ଶବକୁ ନେବା ପାଇଁ ମିଳିଲାନି କାନ୍ଧ ! ଏଚଆଇଭିରେ ଆକ୍ରାନ୍ତଙ୍କ ମୃତ୍ୟୁ ପରେ କାନ୍ଧ ଦେଲେନି ଆତ୍ମୀୟ ସ୍ୱଜନ କି ଗ୍ରାମବାସୀ
କନକ ବ୍ୟୁରୋ : ଶବକୁ ନେବା ପାଇଁ ମିଳିଲାନି କାନ୍ଧ । ଏଚଆଇଭିରେ ଆକ୍ରାନ୍ତଙ୍କ ମୃତ୍ୟୁ ପରେ ଶେଷଯାତ୍ରା ପାଇଁ କାନ୍ଧ ଦେଲେନି ଆତ୍ମୀୟ ସ୍ୱଜନ କି ଗ୍ରାମବାସୀ । ଏଭଳି ଖବର ଆସିଛି ବଲାଙ୍ଗୀର ଜିଲ୍ଲା ଖପ୍ରାଖୋଲ ବ୍ଲକ ଲାଠୋର ଗାଁରୁ । ଏହି ଗାଁର ଜଣେ ଏଚଆଇଭି ଆକ୍ରାନ୍ତ ବ୍ୟକ୍ତି ବଲାଙ୍ଗୀର ମୁଖ୍ୟ ଡାକ୍ତରଖାନାରେ ଚିକିତ୍ସାଧିନ ଅବସ୍ଥାରେ ଆଖି ବୁଜିଛନ୍ତି । ବଂଚିଥିବା ବେଳେ ଜୀବନର ଶେଷ ସଂଗ୍ରାମ ଯାଏଁ ତ କିଛି ସାହାଯ୍ୟ ମିଳିଲା ନାହିଁ, ମୃତ୍ୟୁ ପରେ ବି ଜ୍ଞାତି କୁଟୁମ୍ବଙ୍କ କାନ୍ଧ ମିଳିଲାନି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ଏଚଆଇଭି ଆକ୍ରାନ୍ତ ବ୍ୟକ୍ତିଙ୍କ ମୃତ୍ୟୁ ପରେ ଏକ ଆମ୍ବୁଲାନ୍ସ ଯୋଗେ ମୃତଦେହକୁ ଘରକୁ ଆଣିଥିଲେ ପରିବାର ଲୋକ । ଏ ଖବର ଗାଁରେ ପ୍ରସାରିତ ହେବା ପରେ ମୃତକଙ୍କୁ କାନ୍ଧ ଦେବା ପାଇଁ ସଂପର୍କିୟମାନେ ଆସିନଥିଲେ । ଶବକୁ ମଶାଣିକୁ ନେବା ପାଇଁ ଜ୍ଞାତି ଭାଇ ଆସୁନଥିବା ଜାଣି ମୃତକଙ୍କ ଘରେ ପହଂଚିଥିଲେ ସେହି ଗାଁର ସମାଜସେବୀ ସୁଶିଲ କୁମାର ଅଗ୍ରୱାଲ । ସେଠାରେ ଲୋକଙ୍କୁ ବୁଝାସୁଝା କରିଥିଲେ । ହେଲେ କେହି ନଆସିବାରୁ ନିଜେ ଚାରି ପାଂଚ ଜଣ ଯୁବକଙ୍କୁ ଡାକି ମୃତଦେହ ଶବ ସତ୍କାର କରିଥିଲେ ।