କନକ ବ୍ୟୁରୋ: ଓଡ଼ିଶାକୁ ଗେରୁଆ ରଙ୍ଗରେ ରଙ୍ଗୀନ କରିବାକୁ ସ୍ୱପ୍ନ ଦେଖିଥିବା ବିଜେପିର ଆଶା ସବୁ ଭାଙ୍ଗି ଚୁରମାର ହୋଇଯାଇଛି । କାହିଁକି ମିଶନ ୧୨୦ ପୂରଣ ହେଲା ନାହିଁ ସେନେଇ ରାଜ୍ୟ ବିଜେପି କାର୍ଯ୍ୟାଳୟରେ ଚାଲିଛି ପରାଜୟର ପୋଷ୍ଟମର୍ଟମ । ଆଉ ଏହି ସମୀକ୍ଷା ପରେ ବ୍ରଜରାଜନଗରରେ କାହିଁକି ହାରିଲା ବିଜେପି ସେନେଇ ବିସ୍ଫୋରକ ବୟାନ ଦେଇଛନ୍ତି ବିଜେପିର ପରାଜିତ ତଥା ବ୍ରଜରାଜନଗରର ପୂର୍ବତନ ବିଧାୟିକା ରାଧାରାଣୀ ପଣ୍ଡା ।
Kanak News is now on WhatsApp
Join and get latest news updates delivered to you via WhatsApp
ରାଧାରାଣୀ କହିଛନ୍ତି କି, ପରାଜୟର କାରଣ ବହୁତ କିଛି ରହିଛି, ଯେମିତି କି ଭଗବାନୀଙ୍କ ଆଶିର୍ବାଦ ନହେବାରୁ ହାରିଗଲି । ଆଉ ବ୍ରଜରାଜନଗର ବିଜେପିର ଅନ୍ତର୍ଘାତୀ କାର୍ଯ୍ୟ ପାଇଁ ମୁଁ ପରାଜିତ ହୋଇଛି । କାରଣ ଗତଥର ୫୧ ହଜାର ଭୋଟ୍ ନେଇ ବିଜୟୀ ହୋଇଥିଲେ । ତେବେ ଚଳିତଥର ୬୮ ହଜାରରୁ ଅଧିକ ଭୋଟ ପାଇଥିଲେ ବି ପରାଜୟ ହୋଇଛି । ଏନେଇ ରାଜ୍ୟ ନେତୃବୃନ୍ଦଙ୍କୁ ଅବଗତ କରାଇଛି , ସେ ସମୀକ୍ଷା କରିବ ଉଚିତ୍ ନିଷ୍ପତି ନେବେ ବୋଲି କହିଛନ୍ତି ରାଧାରାଣୀ ।
ସେହିପରି ବହୁତ କାରଣ ଅଛି ତେବେ ପ୍ରଥମତଃ କଂଗ୍ରେସ ପ୍ରାର୍ଥୀ ଦେଲାନି । ଏବଂ ସିଧାସଳଖ ବିଜେଡି ବିଜେପି ଲଢେଇ ହେଲା । କଂଗ୍ରେସ ଏବଂ ସିପିଆଇ ମେଂଟ ହେଲା । ଯାହା ଆଉ ଏକ କାରଣ ବୋଲି କହିଛନ୍ତି ରାଧାରାଣୀ । ସେହିପରି ବିଜେଡି ଉପରେ ମଧ୍ୟ ପରାଜୟର ଦୋଷ ଲଦିଛନ୍ତି ରାଧାରାଣୀ । କହିଛନ୍ତି କି, କଂଗ୍ରେସ ଭୋଟକୁ ବିଜେଡି ଅର୍ଥ ବଳରେ କିଣିଲା ଏବଂ ଆମେ ଜାଣି ପାରିଲୁ ନାହିଁ । ସମସ୍ତ ବୁଥ ରିଗିଂ କରାଗଲା । ପୋଲିସ ପ୍ରଶାସନ ମଧ୍ୟ ବିଜେଡି ଇଂଗିତରେ ଚାଲୁଥିଲା ବୋଲି ଏଭଳି ପରାଜୟ ଦେଖିବାକୁ ପଡ଼ିଲା ବୋଲି ଅଭିଯୋଗ ଆଣିଛନ୍ତି ରାଧାରାଣୀ ।