ଓଡିଶା ରାଜ୍ୟପାଳଙ୍କ ବିରୋଧରେ ନାଗାଲାଣ୍ଡ ବିଜେପିର ଅଭିଯୋଗ ! କଂଗ୍ରେସ ଓ ଏନପିଏଫ ମେଂଟ ପାଇଁ ପ୍ରଚାର କରୁଥିବା ଅଭିଯୋଗରେ ନିର୍ବାଚନ କମିଶନଙ୍କୁ ଫେରାଦ ହେଲା ଦଳ
କନକ ବ୍ୟୁରୋ : ଓଡିଶା ରାଜ୍ୟପାଳଙ୍କ ବିରୋଧରେ ନାଗାଲାଣ୍ଡ ବିଜେପିର ଅଭିଯୋଗ । ରାଜ୍ୟପାଳ ଏସସି ଜମିର ନିର୍ବାଚନ ପ୍ରଚାର କରୁଥିବା ଅଭିଯୋଗ ଆଣିଲା ଭାରତୀୟ ଜନତା ପାର୍ଟି । ସମ୍ବାଦ ସରବରାହ ସଂସ୍ଥା ପିଟିଆଇର ସୂଚନା ଅନୁସାରେ ରାଜ୍ୟପାଳ ଏସସି ଜମିର, ନାଗାଲାଣ୍ଡରେ କଂଗ୍ରେସ ଓ ନାଗା ପିପୁଲ୍ସ ଫ୍ରଂଟ ମେଂଟ ସପକ୍ଷରେ ପ୍ରଚାର କରୁଥିବା ବିଜେପି ଅଭିଯୋଗ କରିଛି । ଏନେଇ ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରିଛି ନାଗାଲାଣ୍ଡ ବିଜେପି । କଂଗ୍ରେସ ଓ ଏନପିଏଫର କିଛି ପ୍ରାର୍ଥୀଙ୍କ ପାଇଁ ସେ ସିଧାସଳଖ ପ୍ରଚାର ମୈଦାନକୁ ଓହ୍ଲାଇଥିବା ଦଳ ଅଭିଯୋଗ ଆଣିଛି ।
Kanak News is now on WhatsApp
Join and get latest news updates delivered to you via WhatsApp
ଏକ ସାମ୍ବିଧାନିକ ମୁଖ୍ୟ ପଦବୀରେ ଥିବା ଏସସି ଜମିର, ପ୍ରତ୍ୟକ୍ଷ ରାଜନୀତିରେ ଭାଗନେବା ଗଣତନ୍ତ୍ର ପାଇଁ ବିପଦ ବୋଲି ଦଳ କହିଛି । କୋହିମା ବିଜେପି ଶାଖାର ମିଡିଆ ସେଲ ପକ୍ଷରୁ ପ୍ରକାଶିତ ପ୍ରେସ ରିଲିଜରେ କୁହାଯାଇଛି ଯେ, ରାଜ୍ୟପାଳ ଭାବେ ଶପଥ ନେବା ପରେ କୌଣସି ଦଳୀୟ ବ୍ୟାପାରରେ ହସ୍ତକ୍ଷେପ କରିବା ଉଚିତ ନୁହେଁ । ହେଲେ କଂଗ୍ରେସ ଓ ଏନପିଏଫ ମେଂଟ ପାଇଁ ପ୍ରଚାର କରି ସୁପ୍ରିମକୋର୍ଟଙ୍କ ଗାଇଡଲାଇନକୁ ଏସସି ଜମିର ଉଲ୍ଲଂଘନ କରିଥିବା ଅଭିଯୋଗ କରିଛି ବିଜେପି । ୧୯୮୦ରୁ ୨୦୦୩ ମଧ୍ୟରେ ନାଗାଲାଣ୍ଡରେ ପାଂଚଥର ମୁଖ୍ୟମନ୍ତ୍ରୀ ରହିସାରିଛନ୍ତି ଏହି ପୂର୍ବତନ କଂଗ୍ରେସ ନେତା । ପରେ ମହାରାଷ୍ଟ୍ର, ଗୁଜରାଟ ଓ ଗୋଆରେ ରାଜ୍ୟପାଳ ରହିବା ପରେ ୨୦୧୩ ମାର୍ଚ୍ଚ ୯ରୁ ଓଡିଶା ରାଜ୍ୟପାଳ ଦାୟିତ୍ୱରେ ଅଛନ୍ତି । ନାଗାଲାଣ୍ଡ ବିଧାନସଭା ଲାଗି ଆସନ୍ତା ୨୭ ତାରିଖରେ ଭୋଟ୍ ଗ୍ରହଣ ହେବାକୁ ଯାଉଛି ।