ବାଲିପାଟଣାରୁ ନବୀନଙ୍କ ଭବିଷ୍ୟବାଣୀ । କହିଲେ, କେନ୍ଦ୍ରରେ କାହାକୁ ମିଳିବନି ବହୁମତ, ସରକାର ଗଢ଼ିବାରେ କିଙ୍ଗ ମେକର ସାଜିବ ବିଜୁ ଜନତା ଦଳ ।

287

କନକ ବ୍ୟୁରୋ: ବାଲିପାଟଣାରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ବଡ଼ ବୟାନ । କେନ୍ଦ୍ରରେ ସରକାର ଗଢ଼ିବାରେ ବଡ ଭୂମିକା ନେବ ବିଜେଡି । ଏପରିକି ଏଥର କେନ୍ଦ୍ରରେ କୌଣସି ଦଳକୁ ବହୁମତ ମିଳିବ ନାହିଁ ବୋଲି ସିଧାସିଧା କହିଛନ୍ତି ନବୀନ । ତେଣୁ ଏଥର ଆଞ୍ଚଳିକ ଦଳମାନେ କେନ୍ଦ୍ରରେ କ୍ଷମତା ସମ୍ଭାଳିବାକୁ ଥିବା ସରକାର ପାଇଁ ମହତ୍ୱପୂର୍ଣ୍ଣ ଭୂମିକା ନେବେ । କିନ୍ତୁ ବିଜେଡି ଚଳିତଥର ୨୧ରୁ ୨୧ ସାଂସଦ ପାର୍ଲାମେଣ୍ଟକୁ ପଠାଇବ ଯାହାକି କେନ୍ଦ୍ରରେ ସରକାର ଗଢ଼ିବାରେ କିଙ୍ଗ ମେକର ସାଜିବ ବୋଲି ଭବିଷ୍ୟବାଣୀ କରିଛନ୍ତି ନବୀନ ।

ଆଉ ମାତ୍ର ଦିନକ ପରେ ଅର୍ଥାତ୍ ୨୩ ତାରିଖରେ ହେବାକୁ ଥିବା ତୃତୀୟ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ମୈଦାନକୁ ଓହ୍ଲାଇଛନ୍ତି ବିଜେଡି ସୁପ୍ରିମୋ । ତେଣୁ ଭୁବନେଶ୍ୱର ସଂସଦୀୟ କ୍ଷେତ୍ର ଓ ଏହା ଅଧିନରେ ଥିବା ବିଧାନସଭା ଆସନରେ ପ୍ରତିଦ୍ୱନ୍ଦିତା କରୁଥିବା ବିଜେଡି ପ୍ରାର୍ଥୀଙ୍କ ପାଇଁ ଭୋଟ୍ ଭିକ୍ଷା କରିଛନ୍ତି ନବୀନ । ଏହାସହ କେନ୍ଦ୍ରକୁ ନିଶାନା କରି ବିଭିନ୍ନ ପ୍ରସଙ୍ଗରେ ମୋଦି ସରକାରଙ୍କୁ ସିଧା ନିଶାନା ମଧ୍ୟ କରିଛନ୍ତି ନବୀନ । କହିଛନ୍ତି, ରାଜ୍ୟରେ ଦୁର୍ବିପାକ, ବିପର୍ଯ୍ୟୟ ସମୟରେ କେନ୍ଦ୍ରର କୌଣସି ନେତାଙ୍କ ଦେଖା ନଥିଲା, ହେଲେ ନିର୍ବାଚନ ସମୟରେ ଭୋଟ୍ ପାଇଁ ମିଛ ପ୍ରତିଶ୍ରୁତି ଦେବାକୁ ଆସୁଛନ୍ତି । ଏପରିରକି ବିଜେପି ନେତାମାନେ ଏବେ ନିର୍ବାଚନୀ ପର୍ଯ୍ୟଟନ ଭଳି ଆସି ପର୍ଯ୍ୟଟକଙ୍କ ଭଳି ଫଟୋ ଉଠାଉଛନ୍ତିି କହି କଟାକ୍ଷ କରିଛନ୍ତି ନବୀନ ।

ସେହିପରି ପ୍ରତିଥର ଭଳି ଏଥର ମଧ୍ୟ ନବୀନ କହିଛନ୍ତି, କି, ଓଡ଼ିଶାର ଚାଷୀ ଭାଇଙ୍କ ପାଇଁ ‘କାଳିଆ’ ଯୋଜନା ଜାତୀୟସ୍ତରରେ ପ୍ରସଂଶା ସାଉଣ୍ଟୁଥିବାବେଳେ କେନ୍ଦ୍ରର ବିଜେପ ସରକାର ଏହାକୁ ବନ୍ଦ କରିବାକୁ ଚକ୍ରାନ୍ତ କରିଛି । ହେଲେ ମୁଁ ବଞ୍ଚିଥିବା ଯାଏ ‘କାଳିଆ’କୁ ବନ୍ଦ କରିପାରିବେ ନାହିଁ । ଏବଂ ଏହାର ଜବାବ୍ ଓଡ଼ିଶାବାସୀ ନିଶ୍ଚୟ ଦେବେ ବୋଲି କହିଛନ୍ତି ନବୀନ । ଆପଣମାନେ ମୋ ପରିବାର, ସାଢ଼େ ଚାରି କୋଟି ଓଡ଼ିଶାବାସୀ ମୋର ପରିବାର । ମୁଁ ଆପଣଙ୍କ ସହିତ ସବୁବେଳେ ରହିଛି । ମୋତେ ଆଶର୍ବାଦ କରନ୍ତୁ ମୁଁ ଆପଣଙ୍କ ସେବା କରିଚାଲିଥିବି ବୋଲି କହିଛନ୍ତି ନବୀନ ।

Comments are closed.