କନକ ବ୍ୟୁରୋ: ପୂର୍ବ ଶତ୍ରୁତାକୁ ନେଇ ସମ୍ବଲପୁରରେ ବୋମାମାଡ଼ । ସମ୍ବଲପୁର ଯୁଯୁମରା ଥାନା ଅନ୍ତର୍ଗତ ଗଡ଼ ଗଡ଼ବାହାଲ ନିକଟରେ ଏହି ବୋମାମାଡ଼ ହୋଇଛି । ଏଥିରେ ୨ ଜଣ ଯୁବକ ଗୁରୁତର ଆହତ ହୋଇଛନ୍ତି । ସେମାନେ ହେଲେ ଯୁଯୁମରା ଥାନା ଅଂଚଳର ସୁଶାନ୍ତ ବାରିକ ଓ ବିହାରୀ ବିଶ୍ୱାଳ । ତାଙ୍କୁ ଗୁରୁତର ଅବସ୍ଥାରେ ସମ୍ବଲପୁର ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଗତକାଲି ସୁଶାନ୍ତ ଓ ବିହାରୀ ସମ୍ବୁଲପୁର ଆସୁଥିବା ବେଳେ ବର୍ଷା ହେବାରୁ ଏକ ଗଛ ତଳେ ଲୁଚିଥିଲେ । ଏହି ସମୟରେ ମୋତିଜିରା ଅଂଚଳର ଫିରୋଜ ଖାନ ପହଂଚି ସୁଶାନ୍ତକୁ ଧମକ ଦେବା ସହ ବୋମାମାଡ଼ କରିଥିବା ଅଭିଯୋଗ ହୋଇଛି । ଏନେଇ ଥାନାରେ ଏତଲା ଦେବା ପରେ ପୋଲିସ ତଦନ୍ତ ଜାରି ରଖିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଡଂଗାପାଳ ଗ୍ରାମର ସୁଶାନ୍ତ ବାରିକ ଯୁଯୁମୁରାରେ ଏକ ଭଡ଼ାଘରେ ରହି ଏକ ସଫାରି ଗାଡ଼ିରେ ଯାତ୍ରୀ ପରିବହନ କରି ଅର୍ଥ ରୋଜଗାର କରିଥାନ୍ତି । ସେହିପରି ସମ୍ବଲପୁର ଭୂତାପଡ଼ାର ଫିରୋଜ ଖାନ ମଧ୍ୟ ନିଜ ସଫାରି ଗାଡ଼ି ସେହି ରାସ୍ତାରେ ଚଳାଇଥାନ୍ତି । ଯାତ୍ରୀ ନେବା ଆଣିବାକୁ କେନ୍ଦ୍ର କରି ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ଫିରୋଜ କୁଆଡ଼େ ତାଙ୍କୁ ଧମକ ଚମକ ଦେଉଥିଲେ । ସୁଶାନ୍ତଙ୍କ ଅଭିଯୋଗକ୍ରମେ କିଛିଦିନ ତଳେ ଯୁଯୁମୁରା ପୁଲିସ୍ ଫିରୋଜକୁ ଗିରଫ କୋର୍ଟଚାଲାଣ କରିଥିଲା । ଫିରୋଜ କୋର୍ଟରୁ ଜାମିନରେ ବାହାରିଛନ୍ତି ।
ଶୁକ୍ରବାର ରାତି ୯ଟାରେ ସୁଶାନ୍ତ ଓ କୋଲ୍ଗାଁ ବିହାରୀ ବିଶ୍ୱାଳ ଭିମଖୋଜ ବ୍ରିଜ୍ ପାଖ ଏକ ଗଛ ତଳେ କଥାବାର୍ତ୍ତା ହେଉଥିଲେ । ଏହି ସମୟରେ ଫିରୋଜ ସେଠାରେ ପହଂଚି ଏକ ହାତବୋମା ଫୁଟାଇ ଫେରାର ହୋଇଯାଇଥିବା ସୁଶାନ୍ତ କହିଛନ୍ତି । ଏଥିରେ ସୁଶାନ୍ତ ଓ ବିହାରୀ ଆହତ ହୋଇ ସଦର ଡାକ୍ତରଖାନାରେ ଚିକିତ୍ସିତ ହୋଇଥିଲେ । ଶନିବାର ସନ୍ଧ୍ୟାରେ ସେମାନେ ଘଟଣା ସଂକ୍ରାନ୍ତରେ ଯୁଯୁମୁରା ଥାନାରେ ଅଭିଯୋଗ କରିଛନ୍ତି ।
ଏ ସଂକ୍ରାନ୍ତରେ ଯୁଯୁମୁରା ଥାନା ଅଧିକାରୀ ବିଶ୍ୱପତି ପଣ୍ଡାଙ୍କୁ ପଚାରିବାରୁ ସେ କହିଲେ, ଅଭିଯୋଗ ମିଳିବା ପରେ ଘଟଣାସ୍ଥଳକୁ ଯାଇ ନିରୀକ୍ଷଣ କରାଯାଇଥିଲା । ମାତ୍ର ବୋମାମାଡ଼ ନେଇ କିଛି ପ୍ରମାଣ ମିଳିପାରି ନାହିଁ । ଆଜି ଆହତମାନଙ୍କୁ ପଚରାଉଚରା କରାଯିବ । ଅଭିଯୁକ୍ତକୁ ଧରିବା ପାଇଁ ଚେଷ୍ଟା କରାଯାଉଛି ବୋଲି ସେ କହିଛନ୍ତି ।