ସରକାରୀ ନୀତିନିୟମର ଜଳାଂଜଳି : ନିମ୍ନମାନର ରକ୍ତ ପରୀକ୍ଷା ଯନ୍ତ୍ର କିଣୁଛି ସ୍ୱାସ୍ଥ୍ୟବିଭାଗ
କନକ ବ୍ୟୁରୋ : ସ୍ଥାନ- ବ୍ରହ୍ମପୁର । ତାରିଖ-ଅଗଷ୍ଟ ୨୯ ତାରିଖ । ଅତ୍ୟଧିକ ରକ୍ତ ଆବଶ୍ୟକ କରୁଥିବା ଥାଲାସେମିଆ ରୋଗୀକୁ ଏଚ୍ଆଇଭି ସଂକ୍ରମିତ ରକ୍ତ ଦିଆଯିବା ନେଇ ଆସିଲା ଅଭିଯୋଗ । ୪ ବର୍ଷର ଶିଶୁଟି ବ୍ରହ୍ମପୁର ବଡ଼ ମେଡିକାଲର ବ୍ଲଡ୍ ବ୍ୟାଙ୍କରୁ ୭୧ଟି ରକ୍ତ ନେଇଥିବା ବେଳେ ପରେ ଜଣାପଡ଼ିଲା ରକ୍ତରେ ରହିଛି ଏଚ୍ଆଇଭି ଭୂତାଣୁ । ଜିଲ୍ଲାପାଳଙ୍କ ନିର୍ଦେଶରେ ଏହାର ତଦନ୍ତ କରୁଥିବା ବିଶେଷଜ୍ଞ ଦଳର ରିପୋର୍ଟ ଏପର୍ଯ୍ୟନ୍ତ ପଦାକୁ ଆସିନାହିଁ ।
Kanak News is now on WhatsApp
Join and get latest news updates delivered to you via WhatsApp
ମାତ୍ର ରକ୍ତ ପରୀକ୍ଷାରେ ବ୍ୟବହୃତ ହେଉଥିବା ନ୍ୟୁକ୍ଲିକ୍ ଏସିଡ୍ ଟେଷ୍ଟ ବା ନାଟ୍ ଟେଷ୍ଟ ମେସିନ୍ ନିମ୍ନ ମାନର ହେଲେ ଏଭଳି ଆଶଙ୍କାକୁ ଯେ ଏଡାଇ ହେବ ନାହିଁ ତାହା ଜଣାପଡ଼ିଯାଉଛି । ଗତବର୍ଷ ଅକ୍ଟୋବର ମାସରେ ସ୍ୱାସ୍ଥ୍ୟ ବିଭାଗ ପକ୍ଷରୁ ବିଭିନ୍ନ ସରକାରୀ ବ୍ଲଡ୍ ବ୍ୟାଙ୍କରେ ଏଭଳି ମେସିନ୍ ସ୍ଥାପନ ସଂକ୍ରାନ୍ତ ଟେଣ୍ଡର ଓ ଚୁକ୍ତିକୁ ବାତିଲ କରିଛନ୍ତି ହାଇକୋର୍ଟ ।
୨୦୧୧ ମସିହାରେ ହାଇକୋର୍ଟ ରାଜ୍ୟର ସବୁ ବ୍ଲଡ୍ ବ୍ୟାଙ୍କରେ ଅତ୍ୟାଧୁନିକ ରକ୍ତପରୀକ୍ଷା ମେସିନ୍ ବସାଇବାକୁ ନିର୍ଦେଶ ଦେଇଥିଲେ । ସରକାର ୨୦୧୪ ଏହି ପ୍ରକ୍ରିୟା ଆରମ୍ଭ କରିବା ପରେ ବିଦେଶର ଦୁଇଟି କମ୍ପାନୀ ହୋମୋଜେନୋମିକ୍ସ ଓ ରୋସେ ଟେଣ୍ଡରରେ ଭାଗ ନେଇଥିଲେ । କୌଣସି କାରଣ ନଥାଇ ଟେକନିକାଲ୍ ବିଡରେ ହୋମୋଜେନୋମିକ୍ସକୁ କାଟିଦିଆଯିବା ବେଳେ ରୋସେକୁ ସବୁ ବ୍ଲଡ୍ ବ୍ୟାଙ୍କରେ ମେସିନ୍ ବସାଇବାକୁ ଚୁକ୍ତି କରାଗଲା । ରୋସେ ପାଖରେ ଅତ୍ୟାଧୁନିକ ବ୍ଲଡ୍ ଟେଷ୍ଟିଂ ମେସିନ୍ ଥିବା ବେଳେ ବି ସେ ପୁରୁଣା ସମୟର ମେସିନ୍ ଲଗାଇଥିଲା ।
ଆଉ ଏଥିରେ ପ୍ରାୟ ୩୫ କୋଟି ଟଙ୍କା ଦୁର୍ନୀତି ହୋଇଛି ବୋଲି ଅଭିଯୋଗ ଆସିଥିଲା । ଶେଷରେ ଗତ ମାସ ୧୮ ତାରିଖରେ ହାଇକୋର୍ଟ ଏହି ପ୍ରକ୍ରିୟାକୁ ବେଆଇନ ବୋଲି କହିଥିବା ବେଳେ ପୁଣି ଥରେ ଟେଣ୍ଡର ପ୍ରକ୍ରିୟାକୁ ଶେଷ କରି ଆସନ୍ତା ଅକ୍ଟୋବର ମାସ ପୂର୍ବରୁ ସବୁଠାରୁ ଅତ୍ୟାଧୁନିକ ମେସିନ୍ ଲଗାଇବାକୁ ନିର୍ଦେଶ ଦେଇଛନ୍ତି ।
ବ୍ଲଡ୍ ଟେଷ୍ଟ ମେସିନ୍ ସ୍ଥାପନରେ ବି ଦୁର୍ନୀତିର ଗନ୍ଧ । ଏଭଳି ପ୍ରକ୍ରିୟାରେ ନେତା ଓ ଅଫିସରଙ୍କ ହାତ ଚିକ୍କଣ ହେଉଛି କି? ଭିଜିଲାନ୍ସରେ ଏ ନେଇ ବାରମ୍ବାର ଅଭିଯୋଗ ହେବା ପରେ ବି ଭିଜିଲାନ୍ସ ହାତ ବାନ୍ଧି ବସିଛି ।
ଏହା ସହ ଦେଖନ୍ତୁ ଏହି ଭିଡିଓ –