ଦୁର୍ଦ୍ଦାନ୍ତ ଆତଙ୍କବାଦୀ ମାସୁଦ ଅଜହରକୁ ନେଇ ତେଜୁଛି ରାଜନୀତି ! ଗେରୁଆ ଦଳକୁ କଂଗ୍ରେସର ଟାର୍ଗେଟ୍, ଉତ୍ତର ରଖିଲା ବିଜେପି ।
କନକ ବ୍ୟୁରୋ : ଦୁର୍ଦ୍ଦାନ୍ତ ଆତଙ୍କବାଦୀ ମାସୁଦ ଅଜହରକୁ ନେଇ ଜୋର ଧରୁଛି ରାଜନୀତି । ୧୯୯୯ରେ ବିଜେପି ସରକାରଙ୍କ ଯୋଗୁଁ କାନ୍ଦାହାର ବିମାନ ଅପହରଣ ଘଟଣାରେ ମାସୁଦକୁ ମୁକ୍ତ କରାଯାଇଥିଲା ବୋଲି ଅଭିଯୋଗ କରିଛି କଂଗ୍ରେସ । ଯାହା ଫଳରେ ପୁଲୱାମା ପରି ଆକ୍ରମଣ କରିବାରେ ଆତଙ୍କବାଦୀ ସଫଳ ହୋଇଛି ବୋଲି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କହିଛନ୍ତି । ଅପରପକ୍ଷରେ କାନ୍ଦାହାର ଘଟଣାରେ ମାସୁଦକୁ ମୁକ୍ତ କରିବାର ନିଷ୍ପତି ସର୍ବଦଳୀୟ ବୈଠକରେ ନିଆଯାଇଥିଲା ବୋଲି ସରକାର ସ୍ପଷ୍ଟ କରିଛନ୍ତି । ସେହିପରି ଏନଏସଏ ଅଜିତ ଡୋଭାଲଙ୍କୁ ମଧ୍ୟ ଟାର୍ଗେଟ୍ କରିଛନ୍ତି କଂଗ୍ରେସ ଅଧ୍ୟକ୍ଷ ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ଏକ ଦଶକ ପୂର୍ବରୁ ଦୁର୍ଦ୍ଦାନ୍ତ ଆତଙ୍କବାଦୀ ମାସୁଦ ଅଜହରକୁ ମୁକ୍ତ କରିବା ନେଇ ବିଜେପିକୁ ଦାୟୀ କରିଛି କଂଗ୍ରେସ । ୧୯୯୯ କାନ୍ଦାହାର ବିମାନ ଅପହରଣ ଯୋଗୁଁ ମାସୁଦକୁ ମୁକ୍ତ କରାଯାଇଥିଲା । କଂଗ୍ରେସ ସରକାର ମାସୁଦକୁ ଗିରଫ କରିଥିବା ବେଳେ ବିଜେପି ସରକାର ତାକୁ ମୁକ୍ତ କରିଥିଲେ । ଏବଂ ସେହି ଘଟଣା ପାଇଁ ଏବେ ପାକିସ୍ତାନର ଆତଙ୍କବାଦୀ ପୁଲୱାମାରେ ଆକ୍ରମଣ କରିଛି ଯେଉଁଥିରେ ୪୦ ବୀର ଯବାନ ସହିଦ ହୋଇଛନ୍ତି ବୋଲି ରାହୁଲ କହିଛନ୍ତି । ଏଥିପାଇଁ ଏନଏସଏ ଅଜିତ ଡୋଭାଲ ମଧ୍ୟସ୍ଥତା କରିବା ସହ ନିଜେ ଯାଇ କାନ୍ଦାହାରରେ ମାସୁଦକୁ ମୁକ୍ତ କରି ଆସିଥିଲେ ବୋଲି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କହିଛନ୍ତି । ଏନେଇ ଅଜିତ ଡୋଭାଲଙ୍କ ଏକ ଫଟୋକୁ ରାହୁଲ ଗାନ୍ଧୀ ଟ୍ୱିଟ୍ ମଧ୍ୟ କରିଛନ୍ତି ।
ତେବେ ବିଜେପି ସରକାର ଏହାକୁ ଖଣ୍ଡନ କରିଛନ୍ତି । କାନ୍ଦାହାର ବିମାନ ଅପହରଣରେ ମାସୁଦକୁ ମୁକ୍ତ କରିବା ନେଇ ନିଷ୍ପତି ସର୍ବଦଳୀୟ ବୈଠକରେ ନିଆଯାଇଥିଲା ବୋଲି ବିଜେପି କହିଛି । ଏନଏସଏ ଅଜିତ ଡୋଭାଲଙ୍କୁ ନେଇ ରାହୁଲ ଗାନ୍ଧୀ ମିଛ କହୁଛନ୍ତି ବୋଲି ବିଜେପି ପକ୍ଷରୁ ଟ୍ୱିଟ୍ କରାଯାଇଛି । ମାସୁଦକୁ ମୁକ୍ତ କରିବା ଟିମରେ ନୁହେଁ ବରଂ ଆଲୋଚନା କରିବା ଟିମରେ ଅଜିତ ଡୋଭାଲ ଥିଲେ ବୋଲି ସରକାର କହିଛନ୍ତି । ୧୯୯୯ରେ ଗୁଇନ୍ଦା ସଂସ୍ଥାର ଅତିରିକ୍ତ ନିର୍ଦ୍ଦେଶକ ଥିଲେ ଅଜିତ ଡୋଭାଲ । ସେପଟେ ରାହୁଲ ତାଙ୍କର ଏହି ବୟାନ ବେଳେ ଆତଙ୍କବାଦୀ ମାସୁଦ ଅଜହରକୁ ଜୀ ବୋଲି ସମ୍ବୋଧନ କରିବାକୁ ନେଇ ମଧ୍ୟ ଆରୋପ ପ୍ରତ୍ୟାରୋପ ରାଜନୀତି ଜୋର ଧରିଛି ।