କାମ କଲାନାହିଁ ସରକାର ବିରୋଧୀ ହାୱା ! ଜିଏସଟି ଓ ବିମୁଦ୍ରାକରଣ ପରି କଡ଼ା ନିଷ୍ପତ୍ତି ବି ବଦଳାଇପାରିଲା ନାହିଁ ଜନମତକୁ , ଗୁଜରାଟରେ ବିଜେପି ପିନ୍ଧିଲା ବିଜୟ ମୁକୁଟ
ଲଗାତାର ଷଷ୍ଠଥର ସରକାର ଗଠିବା ପାଇଁ ଭୋଟ ଦେବାକୁ ଆହ୍ୱାନ ଦେଉଥିଲା ବିଜେପି । ଦୀର୍ଘ ୨୨ ବର୍ଷ ଧରି ୧୯୯୮ରୁ ଶାସନ ଗାଦିରେ ଥିବା ଏହି ଦଳ ପାଇଁ ସବୁଠାରୁ ବଡ ଚ୍ୟାଲେଂଜ ଥିଲା ‘ଆଂଟି ଇନକମ୍ବେନସି’ ଅର୍ଥାତ୍ ବିରୋଧୀ ହାୱାର ସାମ୍ନା କରିବା । ଯେତେବେଳେ ଗୋଟିଏ ସରକାର ଦୀର୍ଘ ସମୟ ଧରି ଶାସନ କ୍ଷମତାରେ ରହିଯାଏ, ତେବେ ସ୍ୱାଭାବିକ ଭାବେ ସେହି ଦଳ ପ୍ରତି ଏକ ବିରୋଧାଭାସ ସୃଷ୍ଟି ହୁଏ । ଏବଂ ନିର୍ବାଚନରେ ଏହା ଶାସକଦଳ ପାଇଁ ସବୁଠାରୁ ବଡ ଅଡୁଆ ସୃଷ୍ଟି କରେ । ଗୁଜରାଟରେ ମଧ୍ୟ ଏହି ଚ୍ୟାଲେଂଜର ସାମ୍ନା କରୁଥିଲା ବିଜେପି ।
Kanak News is now on WhatsApp
Join and get latest news updates delivered to you via WhatsApp
‘ଆଂଟି ଇନକମ୍ବେନସି’ ଅର୍ଥାତ୍ ବିରୋଧୀ ହାୱାର ସଫଳତାର ସହ ସାମ୍ନା କରି ପୁଣି ଥରେ ସରକାର ଗଢିବା ପାଇଁ ଆବଶ୍ୟକ ସଂଖ୍ୟା ପାଇବା ବିଜେପି ଏବଂ ମୋଦିଙ୍କ ପାଇଁ ନିଶ୍ଚୟ ଏକ ଖୁସି ଖବର । କେବଳ ଆଂଟି ଇନକମ୍ବେନ୍ସି ନୁହେଁ, ଏହି ନିର୍ବାଚନରେ ମୋଦିଙ୍କ ଦୁଇଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତିର ପରୀକ୍ଷା ବି ଥିଲା । ସେ ଦୁଇଟି ହେଉଛି, ବିମୁଦ୍ରାୟନ ଓ ଜିଏସଟି ଲାଗୁ କରିବାର ନିଷ୍ପତ୍ତି ।
ପ୍ରଥମେ ପ୍ରଥମେ ଲୋକଙ୍କୁ ଆମୋଦିତ କରିଥିବା ମୋଦିଙ୍କ ଏହି ନିଷ୍ପତ୍ତି, ପରେ ପରେ ସରକାରଙ୍କ ପାଇଁ କଂଟା ପାଲଟିଗଲା । ଯେତେବେଳେ କଳାଟଙ୍କାର କୌଣସି ସୁରାକ୍ ମିଳିଲା ନାହିଁ ଏବଂ ଯେଉଁ ଉଦ୍ଦେଶ୍ୟରେ ସରକାର ଏହି ନିଷ୍ପତ୍ତି ନେଇଥିଲେ ସେଭଳି ଉଦ୍ଦେଶ୍ୟ ସାଧନ ହେଲା ନାହିଁ ସେତେବେଳେ ସରକାରଙ୍କ ନିଷ୍ପତ୍ତି ଉପରେ ପ୍ରଶ୍ନ ଠିଆ ହେଲା । ଆଉ ଗୁଜରାଟ ନିର୍ବାଚନ ଏହାର ଏକ ପରୀକ୍ଷା ଥିଲା କହିଲେ ଭୁଲ ହେବ ନାହିଁ । ଏବଂ ମୋଦି ସେଥିରେ ପାସ୍ କରିଗଲେ ।
ଠିକ୍ ବିମୁଦ୍ରାୟନ ପରି ଜିଏସଟି ଲାଗୁ ପରେ ଗୁଜରାଟର ବ୍ୟବସାୟୀ ବର୍ଗ ସରକାରୀ ଟିକସ୍ ଫାଇଲ୍ ଜାଲରେ ଛନ୍ଦି ହୋଇଗଲେ । କିନ୍ତୁ ଏହି ଫଳାଫଳ ଦର୍ଶାଉଛି, ଯେ ବ୍ୟବସାୟୀବର୍ଗ ବି ମୋଦିଙ୍କୁ ମାଫ୍ କରିଦେଇଛନ୍ତି ।