କନକ ବ୍ୟୁରୋ : ରକ୍ତଦାନ ଓ ରକ୍ତ ଗ୍ରୁପ ସଂପର୍କରେ ଆପଣ ଅନେକ କିଛି ଜାଣିଥିବେ । କିନ୍ତୁ ଆମେ ଆପଣଙ୍କୁ ଏମିତି ଏକ ବ୍ଲଡ ଗ୍ରୁପ ବିଷୟରେ ଯାହା ବିଷୟରେ ବୋଧହୁଏ ଆପଣ କେବେ ଶୁଣିନଥିବେ କି ଜାଣିନଥିବେ । ଆଉ ଏହି ବିରଳ ବ୍ଲଡ ଗ୍ରୁପ ହେଉଛି ବମ୍ବେ ଗ୍ରୁପ । ଯାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଗଂଜାମ ଜିଲ୍ଲାର ପାତ୍ରପୁର ବ୍ଲକ ଅଂଚଳର ନାରାୟଣ ରଇତଙ୍କ ପତ୍ନୀଙ୍କୁ ପ୍ରସବ ପାଇଁ ଗୁରୁତର ଅବସ୍ଥାରେ ବ୍ରହ୍ମପୁର ମେଡିକାଲରେ ଭର୍ତି ହୋଇଥିଲେ । ତେବେ ଅପରେସନ ପରେ କନ୍ୟା ସନ୍ତାନ ଜନ୍ମ ହୋଇଥିଲେ ମଧ୍ୟ ଅତ୍ୟଧିକ ରକ୍ତସ୍ରାବ ଯୋଗୁଁ ଗୁରୁତର ହୋଇପଡିଥିଲେ ନାରାୟଣଙ୍କ ପତ୍ନୀ ସବିତା । ତାଙ୍କ ପାଇଁ ରକ୍ତଭଣ୍ଡାରରୁ ରକ୍ତ ଖୋଜିବାରୁ ଜଣାପଡିଲା ଯେ ତାଙ୍କୁ ଏକ ବିରଳ ରକ୍ତ ଗ୍ରୁପର ରକ୍ତ ଆବଶ୍ୟକ । ଏହାର ନାଁ ବମ୍ବେ ବ୍ଲଡ ଗ୍ରୁପ ଏବଂ ବହୁ ଖୋଜାଖୋଜି ପରେ ରାଉରକେଲାର ଦିଲ୍ଲୀପ ବାରିକଙ୍କ ଏହି ସମାନ ବ୍ଲଡ ଗ୍ରୁପ ଥିବା ଜଣାପଡିଲା ଏବଂ ସେ ସୁଦୂର ରାଉରକେଲାରୁ ବ୍ରହ୍ମପୁର ଆସି ରକ୍ତଦାନ କରି ସବିତା ରଇତଙ୍କ ଜୀବନ ବଂଚାଇଛନ୍ତି ।
୧୯୫୨ ମସିହାରେ ତକ୍ରାଳୀନ ବମ୍ବେରେ ଡାକ୍ତର ୱାଇ ଏମ ଭେଣ୍ଡେ ପ୍ରଥମେ ଏକ ଭିନ୍ନ ଧରଣର ରକ୍ତ ଠାବ କରିଥିଲେ । ଏହା ସାଧାରଣ ପରୀକ୍ଷାରେ ଓ ବ୍ଲଡ ଗ୍ରୁପ ପରି ମନେ ହେଲେ ମଧ୍ୟ ତାହା କ୍ରସମ୍ୟାଚିଂରେ ଏହା ତାଠାରୁ ଅଲଗା ବୋଲି ଜଣାପଡିଥିଲା । ତେଣୁ ଏହାକୁ ବମ୍ବେ ବ୍ଲଡ ଗ୍ରୁପ ବା ଏଚଏଚ ବ୍ଲଡ୍ ଗ୍ରୁପ ବୋଲି କୁହାଯାଏ । ତେବେ ହିସାବ ଅନୁସାରେ ଏହା ବେଶ୍ ବିରଳ ରକ୍ତ ଗ୍ରୁପ୍ । ଓଡିଶାରେ ପ୍ରାୟ ୭ ହଜାର ୫ଶହରେ ଜଣେ ଏପରି ରକ୍ତଧାରୀ ଥିବା କୁହାଯାଉଛି ।
ତେବେ ଏଭଳି ବିରଳ ବ୍ଲଡଗ୍ରୁପ ଥିବା ଲୋକଙ୍କ ସହ ନିୟମିତ ଭାବେ ଯୋଗାଯୋଗରେ ରହିଥାନ୍ତି ଡାକ୍ତରଖାନା କର୍ତ୍ତୃପକ୍ଷ । ଯାହାଦ୍ୱାରା ଜରୁରୀକାଳୀନ ସମୟରେ ସେମାନଙ୍କ ଠାରୁ ରକ୍ତ ସଂଗ୍ରହ କରାଯାଇ ଅନ୍ୟ ଲୋକଙ୍କର ଜୀବନ ବଞ୍ଚାଇ ଯାଇପାରିବ । ଆଉ ଏବେ ଏମାନଙ୍କ ସହ ଯୋଗାଯୋଗରେ ରହିବା ପାଇଁ ସୋସିଆଲ ମିଡିଆ ସବୁଠୁ ବଡ ପ୍ଲାଟଫର୍ମ ପାଲଟିଛି ।