଳେ ଚଳିତବର୍ଷ ରହିଛି ୭୬.୨୩% ।
ସେହିପରି ଗତବର୍ଷ ଏ-ୱାନ୍ ଗ୍ରେଡରେ ୨୪୧୭ ଜଣ ପାସ ହୋଇଥିବା ବେଳେ ଚଳିତବର୍ଷ ଏ-ୱାନ ଗ୍ରେଡରେ ପାସ୍ ହୋଇଛନ୍ତି ମାତ୍ର ୧୭୧୫ ଜଣ । ଗତବର୍ଷ ୨୨ଟି ସ୍କୁଲରେ ପରୀକ୍ଷା ଫଳ ଶୂନ ଥିବା ବେଳେ ଚଳିତବର୍ଷ ୩୬ଟି ସ୍କୁଲରେ କେହି ଜଣେ ହେଲେ ପାସ୍ କରିବାରେ ସକ୍ଷମ ହୋଇ ନାହାଁନ୍ତି । ଗତବର୍ଷ କପି କରି ୧୦୭୭ ଜଣ ଧରାପଡ଼ିଥିବା ବେଳେ ଚଳତିବର୍ଷ ୧୩୩୨ ଜଣ ମାଲପ୍ରାକ୍ଟିସ୍ ହୋଇଛନ୍ତି । ଅର୍ଥାତ୍ କପି କରି ପାସ୍ କରିବାକୁ ଉଦ୍ୟମ କରୁଥିବା ଛାତ୍ରଛାତ୍ରୀଙ୍କ ସଂଖ୍ୟା ବି ବଢ଼ିଛି ।
ପରୀକ୍ଷା ଫଳରେ ଏଭଳି ତାରତମ୍ୟ ପାଇଁ ସାଧାରଣତଃ ଦୁଇ-ତିନୋଟି କାରଣକୁ ଦାୟୀ କରାଯାଉଛି । ପ୍ରଥମରେ ଶିକ୍ଷକଙ୍କ ଆନ୍ଦୋଳନ ଯୋଗୁଁ ପିଲାଙ୍କ ପାଠପଢ଼ା ପ୍ରଭାବିତ ହେଉଥିବା ଅଭିଯୋଗ ହେଉଥିବା ବେଳେ ଦ୍ୱିତୀୟରେ ନିଜ ସ୍କୁଲ ବଦଳରେ ଅନ୍ୟ ସ୍କୁଲରେ ପରୀକ୍ଷା ଦେବା ଯୋଗୁଁ ପରୀକ୍ଷାର୍ଥୀ ଚାପରେ ଥିବା କୁହାଯାଉଛି । ତୃତୀୟରେ ପରିଚାଳନାଗତ ତ୍ରୁଟି ବି ଅନ୍ୟ ଏକ ପ୍ରମୁଖ କାରଣ ହୋଇପାରେ । କାରଣ ଯାହା ବି ହେଉ, ପ୍ରକାଶ ପାଇଥିବା ମାଟ୍ରିକ୍ ନିଶ୍ଚିତ ଭାବରେ ପ୍ରସ୍ତୁତି ରହିବାକୁ ଆହ୍ୱାନ ଦେଉଛି ।
ଅନ୍ୟପଟେ, ମାଟ୍ରିକ୍ ପରୀକ୍ଷାରେ ଆଶାନୁରୁପ ଫଳ ନମିଳିବାରୁ ଛାତ୍ରଙ୍କ ଆତ୍ମହତ୍ୟା । ଏଭଳି ଏକ ଅଭାବନୀୟ ଘଟଣା ଘଟିଛି ଯାଜପୁର ଜିଲ୍ଲାରେ । ବରୀ ରତଳାଙ୍ଗ ରତ୍ନେଶ୍ୱର ବିଦ୍ୟାପୀଠର ଛାତ୍ର ପଦ୍ମଲୋଚନ ମଲ୍ଲିକ ଆଜି ଘରେ କୀଟନାଶକ ଔଷଧ ପିଇ ଆତ୍ମହତ୍ୟା କରିଥିବା ଜଣାପଡିଛି । ପଦ୍ମଲୋଚନ ମୋଟ ୨୬୩ ମାର୍କ ରଖିଥିବା ଜଣାପଡିଛି । ମାଟ୍ରିକ ପରିକ୍ଷା ପଂଳ ବାହାରିଥିବା ବେଳେ ଆଶାନୁରୁପ ହୋଇନଥିବାରୁ ମାନସିକ ଭାରସାମ୍ୟ ହରାଇ ଏପରି କରିଥିବା ଜଣାପଡିଛି । ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଅଲିପୁର ଡାକ୍ତରଖାନା ଓ ପରେ ଯାଜପୁର ଟାଉନ ସଦର ମହକୁମା ଚିକିତ୍ସାଳୟକୁ ନିଆଯାଇଥିଲା । ସେଠାରେ ଡାକ୍ତର ମୃତ ଘୋଷଣା କରିଥିଲେ ।