କନକ ବ୍ୟୁରୋ : ଅନ୍ଧକାର ଭିତରକୁ ଠେଲି ହେବାକୁ ଯାଉଛି ମେଧାବୀ ଛାତ୍ରଙ୍କ ଭବିଷ୍ୟତ । ପ୍ରଥମେ ସ୍କୁଲ କର୍ତ୍ତୃପକ୍ଷଙ୍କ ଖାମଖିଆଲ ମନୋଭାବ ଯୋଗୁଁ ବିଦ୍ୟୁତ୍ ତାର ସଂସ୍ପର୍ଶରେ ଆସି ହାତ ହରାଇଥିଲା ସୁବଳ । ଆଉ ଏବେ ପୁଣି ଜିଲ୍ଲା ପ୍ରଶାସନର ମିଛ ପ୍ରତିଶ୍ରୁତି ଯୋଗୁଁ ମାଟ୍ରିକ ପରୀକ୍ଷା ଦେବାରୁ ବଂଚିତ ହୋଇଛି ସୁବଳ । ହାତ ହରାଇଥିବା ଏହି ଛାତ୍ର କିଭଳି ପରୀକ୍ଷା ଦେବ ସେଥିପାଇଁ ଜିଲ୍ଲା ପ୍ରଶାସନ କିମ୍ବା ସ୍କୁଲ କର୍ତ୍ତୃପକ୍ଷ କୌଣସି ପଦକ୍ଷେପ ନେଇ ନାହାଁନ୍ତି ।
Kanak News is now on WhatsApp
Join and get latest news updates delivered to you via WhatsApp
ଯାହା ଫଳରେ ପାଠ ପଢ଼ି ନିଜ ଭବିଷ୍ୟତ ଗଢ଼ିବାର ସ୍ୱପ୍ନ ଦେଖୁଥିବା ସୁବଳଙ୍କର ସବୁ ଆଶା ଧୂଳିସାତ ହେବାକୁ ବସିଛି । ଏପରି ଏକ ହୃଦୟବିଦାରକ ଘଟଣା ଘଟିଛି ବଲାଙ୍ଗୀର ଜିଲ୍ଲା ପୃଥ୍ୱୀରାଜ ବାଳକ ଉଚ୍ଚବିଦ୍ୟାଳୟର ଦଶମ ଶ୍ରେଣୀର ଛାତ୍ର ସୁବଳ ସେଲମାଙ୍କ ସହ । ୨୦୧୬ ମସିହା ଜୁଲାଇ ୫ ତାରିଖ ବିଦ୍ୟାଳୟରେ ଚାଲିଥିଲା ଦ୍ୱିତୀୟ ପିରିୟଡ । କ୍ଲାସ ଚାଲିଥିଲାବେଳେ ଶୌଚ ହେବା ପାଇଁ ଯାଇଥିଲେ ସୁବଳ ।
ସ୍କୁଲରେ ଥିବା ଶୌଚûଳୟରେ ତାଲା ପଡିବା କାରଣରୁ ସ୍କୁଲ ପରିସର ବାହାରକୁ ଯାଇଥିଲେ ସୁବଳ । ଆଉ ଦୁଃର୍ଭାଗ୍ୟବଶତଃ ଏହି ସମୟରେ ବିଦ୍ୟୁତ ତାର ସଂସ୍ପର୍ଶରେ ଆସିଥିଲେ ସୁବଳ । ବିଦ୍ୟୁତ୍ ଆଘାତରେ ସୁବଳର ଡାହାଣ ହାତ ଓ ବାମ ଗୋଡ ଜଳିଯାଇଥିଲା । ଜୀବନ ବଂଚାଇବା ପାଇଁ ଶେଷରେ ସୁବଳର ହାତ ଓ ପାଦ କାଟି ଦିଆଯାଇଥିଲା ।
ପଙ୍ଗୁ ହୋଇଯାଇଥିଲା ସୁବଳ । ଏହି ସମୟରେ ସ୍କୁଲ କର୍ତ୍ତୃପକ୍ଷ ଓ ଜିଲ୍ଲା ପ୍ରଶାସନ ସୁବଳଙ୍କୁ ସମସ୍ତ ପ୍ରକାର ସହଯୋଗ ଯୋଗାଇଦେବେ ବୋଲି ପ୍ରତିଶ୍ରୁତି ଦେଇଥିଲେ । କିନ୍ତୁ ସମୟ ଗଡିବା ସହ ପ୍ରତିଶ୍ରୁତିକୁ ଭୁଲି ଯାଇଛନ୍ତି ଉଭୟ ସ୍କୁଲ ଓ ପ୍ରଶାସନ । ଜିଲ୍ଲା ପ୍ରଶାସନ ଓ ସ୍କୁଲ କର୍ତ୍ତୃପକ୍ଷଙ୍କ ଏଭଳି କାର୍ଯ୍ୟକୁ ବିଭିନ୍ନ ମହଲରୁ ନିନ୍ଦା କରାଯାଇଛି । ଏହା ସହ ଛାତ୍ରର ଭବିଷ୍ୟତ ପ୍ରତି ଦୃଷ୍ଟି ଦେବାକୁ ଦାବି ହେଉଛି ।