ଆଜି ବିଜେପିର ଦିନିକିଆ କାର୍ଯ୍ୟକାରିଣୀ ! ବିଜେପୁର ଉପନିର୍ବାଚନ ପାଇଁ କେନ୍ଦ୍ରମନ୍ତ୍ରୀ ପ୍ରସ୍ତୁତ କରିବେ ମାଷ୍ଟର ପ୍ଲାନ୍
କନକ ବ୍ୟୁରୋ : ବିଜେପିର ମିଶନ ବିଜେପୁର । ଉପ ନିର୍ବାଚନ ପୂର୍ବରୁ ବିଜେପି ଆରମ୍ଭ କଲାଣି ମାଷ୍ଟର ପ୍ଲାନ । ବିଜେଡିକୁ ଚେକ ଦେବା ପାଇଁ ପ୍ରସ୍ତୁତ ହେବ ବ୍ଲୁ ପ୍ରିଣ୍ଟ । ଏଥିପାଇଁ ଆଜି ବସିବ ଦିନିକିଆ କାର୍ଯ୍ୟକାରିଣୀ । ଏହି ବୈଠକରେ ବିଜେପୁର ଉପନିର୍ବାଚନ ପାଇଁ ରଣନୀତି ପ୍ରସ୍ତୁତ ନେଇ ଆଲୋଚନା ହେବ । ବୈଠକରେ ୨ କେନ୍ଦ୍ରମନ୍ତ୍ରୀ, ରାଜ୍ୟ ପ୍ରଭାରୀ, ରାଜ୍ୟ ବିଜେପି ସଭାପତି, ବିଜେପି ବିଧାୟକ ଦଳ ନେତା ଓ ବରିଷ୍ଠ ନେତୃମଣ୍ଡଳ ଉପସ୍ଥିତ ରହି ବିଜେପୁର ନିର୍ବାଚନ ନେଇ ରୋଡ ମ୍ୟାପ ପ୍ରସ୍ତୁତ କରିବେ । ସୋମବାଦର ଦିନ ବିଜେପି ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ହୋଇଛି ରାଜ୍ୟ ପଦାଧିକାରୀ ବୈଠକ । ତେବେ କାର୍ଯ୍ୟକାରିଣୀରେ କଣ ରଣନୀତି ରହିବ ସେ ନେଇ ଏହି ପଦାକାରୀ ବୈଠକରେ ଆଲୋଚନା ହୋଇଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ପୂର୍ବତନ ବିଜେଡି ବିଧାୟକ ଅଶୋକ ପାଣିଗ୍ରାହୀଙ୍କୁ ଦଳରେ ମିଶାଇ ବିଜେପୁରରେ ବିଜୟୀ ହେବାକୁ ଲକ୍ଷ୍ୟ ରଖିଛି ବିଜେପି । ତେବେ ଅଶୋକଙ୍କୁ ଦଳରେ ମିଶାଇବା ପରେ ବରଗଡ ବିଜେପିରେ ବିଦ୍ରୋହ ଆରମ୍ଭ ହୋଇଛି । ଜିଲ୍ଲା ସଭାପତି ନାରାୟଣ ସାହୁ ଖୋଲାଖୋଲି ବିରୋଧ କରିଛନ୍ତି । ଏପରିକି ଗତକାଲିର ମିଶ୍ରଣ ପର୍ବରେ ମଧ୍ୟ ନାରାୟଣଙ୍କୁ ଦେଖିବାକୁ ମିଳି ନଥିଲା । ସେପଟେ ବିଜେଡିରେ ରୀତା ସାହୁଙ୍କୁ ନେଇ ହେଉଥିବା ବିରୋଧ ପ୍ରଶମିତ ହେବାରେ ଲାଗିଛି । କିନ୍ତୁ ବିଜେପୁର ନିର୍ବାଚନ ନେଇ କଂଗ୍ରେସ ଦଳ ବହୁତ ପଛରେ ପଡି ଯାଇଛି । କାହାକୁ ପ୍ରାର୍ଥୀ କରିବ ସେ ନେଇ କୌଣସି ନିଷ୍ପତି ନେଇନାହିଁ ଦଳ । ଏସବୁ ଭିତରେ ବିଜେପୁରରେ କିଏ ବାଜି ମାରୁଛି ତାହା ଦେଖିବାକୁ ବାକି ରହିଲା ।