ବିଜେପି ନେତାଙ୍କ ବଡ଼ ବୟାନ । କାମ ଦେଉନି ମୋଦି-ଶାହାଙ୍କ ଗଣିତ, ଶିବରାଜଙ୍କୁ ଦଳର ଅଧ୍ୟକ୍ଷ ଓ ଗଡ଼କରୀଙ୍କୁ ମିଳୁ ଉପ-ପ୍ରଧାନମନ୍ତ୍ରୀ ଦାୟିତ୍ୱ ।
ଗଡ଼କରୀଙ୍କୁ ଉପ-ପ୍ରଧାନମନ୍ତ୍ରୀ ଓ ଶିବରାଜଙ୍କୁ ଦିଆଯାଉ ବିଜେପି ଅଧ୍ୟକ୍ଷ ଦାୟିତ୍ୱ: ସଂଘପ୍ରିୟ ଗୌତମ
କନକ ବ୍ୟୁରୋ: ଧିରେ ଧିରେ ପଦ୍ମ ଫୁଲରୁ ପାଖୁଡ଼ା ଖସିଲା ଭଳି ଗୋଟିଏ ପରେ ଗୋଟିଏ ରାଜ୍ୟର ଶାସନ ଡ଼ୋରୀ ବିଜେପି ହାତରୁ ଖସିବାରେ ଲାଗିଛି । ଯାହାକୁ ନେଇ କେନ୍ଦ୍ର ବିଜେପି କ୍ୟାମ୍ପରେ ଅସନ୍ତୋଷର ନିଆଁ କୁହୁଳିବାରେ ଲାଗିଲାଣି । ବିଜେପି ନେତାଙ୍କୁ ନାପସନ୍ଦ ମୋଦି-ଶାହାଙ୍କ ଯୋଡ଼ି । ସେଥିପାଇଁ ଶିବରାଜ ସିଂହ ଚୌହ୍ୱାନଙ୍କୁ ଦଳର ରାଷ୍ଟ୍ରୀୟ ଅଧ୍ୟକ୍ଷ ଏବଂ ନିତିନ ଗଡ଼କରୀଙ୍କୁ ଉପ ପ୍ରଧାନମନ୍ତ୍ରୀ କରାଯାଉ ବୋଲି ବିଜେପି ହେଭିୱେଟ ନେତା ସଂଘପ୍ରିୟ ଗୌତମ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ ପାଂଚଟି ରାଜ୍ୟର ବିଧାନସଭା ନିର୍ବାଚନରେ ବିଜେପି ହାରିବା ପରେ ଦଳକୁ ଏବେ ଉପଦେଶ ମିଳିବା ଆରମ୍ଭ ହୋଇ ଗଲାଣି । ତେବେ ଏହାରି ମଧ୍ୟରେ ସକ୍ରିୟ ରାଜନୀତିରୁ ଦୂରରେ ଥିବା ପୂର୍ବତନ କେନ୍ଦ୍ରମନ୍ତ୍ରୀ ଏବଂ ବିଜେପି ନେତା ସଙ୍ଘପ୍ରିୟ ଗୌତମ କହିଛନ୍ତି କି, ବିଜେପିକୁ ୨୦୧୯ରେ ଶାସନରେ ପ୍ରତ୍ୟାବର୍ତନ କରିବା ପାଇଁ ନିଜ କାର୍ୟ୍ୟକଳାପରେ ପରିବର୍ତନ କରିବାକୁ ପଡିବ । ଦଳ ଶାସନରେ ଆସିବା ମୁସ୍କିଲ ହୋଇ ଗଲାଣି । ବିଧାନସଭା ନିର୍ବାଚନରେ ହାରିବା ପରେ ଏବେ ମୋଦୀ ଏବଂ ଶାହାଙ୍କର ଯାଦୁ ଚାଲିବ ନାହିଁ । ତେଣୁ ଏବେ ଶିବରାଜ ସିଂହ ଚୌହ୍ୱାନଙ୍କୁ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଏବଂ ନିତିନଙ୍କୁ ଉପ ପ୍ରଧାନମନ୍ତ୍ରୀ କରାଯାଉ ବୋଲି ଗୌତମ ଏକ ପତ୍ର ଲେଖି କହିଛନ୍ତି । ଯାହା ଏବେ ଦିଲ୍ଲୀ ଦରବାରରୁ ରାଜ୍ୟ ବିଜେପି ଶିବିର ପର୍ଯ୍ୟନ୍ତ ଅସନ୍ତୋଷର ନିଆଁ କୁହୁଳିବାକୁ ଖୋରାକ ଯୋଗାଇଛି ।
କେବଳ ଏତିକି ନୁହେଁ ଯୋଜନା ଆୟୋଗର ନାମ ପରିବର୍ତନ କରିବା, ସିବିଆଇ ଏବଂ ଆରବିଆଇର କାର୍ଯ୍ୟରେ କେନ୍ଦ୍ର ସରକାରଙ୍କ ହସ୍ତକ୍ଷେପ ଘଟଣା ଏବଂ ଉତରାଖଣ୍ଡରେ ରାଷ୍ଟ୍ରପତି ଶାସନ ଲାଗୁ କରିବାକୁ ନେଇ ସରକାରଙ୍କୁ କଡା ସମାଲୋଚନା କରିଛନ୍ତି ଗୌତମ । ଦେଶର ଯୁବକ, କୃଷକ ଏବଂ ଜନତାଙ୍କୁ କରିଥିବା ପ୍ରତିଜ୍ଞାରେ ବିଜେପି ବିଫଳ ହୋଇଥିବା କଥା ସେ କହିଛନ୍ତି । ଏଭଳି ସ୍ଥିତିରେ ବିଜେପିର ବରିଷ୍ଠ ନେତାଙ୍କ ବୟାନ ଆଗକୁ ଆସୁଥିବା ସାଧାରଣ ନିର୍ବାଚନ ପାଇଁ ବିଜେପି ପାଇଁ ଅଡ଼ୁଆ ସୃଷ୍ଟି କରିବ ବୋଲି ରାଜନୀତି ମହଲରେ ଚର୍ଚ୍ଚା ହେଉଛି ।