ବର୍ଷ ଆରମ୍ଭରୁ ବଡ ଅଘଟଣ । ହୁକିଟୋଲାରୁ ବଣଭୋଜି ସାରି ଫେରୁଥିବା ବେଳେ ବୁଡିଲା ଡଙ୍ଗା, ୧ ମୃତ, ୭ରୁ ଅଧିକ ନିଖୋଜ । ନିଖୋଜଙ୍କ ମଧ୍ୟରେ ଅଧିକାଂଶ ଛୋଟପିଲା
କନକ ବ୍ୟୁରୋ : ବର୍ଷ ଆରମ୍ଭରୁ ବଡ ଅଘଟଣ । ବଣଭୋଜି ସାରି ଫେରୁଥିବା ବେଳେ ମଝି ନଈରେ ବୁଡିଲା ଡଙ୍ଗା । କେନ୍ଦ୍ରାପଡାରୁ ଏଭଳି ଏକ ଦୁଃଖଦ ଘଟଣା ସାମ୍ନାକୁ ଆସିଛି । ଡଙ୍ଗା ବୁଡି ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ୭ରୁ ଅଧିକ ଯାତ୍ରୀ ନିଖୋଜ ଅଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ନୂଆବର୍ଷରେ ବଣଭୋଜି କରିବାକୁ କେନ୍ଦ୍ରାପଡାର ହୁକିଟୋଲାକୁ ପାରାଦ୍ୱୀପ କୁଜଙ୍ଗରୁ ୩୦ରୁ ଅଧିକ ଯାତ୍ରୀ ଆସିଥିଲେ । ତେବେ ବଣଭୋଜି ସାରି ଫେରୁଥିବା ବେଳେ ମହାକାଳପଡା ଠାରେ ମହାନଦୀର ଶାଖା ନଦୀର ବାଲିଘାଟ ନିକଟରେ ଭାରସମ୍ୟ ହରାଇ ଡଙ୍ଗାଟି ବୁଡି ଯାଇଥିଲା । ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ୭ରୁ ଅଧିକ ଯାତ୍ରୀ ନିଖୋଜ ଅଛନ୍ତି । ନିଖୋଜଙ୍କ ମଧ୍ୟରେ ଅଧିକାଂଶ ଛୋଟ ପିଲା ରହିଛନ୍ତି ।
ତେବେ ଡଙ୍ଗା ବୁଡିବା ପରେ ସଙ୍ଗେ ସଙ୍ଗେ ଜିଲ୍ଲା ପ୍ରଶାସନକୁ ଏନେଇ ସୂଚନା ଦେଇଥିଲେ ସ୍ଥାନୀୟ ବାସିନ୍ଦା । ପରେ ମେରାଇନ ଥାନାକୁ ଏ ବାବଦରେ ଜିଲ୍ଲା ପ୍ରଶାସନ ଜଣାଇବା ପରେ ଉଦ୍ଧାରକାର୍ଯ୍ୟ ଆରମ୍ଭ ହୋଇଛି । ସ୍ଥାନୀୟ ବାସିନ୍ଦା ଓ ଅଗ୍ନିଶମ ବିଭାଗ ପକ୍ଷରୁ ଉଦ୍ଧାରକାର୍ଯ୍ୟ ଆରମ୍ଭ କରାଯାଇଛି । ଟର୍ଚ୍ଚ ଓ ସର୍ଚ୍ଚ ଲାଇଟ ଜରିଆରେ ଉଦ୍ଧାର କାର୍ଯ୍ୟ ଜାରି ରହିଛି ।ଉଦ୍ଧାରକାର୍ଯ୍ୟ ପାଇଁ ଏନଡିଆରଏଫ ଟିମର ସହାୟତା ଲୋଡାଯାଇଛି । ଘଟଣାସ୍ଥଳରେ ଜିଲ୍ଲାପାଳ ଓ ଉପଜିଲ୍ଲାପାଳ ଉପସ୍ଥିତ ଅଛନ୍ତି ।