ଶେଷ ହେଲା ବିଜେପିର ମହିଳା ସୁରକ୍ଷା ଯାତ୍ରା ! ବିଜେପି ମହିଳାମୋର୍ଚ୍ଚାର ଅଭିଯୋଗ, ରାଜ୍ୟରେ ଅସୁରକ୍ଷିତ ମହିଳା ।
କନକ ବ୍ୟୁରୋ : ସରିଲା ବିଜେପି ମହିଳା ମୋର୍ଚ୍ଚାର ରାଜ୍ୟବ୍ୟାପୀ ମହିଳା ସୁରକ୍ଷା ଯାତ୍ରା । ଗତ ମେ ୧୭ ତାରିଖରୁ ରାଜ୍ୟରେ ଥିବା ୩୬ଟି ସାଂଗଠନିକ ଜିଲ୍ଲାକୁ ମହିଳା ସୁରକ୍ଷା ଏଜେଣ୍ଡା ନେଇ ବିଭିନ୍ନ କାର୍ଯ୍ୟକ୍ରମ ଜରିଆରେ ସ୍ଥିତି ପରଖିଥଲା ବିଜେପି ମହିଳା ମୋର୍ଚ୍ଚା । ଅଭିଯାନ ସମାପ୍ତି ପରେ ବିଜେପି ମହିଳା ମୋର୍ଚ୍ଚାର ସଭାନେତ୍ରୀ ପ୍ରଭାତୀ ପରିଡା ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । ପ୍ରଭାତୀ ପରିଡାଙ୍କ ଅଭିଯୋଗ ଅନୁସାରେ, ଅନେକ ଥାନାରେ ମହିଳାଙ୍କୁ ଅତ୍ୟାଚାର ହେଉଥିବା ନେଇ ଏତଲା ହେଉଥିଲେ ମଧ୍ୟ ଶାସକ ଦଳର କିଛି ପ୍ରଭାବଶାଳୀ ନେତା ଅପରାଧୀଙ୍କୁ ଘଣ୍ଟ ଘୋଡାଉଛନ୍ତି । ଏପରିକି ରାଜ୍ୟରେ ୫ଶହରୁ ଅଧିକ ପୋଲିସ ଷ୍ଟେସନ ମଧ୍ୟରୁ ୨୭୨ଟି ପୋଲିସ ଷ୍ଟେସନ ପଞ୍ଜୀକୃତ ହୋଇନାହିଁ । ଏଥିରୁ ସ୍ପଷ୍ଟ ପ୍ରମାଣିତ ହେଉଛି ଯେ ରାଜ୍ୟ ସରକାରଙ୍କର ମହିଳାଙ୍କ ପ୍ରତି ଆନ୍ତରିକତା କେତେ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଦୀର୍ଘ ୧୮ ବର୍ଷ ଧରି ଶାସନ କରୁଥବା ନବୀନ ସରକାରଙ୍କ ବିରୋଧରେ ଘୋର ଅସନ୍ତୋଷ ରହିଥିବା ଦେଖିବାକୁ ମିଳିଛି ବୋଲି ପ୍ରଭାତୀ କହିଛନ୍ତି । ଏହି ମହିଳା ସୁରକ୍ଷା ଯାତ୍ରାରେ ବିଜେପି ମହିଳାନେତ୍ରୀମାନେ ଦୁଇଟି ପର୍ଯ୍ୟାୟକ୍ରମେ ସୁରକ୍ଷା ଅଭିଯାନ କରିଥିଲେ । ଯେଉଁଥିରେ ୮ହଜାର ୫ଶହରୁ ଅଧିକ ମହିଳାମାନେ ସାମିଲ ହୋଇଥିଲେ ବୋଲି ପ୍ରଭାତୀ କହିଛନ୍ତି । ତେବେ ମହିଳାଙ୍କ ପ୍ରତି ହେଉଥିବା ଅତ୍ୟାଚାର ପ୍ରମୂଖ କାରଣ ହେଉଛି ମଦ । ଯାହାକି ରାଜ୍ୟର ବିଭିନ୍ନ ଜିଲ୍ଲାରେ ବିନା ଲାଇସେନ୍ସରେ ଶାସକ ଦଳର ମୁଷ୍ଟୀମେୟ ନେତା, ବିଧାୟକଙ୍କ ଛତ୍ରଛାୟା ତଳେ ପରିଚାଳିତ ହେଉଛି । ଗ୍ରାମାଞ୍ଚଳ ଅଧିକ ମଦ୍ୟପ ବଢ଼ୁଥିବା ମହିଳା ନିର୍ଯ୍ୟାତନା ପାଇଁ ରାଜ୍ୟ ସରକାରଙ୍କୁ ଦାୟୀ କରିଛନ୍ତି ପ୍ରଭାତୀ ପରିଡା ।
ଏହି ସୁରକ୍ଷିତ ଯାତ୍ରାରେ ପରିଲକ୍ଷିତ ହୋଇଥିବା ନାରୀ ନିର୍ଯ୍ୟାତନାର ସ୍ୱରକୁ ଅଧିକ ଶାଣିତ କରି ବିଜେପି ମହିଳା ମୋର୍ଚ୍ଚା ରାଜ୍ୟପାଳ, କେନ୍ଦ୍ର ଗୃହମନ୍ତ୍ରୀ ଏବଂ ରାଷ୍ଟ୍ରପତିଙ୍କ ଦୃଷ୍ଟି ଆକର୍ଷଣ କରିବ ବୋଲି କହିଛନ୍ତି ପ୍ରଭାତୀ । ମହିଳାମାନଙ୍କୁ ସୁରକ୍ଷା ଦେବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି ରାଜ୍ୟ ସରକାର । ପୋଲିସ ବି ଶାସକ ଦଳର କର୍ମୀ ପରି ବ୍ୟବହାର କରି ଅପରାଧୀଙ୍କୁ ଘଣ୍ଟଘୋଡାଉଥିବା ଅଭିଯୋଗ କରିଛନ୍ତି ପ୍ରଭାତୀ । ଯଦି ଶାସକ ଦଳର ଏଭଳି ଗୁଣ୍ଡାଗିରି ବଢ଼ିଚାଲିବ ତେବେ ସରକାରଙ୍କ ବିରୋଧରେ ଆଗାମୀ ଦିନରେ ମହିଳାମାନେ ଉଚିତ ଜବାବ ଦେବେ ।