ବିଜେପି ବିଧାୟକଙ୍କ ଗୁଣ୍ଡାଗିରି ! ସର୍ବସମୁଖରେ ମହିଳାଙ୍କୁ ମାଡ ମାରିଲେ ନରୋଦା ବିଧାୟକ, ଭିଡିଓ ଭାଇରାଲା ପରେ ପୀଡିତାଙ୍କ ଠାରୁ ରାକ୍ଷୀ ବାନ୍ଧି କଲେ ଆପୋଷ ସମାଧାନ ।
କନକ ବ୍ୟୁରୋ : ବିଜେପି ବିଧାୟକଙ୍କ ଗୁଣ୍ଡାଗିରି । ବିଚ୍ ରାସ୍ତାରେ ମହିଳାଙ୍କୁ ନିସ୍ତୁକ ମାଡ଼ । ମହିଳାଙ୍କୁ ଆକ୍ରମଣ ହେଉଥିବା ବେଳେ ତାଙ୍କ ଚିତ୍କାର ଉପସ୍ଥିତ ଲୋକଙ୍କ ଲୋମ ଟାଙ୍କୁରେଇ ଦେଇଥିଲା । ଏହି ଘଟଣା ହେଉଛି ଗୁଜରାଟ ନରୋଦା ଅଂଚଳର । ଗୋଇଠା ମାରୁ ଥିବା ଏହି ବ୍ୟକ୍ତି ଜଣକ ହେଉଛନ୍ତି ସ୍ଥାନୀୟ ଶାସକ ବିଜେପିର ବିଧାୟକ ବଳରାମ ଥବାନୀ । ଛାତି ଥରା ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଆଉ ପ୍ରଶ୍ନ ଉଠୁଛି, ମହିଳାଙ୍କୁ ସୁରକ୍ଷା ଓ ସମ୍ମାନର ଦ୍ୱାହି ଦେଉଥିବା ବିଜେପିର ଜଣେ ଲୋକ ପ୍ରତିନିଧି କିଭଳି ଅମାନବୀୟ କାଣ୍ଡ ଭିଆଇଛନ୍ତି ?
Kanak News is now on WhatsApp
Join and get latest news updates delivered to you via WhatsApp
ନିଜ ଅଂଚଳରେ ପାଣିର ସମସ୍ୟା ଥିବା ବେଳେ ଏହାର ସମାଧାନ ପାଇଁ ଅନୁରୋଧ କରିବାକୁ ଏହି ମହିଳା ଜଣକ ଥବାନୀଙ୍କ କାର୍ଯ୍ୟାଳୟକୁ ଆସିଥିଲେ । ତେବେ ତାଙ୍କ ବିଷୟ କିଛି ଶୁଣିବା ଆଗରୁ ବିଧାୟକଙ୍କ ସମର୍ଥକ ଧକ୍କା ମାରି ତଳେ ପକାଇ ଦେଇଥିଲେ ଏବଂ ପରେ ଗୋଇଠା ମାରିବାକୁ ପଛାଇ ନଥିଲେ ଖୋଦ୍ ବିଧାୟକ ।
ସ୍ଥାନୀୟ ଏନସିପିର ଜଣେ କର୍ମୀ ଥିବା ଏହି ମହିଳା ଏବେ ଡାକ୍ତରଖାନାରେ ଭର୍ତି ହୋଇଛନ୍ତି । ଅନ୍ୟ ପଟେ ଏହି ଭିଡିଓ ଭାଇରାଲ ହେବା ପରେ ସାରା ଦେଶରେ ଏବେ ତୀବ୍ର ବିରୋଧ ପ୍ରକାଶ ପାଇଛି । ତେବେ ଏହା ତାଙ୍କର ଭୁଲ ଏବଂ ଏଥି ପାଇଁ ସେ କ୍ଷମା ମାଗୁଛନ୍ତି ବୋଲି ଗଣମାଧ୍ୟମ ଆଗରେ ପ୍ରତିକ୍ରିୟା ରଖିଛନ୍ତି ବିଜେପି ବିଧାୟକ ବଳରାମ ଥବାନୀ ।
ବିଧାୟକଙ୍କ ଏହି ଗୁଣ୍ଡାଗିରିକୁ ନେଇ କଡା ପ୍ରତିକ୍ରିୟା ପ୍ରକାଶ ପାଇଛି । ଗୁଜରାଟ ବଡଗାମ ବିଧାୟକ ଜିଗ୍ନେଶ ମେୱାନୀ ଟ୍ୱିଟ୍ କରି ବିଧାୟକଙ୍କ ଗିରଫ ଦାବି କରିଛନ୍ତି । ଏନେଇ ତାଙ୍କ ବିରୋଧରେ କୌଣସି ମାମଲା ରୁଜୁ ହୋଇ ନଥିବାରୁ ସେ ଅସନ୍ତୋଷ ପ୍ରକାଶ କରିଛନ୍ତି । ଅନ୍ୟପଟେ ଏହି ଘଟଣାକୁ ନେଇ ବିରୋଧୀ କଂଗ୍ରେସ କଡା ସମାଲୋଚନା କରି ବିଜେପିକୁ ଟାର୍ଗେଟ୍ କରିଛି । ଏଭଳି ଘଟଣାକୁ ନିନ୍ଦା କରି ବିଧାୟକଙ୍କୁ ଗିରଫ କରିବାକୁ ଦାବି ଜୋର ଧରିଛି ।
ବଳରାମ ଥବାନୀଙ୍କ ଏହି କାଣ୍ଡକୁ ନେଇ ବିଜେପି ରାଷ୍ଟ୍ରୀୟ ନେତୃମଣ୍ଡଳୀ ହସ୍ତକ୍ଷେପ କରିବାକୁ ଦାବି ହେଉଥିବା ବେଳେ ବିରୋଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ଟାର୍ଗେଟ କରିଛନ୍ତି । ଦଳୀୟ କର୍ମୀଙ୍କୁ ଆକ୍ରମଣ ଘଟଣାକୁ ବିରୋଧ କରି ବିଭିନ୍ନ ସ୍ଥାନରେ ଏନସିପିର ନେତା ଓ କର୍ମୀ ଧାରଣାରେ ବସିଛନ୍ତି । ସେମାନେ ଥବାନୀଙ୍କ ଗିରଫ ଦାବି କରିଛନ୍ତି ।
ଏହି ଘଟଣାକୁ ନେଇ ଚାରିଆଡୁ ବିରୋଧର ସ୍ୱର ତେଜୁଥିବା ବେଳେ ରାସ୍ତା ଉପରେ ମହିଳାଙ୍କୁ ଗୋଇଠା ମାରିଥିବା ବିଜେପି ବିଧାୟକ ମାମଲାକୁ ରଫା ଦଫା କରିଦେଇଛନ୍ତି । ମାଡଖାଇଥିବା ମହିଳା ଓ ମାଡ ମାରିଥିବା ବିଧାୟକ ବଳରାମ ଥୋବନୀଙ୍କ ମଧ୍ୟରେ ଆପୋଷ ସମାଧାନ ହୋଇଛି । ମାଡ ମାରିଥିବା ମହିଳାଙ୍କୁ ସାମ୍ବାଦିକ ସମ୍ମିଳନୀରେ ବସାଇ ତାଙ୍କ ଭିତରେ ଆପୋଷ ସମାଧାନ ହୋଇଥିବା ସେ କହିଛନ୍ତି । ମହିଳା ତାଙ୍କୁ ରାକ୍ଷୀ ବାନ୍ଧି ଭାଇ ମାନିଥିବା ବେଳେ ପରସ୍ପର ମିଠା ଖାଇ ବିବାଦର ସମାଧାନ କରିଛନ୍ତି । ମହିଳାଙ୍କୁ ଗୁଜୁରାଟର ବିଜେପି ବିଧାୟକଙ୍କ ମାଡ ଘଟଣାକୁ ନେଇ ବିରୋଧ ତେଜିବା ପରେ ବିଧାୟକ ଆପୋଷ ସମାଧାନ କରିଛନ୍ତି ।