କନକ ବ୍ୟୁରୋ : ଡୋକଲାମ ବିବାଦର ସମାଧାନ ପରେ ବ୍ରିକ୍ସ ସମ୍ମିଳନୀରେ ଯୋଗ ଦେବା ପାଇଁ ପହଁଚଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଚୀନର ବାରଣ ସତ୍ୱେ ପଂଚରାଷ୍ଟ୍ରୀୟ ସମ୍ମିଳନୀରେ ମୋଦି କହିପାରନ୍ତି ସୀମାପାର ଆତଙ୍କବାଦର କାହାଣୀ । ଅନ୍ୟ ୪ ରାଷ୍ଟ୍ରମୁଖ୍ୟଙ୍କ ସମ୍ମୁଖରେ ପଡୋଶୀ ପାକିସ୍ତାନର ମୁଖା ଖୋଲିପାରନ୍ତି ପ୍ରଧାନମନ୍ତ୍ରୀ । ଆୟୋଜକ ଚୀନ କିନ୍ତୁ ଏହି ସମ୍ମିଳନୀ ପୂର୍ବରୁ ପାକିସ୍ତାନ କିମ୍ବା ଆତଙ୍କବାଦ ପ୍ରସଙ୍ଗ ନଉଠାଉବାକୁ ଭାରତକୁ ତାଗିଦ କରିଛି । ଚୀନ କହିଛି, ଏହି ପ୍ରସଙ୍ଗ ଆଲୋଚନା କରିବାର ପ୍ରକୃଷ୍ଟ ସ୍ଥାନ ଏହି ସମ୍ମିଳନୀ ନୁହେଁ । ଏହା ସତ୍ୱେ ମୋଦି କିନ୍ତୁ ପଡୋଶୀର ପ୍ରତାରଣାର କଥା ସମ୍ମିଳନୀରେ ରଖିବେ ବୋଲି ରାଜନୈତିକ ସମୀକ୍ଷକ ମାନେ ଆଶା ରଖିଛନ୍ତି । କାରଣ ଡୋକଲାମରେ କୂଟନୈତିକ ବିଜୟ ଲାଭ କରିବା ପରେ ଭାରତ ତାର ଆଭିମୁଖ୍ୟ ସ୍ପଷ୍ଟ କରିସାରିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଆନ୍ତର୍ଜାତୀୟ କଟକଣା ସତ୍ୱେ ଉତର କୋରିଆ ଉଦଯାପନ ବୋମା ପରୀକ୍ଷା କରିବା ଏବେ ସମଗ୍ର ବିଶ୍ୱକୁ ଚିନ୍ତାରେ ପକାଇଛି । ତେଣୁ ଋଷିଆର ରାଷ୍ଟ୍ରପତି ପୁଟିନ୍ ଏହି ସମ୍ମିଳନୀରେ ଉତର କୋରିଆ ପ୍ରସଙ୍ଗ ଉଠାଇବାର ଯଥେଷ୍ଟ ସମ୍ଭାବନା ରହିଛି, ଯାହା ଚୀନ ରାଷ୍ଟ୍ରପତି ଜିନପିଙ୍ଗଙ୍କ ପାଇଁ ସମସ୍ୟା ସୃଷ୍ଟି କରିପାରେ । କାରଣ ଉଭୟ ପାକିସ୍ତାନ ଓ ଉତରକୋରିଆ ଚୀନ ସହଯୋଗରେ ଭୟଙ୍କର ମାରଣାସ୍ତ୍ର ନିର୍ମାଣ କରୁଛନ୍ତି ।
ଡୋକଲାମ ବିବାଦ ପରେ କିଭଳି ରହିବ ଚୀନ ଓ ଭାରତ ମଧ୍ୟରେ ସଂପର୍କ, ବ୍ରିକ୍ସ ସମ୍ମିଳନୀରେ ଏହାର ଝଲକ ଦେଖିବାକୁ ମିଳିବ । ପ୍ରଧାନମନ୍ତ୍ରୀ ମୋଦି ଚୀନରେ ପହଁଚିବା ପରେ ଭାରତୀୟ କମ୍ୟୁନିଟି ସହ ଆଲୋଚନା କରିଛନ୍ତି ।