କନକ ବ୍ୟୁରୋ : ବିଜ୍ଞାପନ ବାବଦରେ ବିଜେପି ଖର୍ଚ୍ଚ କରିଛି ୩ ହଜାର ୭୫୫ କୋଟି ଟଙ୍କା । ଆରଟିଆଇରୁ ମିଳିଥିବା ତଥ୍ୟ କହୁଛି, ସାଢେ ୩ ବର୍ଷରେ ମୋଦି ସରକାର ବିଜ୍ଞାପନ ବାବଦରେ ପାଣି ଭଳି ଟଙ୍କା ଖର୍ଚ କରିଛନ୍ତି । ସର୍ବାଧିକ ଖର୍ଚ ହୋଇଛି ପ୍ରିଣ୍ଟ ମିଡିଆ ବିଜ୍ଞାପନ ବାବଦରେ । ଆହୁରି ଏକ ରୋଚକ ଖବର ହେଉଛି, ଜୁନ ୨୦୧୪ରୁ ଅଗଷ୍ଟ ୨୦୧୬ ଭିତରେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନେଇ ହୋଇଥିବା ବିଜ୍ଞାପନରେ ଖର୍ଚ୍ଚ ହୋଇଛି ୧୧୦୦ କୋଟି ଟଙ୍କା ।
Kanak News is now on WhatsApp
Join and get latest news updates delivered to you via WhatsApp
ଏପ୍ରିଲ ୨୦୧୪ରୁ ଅକ୍ଟୋବର ୨୦୧୭ ।ମୋଦି ସରକାରଙ୍କ ବିଜ୍ଞାପନ ଖର୍ଚ୍ଚ ୩୭୫୫ କୋଟି ଟଙ୍କା ।ଆରଟିଆଇରୁ ମିଳିଥିବା ତଥ୍ୟ ଅନୁସାରେ ସାଢେ ୩ ବର୍ଷରେ ମୋଦି ସରକାର ବିଜ୍ଞାପନ ବାବଦରେ ଆଖିବୁଜା ଖର୍ଚ୍ଚ କରିଛନ୍ତି । ଆରଟିଆଇ ଆକ୍ଟରେ ଆବେଦନ କରିଥିବା ଗ୍ରେଟର ନୋଇଡ଼ାର ଜଣେ ସାମାଜିକ କର୍ମୀଙ୍କୁ ଉତର ଦେଇ ସୂଚନା ଓ ପ୍ରସାରଣ ମନ୍ତ୍ରାଳୟ ବିଜ୍ଞାପନ ଖର୍ଚ୍ଚର ହିସାବ ଦେଇଛି । ଇଲେକ୍ଟ୍ରୋନିକ ମିଡିଆ, ପ୍ରିଂଟ ମିଡିଆ ଓ ଆଉଟ୍ ଡୋର ପବ୍ଲିସିଟିରେ ମୋଦି ସରକାର ଖର୍ଚ୍ଚ କରିଛନ୍ତି ୩୭୫୪ କୋଟି ୬ ଲକ୍ଷ ୨୩ ହଜାର ୬୧୬ ଟଙ୍କା ।
ଇଲେକ୍ଟ୍ରୋନିକ୍ ମିଡିଆରେ ଖର୍ଚ୍ଚ ହୋଇଛି ମୋଟ ୧୬୫୬ କୋଟି ଟଙ୍କା । ସେଥିରେ ରହିଛି ଟେଲିଭିଜନ, କମ୍ୟୁନିଟି ରେଡିଓ, ଡିଜିଟାଲ୍ ସିନେମା, ଇଂଟରନେଟ୍, ଏସଏମଏସ ବାବଦରେ ହୋଇଥିବା ଖର୍ଚ୍ଚ । ତେବେ ପ୍ରିଂଟ ମିଡିଆରେ ଅଧିକ ଖର୍ଚ୍ଚ କରିଛନ୍ତି ମୋଦି ସରକାର । ପ୍ରିଂଟ ମିଡିଆରେ ଖର୍ଚ୍ଚ ହୋଇଛି ୧୬୯୮ କୋଟି ଟଙ୍କା । ସେହିପରି ହୋର୍ଡିଂ, ପୋଷ୍ଟର, ବୁକଲେଟ୍ ଏବଂ କାଲେଣ୍ଡର ଆଦି ଆଉଟଡୋର ପବ୍ଲିସିଟିରେ ଖର୍ଚ୍ଚ ହୋଇଛି ୩୯୯ କୋଟି ଟଙ୍କା ।
ସବୁଠୁ ରୋଚକ କଥା ହେଉଛି, ମୋଦି ସରକାର ପବ୍ଲିସିଟି ବାବଦରେ ଯେତିକି ଖର୍ଚ୍ଚ କରିଛନ୍ତି, କେତେକ ଫ୍ଲାଗସିପ୍ ପ୍ରୋଗ୍ରାମର ବାର୍ଷିକ ବଜେଟ୍ ତା’ଠାରୁ ବହୁତ କମ୍ । ଏପରିକି ପ୍ରଦୂଷଣ ହ୍ରାସ କରିବାକୁ ଗତ ତିନି ବର୍ଷରେ ମାତ୍ର ୫୬ କୋଟି ୮୦ଲକ୍ଷ ଟଙ୍କା ବ୍ୟୟ ବରାଦ କରିଛନ୍ତି ମୋଦି ସରକାର । ଯାହା ଦର୍ଶାଉଛି ମୋଦି ସରକାର ବିଭିନ୍ନ ଯୋଜନା ବାବଦକୁ କମ ଓ ବିଜ୍ଞାପନ ବାବଦରେ ଅଧିକ ଟଙ୍କା ଖର୍ଚ୍ଚ କରୁଛନ୍ତି ।
୨୦୧୬ରେ ମିଳିଥିବା ଆରଟିଆଇ ତଥ୍ୟ କହୁଛି, ଜୁନ ୨୦୧୪ରୁ ଅଗଷ୍ଟ ୨୦୧୬ ଭିତରେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନେଇ ହୋଇଥିବା ବିଜ୍ଞାପନରେ ଖର୍ଚ୍ଚ ହୋଇଛି ୧୧୦୦ କୋଟି ଟଙ୍କା । ପବ୍ଲିସିଟି ବାବଦରେ ମୋଦି ସରକାରଙ୍କ ଖର୍ଚ୍ଚର ହିସାବ, ସୂଚନା ଓ ପ୍ରସାରଣ ମନ୍ତ୍ରାଳୟରୁ ମିଳିବା ପରେ ଆରମ୍ଭ ହୋଇଯାଇଛି ଆଲୋଚନା ଓ ସମାଲୋଚନା । ବିଜେଡି କହିଛି, ଗାଲୁଆଙ୍କ ବାରବାଟୀ ଚାଷ କରୁଛନ୍ତି ମୋଦି । କେବଳ ପ୍ରଚାର ପ୍ରସାର ମାଧ୍ୟମରେ ରାଜନୀତି କରୁଛନ୍ତି ମୋଦି । ସେହିଭଳି କଂଗ୍ରେସ କହିଛି, ଗରିବ ଲୋକଙ୍କ ପଇସାରେ ବିଜ୍ଞାପନ କରିବା ଅତ୍ୟନ୍ତ ଦୁଃଖଦାୟକ ଘଟଣା । ତେବେ ବିଜେପି କହିଛି, ମୋଦି ସରକାରଙ୍କ ଲୋକାଭିମୁଖୀ ଯୋଜନା ବିଷୟରେ ଲୋକଙ୍କୁ ଅବଗତ କରିବା ପାଇଁ ଏଭଳି କରାଯାଉଛି । ଯାହାଫଳରେ ସରକାରଙ୍କ ବିଭିନ୍ନ ଯୋଜନାର ଲାଭ ଉଠାଇପାରିବେ ସାଧାରଣ ଲୋକେ । ତେବେ ପ୍ରଶ୍ନ ଉଠୁଛି ଲୋକଙ୍କ ନିକଟରେ ବିଭିନ୍ନ ଯୋଜନା ପହଞ୍ଚାଇବା ପାଇଁ ବିଜ୍ଞାପନ କଣ ଏକମାତ୍ର ମାଧ୍ୟମ । ନା ଏହାକୁ ଢାଲ କରି ନିଜର ପ୍ରଚାର ପ୍ରସାର କରୁଛନ୍ତି ସରକାର ।