ବୋଲ ମାନିଲାନି ବିଏମଡବ୍ଲ୍ୟୁ : ଜନ୍ମଦିନ ପାଳିବାକୁ ଯାଇଥିବା ବେଳେ ପୁରୀ-କୋଣାର୍କ ମେରାଇନ୍ ଡ୍ରାଇଭରେ ସାଙ୍ଘାତିକ ଦୁର୍ଘଟଣା
କନକ ବ୍ୟୁରୋ : ଚକାଚକ୍ ରାସ୍ତା ଉପରେ ଖିପ୍ର ଗତିରେ ୨ଟି ସୌଖିନ୍ ବିଳାସପୂର୍ଣ୍ଣ କାର ପରସ୍ପର ସହ ପ୍ରତିଯୋଗିତା କରୁଥାନ୍ତି । ଗୋଟିଏ ଥିଲା ବିଏମଡବ୍ଲ୍ୟୁ ଓ ଆଉ ଗୋଟିଏ ଥିଲା ଅଡି କାର । କେତେବେଳେ ଅଡିଟି ଆଗକୁ ଚାଲିଯାଉଥାଏ ତ ଆଉ କେତେବେଳେ ବିଏମଡବ୍ଲ୍ୟୁ ତାକୁ ଅତିକ୍ରମ କରୁଥାଏ । ଦୁଇଟି କାରରେ ଥାନ୍ତି ଜନ୍ମଦିନ ପାଳନ କରିବାକୁ ଯାଉଥିବା ୧୦ଜଣ ସାଙ୍ଗ । ଯୌବନର ଜୋସ୍ ସାଙ୍ଗକୁ ଅତ୍ୟାଧୁନିକ ସୌଖିନ୍ କାରର ବେଗ ସେମାନଙ୍କ ଆନନ୍ଦକୁ ଦ୍ୱିଗୁଣିତ କରିଦେଉଥାଏ । କେହିବି ରେସରୁ ପଛାଇବାକୁ ଚାହୁଁ ନଥିଲେ । ବାଟ ଯେତେ ଆଗକୁ ବଢୁଥାଏ, ଆକ୍ସିରେଲେଟର ଉପରେ ପାଦ ସେତିକି ଜୋରରେ ପଡୁଥାଏ ।
Kanak News is now on WhatsApp
Join and get latest news updates delivered to you via WhatsApp
ଅଡି କାରକୁ ଓଭରଟେକ କରୁଥିବା ବେଳେ, ଡାହାଣ ପଟରେ ଥିବା ଏକ ଗଛରେ ଖୁବ ଜୋରରେ ପିଟି ହୋଇଗଲା ବିଏମଡବ୍ଲ୍ୟୁ । ଜନ୍ମଦିନର ସେଲିବ୍ରେସନର ମାହୋଲ ଉପରେ ହଠାତ୍ ଦୁଃଖର ବାଦଲ ଫାଟି ପଡିଲା । ସାଙ୍ଘାତିକ ଭାବେ ଆହତ ହୋଇଗଲେ କାରରେ ଥିବା ଜଣେ ମହିଳା ବନ୍ଧୁଙ୍କ ସହ ୫ଜଣ । ଖୁବ ଜୋରରେ ଶଦ୍ଦ ହେବା ପରେ, ଘଟଣାସ୍ଥଳକୁ ଦୌଡି ଆସିଥିଲେ କିଛି ଲୋକ । ଗାଡି ଚଲାଉଥିବା ନନ୍ଦ କିଶୋର ମହାପାତ୍ରଙ୍କର ଘଟଣା ସ୍ଥଳରେ ମୃତ୍ୟୁ ହୋଇଗଲା । ଅନ୍ୟ ୪ଜଣଙ୍କୁ ତୁରନ୍ତ ହସ୍ପିଟାଲ ପଠାଇ ଦିଆଗଲା ।
ବିଏମଡବ୍ଲୁ ଫାଇଭ ସିରିଜର ପ୍ରାୟ ୫୦ଲକ୍ଷ ଟଙ୍କାର ଏହି କାରରେ ସୁରକ୍ଷା ପାଇଁ ଜବରଦସ୍ତ ବନ୍ଦୋବସ୍ତ ଥାଏ । ଏପରିକି ୫ଜଣ ଯାକ ଆରୋହୀଙ୍କ ପାଇଁ ଚାରିପଟୁ ବେଲୁନ ପ୍ରୋଟେକସନ ସିଷ୍ଟମ ଅର୍ଥାତ ଏୟାର ବ୍ୟାଗର ବ୍ୟବସ୍ଥା ଥାଏ । ଗାଡି ଦୁର୍ଘଟଣାଗ୍ରସ୍ତ ହୋଇଗଲେ ତୁରନ୍ତ ଏହାର ସେନସର ଏୟାର ବ୍ୟାଗକୁ କାର୍ଯ୍ୟକ୍ଷମ କରିଦେଇଥାଏ । ଏହାଛଡା ଏହି କାରରେ ଥିବା ଇଲେକଟ୍ରୋନିକ ଷ୍ଟେବିଲାଇଜେସନ କଂଟ୍ରୋଲ ସିଷ୍ଟମ ଅତ୍ୟଧିକ ବେଗରେ ମଧ୍ୟ ଭାରସାମ୍ୟ ରକ୍ଷା କରିବାରେ ସହାୟକ ହୁଏ ।
ଏହା ବି ସତ ଯେ ସାଂଘାତିକ ଦୁର୍ଘଟଣା ପରେ ବି ଚାରିଜଣ ମୃତ୍ୟୁ ମୁଖରୁ ବର୍ତି ଯାଇଛନ୍ତି । ସେମାନଙ୍କୁ କଟକ ବଡ ଡାକ୍ତରଖାନାରେ ଚିକିତ୍ସା କରାଯାଉଛି । ଆଶା କରାଯାଉଛି ସେମାନେ ସଙ୍କଟରୁ ବର୍ତିଯିବେ ।