ଶେଷ ହେଉନି କର୍ଣ୍ଣାଟକ ନାଟକ ! ଜେଡିଏସ ବିଧାୟକଙ୍କ ସାଂଘାତିକ ଅଭିଯୋଗ, ଦଳ ଛାଡିବା ବଦଳରେ ୩୦ କୋଟି ଟଙ୍କାର ଅଫର ଦେଇଥିଲା ବିଜେପି ।
ଶେଷ ହେବାର ନାଁ ଧରୁନି କର୍ଣ୍ଣାଟକ ନାଟକ । ପ୍ରତିଦିନ ଶାସକ ଓ ବିରୋଧୀଙ୍କ ମଧ୍ୟରେ ଚାଲିଛି କାଦୁଅଫିଙ୍ଗା ରାଜନୀତି । କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚଡି କୁମାରସ୍ୱାମୀ ବିଜେପି ପ୍ରଦେଶ ଅଧ୍ୟକ୍ଷ ବିଏସ ୟେଦ୍ୟୁରପ୍ପାଙ୍କ ଅଡିଓ ଟେପ ଜାରି କରିବାର ଗୋଟିଏ ଦିନ ନ ବିତୁଣୁ ପୁଣିଥରେ ବିଜେପି ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ଜେଡିୟସ ବିଧାୟକ ଶ୍ରୀନିବାସ ଗୌଡା । ଜେଡିଏସ ଛାଡିବା ପାଇଁ ତାଙ୍କୁ ୫ କୋଟି ଟଙ୍କା ଅଫର ବିଜେପି ପକ୍ଷରୁ ମିଳିଥିବା କହିଛନ୍ତି ଶ୍ରୀନିବାସ । କିନ୍ତୁ କୁମାରସ୍ୱାମୀଙ୍କ କହିବା ପରେ ସେ ଟଙ୍କା ଫେରାଇ ଦେଇଥିବା କହିଛନ୍ତି ଶ୍ରୀନିବାସ ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ କୁମାରସ୍ୱାମୀ ଅଭିଯୋଗ ଆଣିଥିଲେ ଯେ, ୟେଦ୍ୟୁରପ୍ପା ଜେଡିଏସ ବିଧାୟକଙ୍କୁ ଟଙ୍କା ଦେଇ ଦଳ ପରିବର୍ତ୍ତନ କରାଇବାକୁ ଚେଷ୍ଟା କରାଉଛନ୍ତି । ଏପରିକି ଏହାର ପ୍ରମାଣ ଦେବାକୁ ଯାଇ ଏକ ଅଡିଓ କ୍ଲିପ ମଧ୍ୟ ଜାରି କରିଥିଲେ କୁମାରସ୍ୱାମୀ । ଏଥିରେ ୟେଦ୍ୟୁରପ୍ପା ଜେଡିଏସ ବିଧାୟକଙ୍କୁ ୨୫ ଲକ୍ଷ ଟଙ୍କା ଓ ମନ୍ତ୍ରୀ ପଦ ବଦଳରେ ପାର୍ଟି ଛାଡିବାକୁ ଅଫର ଦେଉଛନ୍ତି ।
ଶ୍ରୀନିବାସ କହିଛନ୍ତି, ବିଜେପି ନେତା ଅଶ୍ୱଥନାରାୟଣ, ସିପି ଯୋଗେଶ୍ୱର ଓ ବିଶ୍ୱନାଥ ତାଙ୍କୁ ୩୦ କୋଟି ଟଙ୍କାର ଲୋଭ ଦେଖାଇଥିଲେ । ବଦଳରେ ଜେଡିଏସ ପାର୍ଟି ଛାଡି ବିଜେପିରେ ଯୋଗ ଦେବାକୁ କହିଥିଲେ । ଏପରିକି ଏଥିପାଇଁ ଅଗ୍ରୀମ ବାବଦକୁ ୫ କୋଟି ଟଙ୍କା ମଧ୍ୟ ମିଳିଥିଲା । ସର୍ତ୍ତ ଥିଲା ବିଜେପିରେ ମିଶିବା ପରେ ବାକି ଟଙ୍କା ମିଳିଯିବ ବୋଲି କୁହାଯାଇଥିଲା । ତେବେ କୁମାରସ୍ୱାମୀଙ୍କ କହିବା ପରେ ପୂର୍ବ ଉପମୁଖ୍ୟମନ୍ତ୍ରୀ ଆର ଅଶୋକଙ୍କ ଜରିଆରେ ୫ କୋଟି ଟଙ୍କା ଫେରାଇଥିଲେ ଶ୍ରୀନିବାସ । ଏହି ଅଫର ତାଙ୍କୁ ଦୁଇ ମାସ ତଳେ ଦିଆଯାଇଥିଲା । ଆଉ ଅଗ୍ରୀମ ଟଙ୍କା ଦେବା ପରେ ପାର୍ଟି ଛାଡିବାକୁ ତାଙ୍କ ଉପରେ ବିଜେପି ନେତା ମାନେ ଚାପ ପକାଉଥିଲେ ।