ଆଠଗଡରେ ପୁଣି ହାତୀ ମୃତ୍ୟୁ: ସବରତଇଲା ନିକଟରେ ମୃତ ଦେହ ଠାବ, କାରଣ ଅସ୍ପଷ୍ଟ

ସେପଟେ ସମ୍ବଲପୁରରେ ହାତୀ ଅସୁସ୍ଥ

66

କନକ ବ୍ୟୁରୋ: ଆଠଗଡରେ ପୁଣି ହାତୀ ମୃତ୍ୟୁ । ଆଠଗଡ ରାଜନଗର ରେଞ୍ଜ ଅନ୍ତର୍ଗତ ସବରତଇଲା ନିକଟରେ ଏକ ୭ବର୍ଷର ହାତୀ ମୃତ୍ୟୁ ଦେହ ଠାବ ହୋଇଛି । ସକାଳୁ ସକାଳୁ ହାତୀର ମୃତ ଦେହ ଜଙ୍ଗଲରେ ପଡିଥିବା ଦେଖିବାକୁ ମିଳିଛି । ହାତୀ ମୃତ୍ୟୁ ଖବର ପ୍ରଚାରିତ ହେବା ପରେ ଘଟଣାସ୍ଥଳରେ ଗ୍ରାମବାସୀମାନେ ପହଁଚି ଦେଖିବା ପାଇଁ ଭିଡ ଜମାଇଥିବା ଦେଖିବାକୁ ମିଳିଛି । ଘଟଣାସ୍ଥଳରେ ପହଁଚିଛନ୍ତି ବନବିଭାଗର କର୍ମଚାରୀ  । ହାତୀର କେମିତି ମୃତ୍ୟୁ ହୋଇଛି ସେନେଇ ତଦନ୍ତ ଆରମ୍ଭ କରିଛି । ତେବେ ମୃତ୍ୟୁର କାରଣ ଏଯାଏ ସ୍ପଷ୍ଟ ହୋଇନାହିଁ ।

ସୂଚନା ମୁତାବକ, ଆଜି ସକାଳେ ଆଠଗଡ଼ ବନାଞ୍ଚଳରେ ଏକ ୭ ବର୍ଷର ମାଈ ହାତୀର ମୃତଦେହ ଠାବ କରାଯାଇଛି। ମୃତଦେହ ନିକଟରେ ପ୍ରବଳ ରକ୍ତ ପଡ଼ିଥିବା ବେଳେ  ନିକଟରେ ଏକ କାଠ ମୁଣ୍ଡିଆ ପଡ଼ିଛି। ତେଣୁ ହାତୀଟିକୁ ହତ୍ୟା କରାଯାଇଥିବା ସନ୍ଦେହ କରାଯାଉଛି।

ଅପରପକ୍ଷେ  ହାତୀଟି କୌଣସି କାରଣରୁ ରୋଗାକ୍ରାନ୍ତ ହୋଇ ରକ୍ତବାନ୍ତି କରି ମୃତ୍ୟୁବରଣ କରିଥିବା ବନବିଭାଗ ସନ୍ଦେହ କରୁଛି। ତେବେ ଗତ ୫/୬ ବର୍ଷ ହେବ ଆଠଗଡ଼ ବନାଞ୍ଚଳ ହାତୀଙ୍କ ପାଇଁ ମୃତ୍ୟୁର ଇଲାକା ସାଜିଛି। ଗତ ୬ ବର୍ଷରେ ଶିକାରୀଙ୍କ ଶିକାର, ବିଦ୍ୟୁତ କରେଣ୍ଟ, ଓ ଅନ୍ୟାନ୍ୟଭାବେ କେବଳ ଆଠଗଡ଼ ବନାଞ୍ଚଳରେ ୬୦ରୁ ଅଧିକ ହାତୀଙ୍କର ମୃତ୍ୟୁ ଘଟିସାରିଲାଣି। ଏହାକୁ ନେଇ ପରିବେଶପ୍ରେମୀମାନଙ୍କ ମଧ୍ୟରେ ଗଭୀର ଅସନ୍ତୋଷ ପ୍ରକାଶ ପାଇଛି।

ସେପଟେ ସମ୍ବଲପୁର ଯୁଯୁମୁରା ଅଂଚଳରେ ଏକ ବଡ ହାତୀ ଅସୁସ୍ଥ ହୋଇପଡିଥିବା ଦେଖିବାକୁ ମିଳିଛି । ହାତୀଟିର ପଛ ଗୋଡରେ ଆଘାତ ଲାଗିବା ଯୋଗୁ ସେ ଚାଲିପାରୁନାହିଁ । ଯାହା ଫଳରେ ରାସ୍ତା ପାର ହେବାକୁ ଦୀର୍ଘ ସମୟ ନେଉଛି । ଏପରିକି ରାସ୍ତା ଉପରେ ଅଟକି ଯାଉଛି, ଛୋଟେଇ ଛୋଟେଇ ଯାଉଛି । ହାତୀଟିକୁ ଦେଖିଲେ ଲାଗୁଛି ତାର ପଛ ଗୋଡ ଭାଙ୍ଗି ଯାଇଛି । ହାତୀଟି ୫ଦିନ ହେବ ଅସୁସ୍ଥ ହୋଇଥିବା ସ୍ଥାନୀୟ ଲୋକେ କହିଛନ୍ତି । ହାତୀଟି ରାସ୍ତା ପାର କରିବାକୁ ଦୀର୍ଘ ସମୟ ନେବାରୁ ଉଭୟ ପାଶ୍ୱର୍ରେ ବହୁ ସଂଖ୍ୟାରେ ଗାଡି ଅଟକି ରହିଛି । ବନବିଭାଗ କର୍ମଚାରୀ ପହଁଚି ହାତୀର ଗତିବିଧି ଉପରେ ନଜର ରଖିଥିବା କହିଛନ୍ତି ।

Comments are closed.