କନକ ନ୍ୟୁଜ ମହାପ୍ରଭାବ । ରାଜରାସ୍ତାରେ ନିୟମ ଭାଙ୍ଗିଥିଲେ, ଟ୍ରାଫିକ ଥାନାରେ ଜରିମାନା ଦେଲେ ବିଜେଡି କର୍ମୀ । ଏବେ ପ୍ରଶ୍ନ କଂଗ୍ରେସ କର୍ମୀଙ୍କ ଠାରୁ କେବେ ଫାଇନ୍ ଆଦାୟ କରିବ କମିଶନରେଟ ପୋଲିସ ।
କନକ ବ୍ୟୁରୋ : ନିୟମ ଭାଙ୍ଗିଥିଲେ, ସ୍ୱଇଚ୍ଛାରେ ଆସି ଜରିମାନା ଦେଲେ । କନକ ନ୍ୟୁଜରେ ଲଗାତାର ଖବର ପ୍ରସାରଣ ପରେ ଟ୍ରାଫିକ ନିୟମ ଉଲ୍ଲଂଘନକାରୀଙ୍କ ନିଦ ଭାଙ୍ଗିଛି । ଆଜି ଟ୍ରାଫିକ ଥାନାରେ ପହଞ୍ଚି ଚାଲାଣ କାଟିଛନ୍ତି ଟ୍ରାଫିକ ନିୟମ ଉଲ୍ଲଂଘନ କରିଥିବା ବିଜେଡି କର୍ମୀ । ସିସିଟିଭି ଯାଞ୍ଚ ପରେ କିଛି ବାଇକ ଚାଳକଙ୍କ ନିକଟକୁ କମିସନରେଟ ପୋଲିସ ଚାଲାଣ ପଠାଇଥିବା ବେଳେ ଆଉ କିଛି ବାଇକ ଚାଳକ ନିୟମ ଭାଙ୍ଗିଥିବାରୁ ସ୍ୱଇଚ୍ଛାରେ ଜରିମାନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ବିଜେଡିର ପ୍ରତିଷ୍ଠା ଦିବସରେ ରାଜରାସ୍ତାରେ ବିନା ହେଲମେଟରେ ରାଲିରେ ଆସି ଟ୍ରାଫିକ ନିୟମର ଖୋଲାଖୋଲି ଉଲ୍ଲଂଘନ କରିଥିଲେ ଦଳୀୟ କର୍ମୀ ଓ ନେତା । ସେତେବେଳେ ନିୟମ ଉଲ୍ଲଂଘନକାରୀଙ୍କ ଠାରୁ ଜରିମାନା ଆଦାୟ କରିବା ତ ଦୂରର କଥା ସେମାନଙ୍କୁ କର୍ଡନ କରି ଆଗକୁ ନେଉଥିଲେ ଟ୍ରାଫିକ ଓ ପୋଲିସ ଅଧିକାରୀ । ସୋସିଆଲ ମିଡିଆରେ ଏହାର ଫଟୋ ଓ ଭିଡିଓ ଭାଇରାଲ ହେବା ପରେ ଏହାକୁ ନେଇ ପ୍ରଶ୍ନ ଉଠାଇଥିଲେ ସାଧାରଣ ଲୋକେ ।
ସାଧାରଣ ଜନତାଙ୍କୁ ସଜା, ଦଳୀୟ ନେତା ଓ କର୍ମୀଙ୍କୁ କଣ ସାତ ଖୁନ୍ ମାଫ୍ । ଯେତେବେଳେ ସାଧାରଣ ଲୋକଟିଏ ନିୟମ ଉଲ୍ଲଂଘନ କଲେ ହଜାର ହଜାର ଟଙ୍କାର ତଣ୍ଡ ଗଣିବାକୁ ପଡୁଛି ସେତେବେଳେ ଦଳୀୟ ନେତା ଓ କର୍ମୀଙ୍କୁ କାହିଁକି ଛାଡ କରାଯିବ । ନା ଏମାନଙ୍କ ଠାରୁ ଚାଲାଣ କାଟିବାକୁ ସାହସ ଜୁଟାଇ ପାରୁନାହାନ୍ତି ପୋଲିସ ଓ ଟ୍ରାଫିକ ଅଧିକାରୀ । କମିଶନରେଟ ପୋଲିସ ଉପରକୁ କିଛି ଏଭଳି ପ୍ରଶ୍ନବାଣ ମାରିଥିଲେ ସାଧାରଣ ଲୋକେ । ଯେଉଁଥିପାଇଁ କମିସନରେଟ ପୋଲିସ ପକ୍ଷରୁ ଟ୍ୱିଟ୍ କରି ନିୟମ ଉଲ୍ଲଂଘନ କରିଥିବା ଯୁବକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି କୁହାଯାଇଥିଲା । କାର୍ଯ୍ୟାନୁଷ୍ଠାନ ପାଇଁ କମିସନରେଟ ପୋଲିସର ଟ୍ୱିଟ କରିବାର ଦୁଇ ଦିନ ମଧ୍ୟରେ ଟ୍ରାଫିକ ନିୟମ ଉଲ୍ଲଂଘନକାରୀଙ୍କ ନାଁରେ ଜାରି ହୋଇଥିଲା ଚାଲାଣ । ଆଉ ଆଜି ଟ୍ରାଫିକ ଥାନାରେ ପହଞ୍ଚି ଜରିମାନା ବାବଦକୁ ଟଙ୍କା ଦେଇଛନ୍ତି ବିଜେଡି କର୍ମୀ ।
କେବଳ ଯେ ବିଜେଡି କର୍ମୀ ଟ୍ରାଫିକ ନିୟମ ଉଲ୍ଲଂଘନ କରିଥିଲେ ତାହା ନୁହେଁ ବରଂ ଶହ ଶହ ସଂଖ୍ୟାରେ କଂଗ୍ରେସ କର୍ମୀ ମଧ୍ୟ ବିରୋଧ ପ୍ରଦର୍ଶନ ବେଳେ ଟ୍ରାଫିକ ନିୟମର ଖୋଲାଖୋଲି ଉଲ୍ଲଘଂନ କରିଥିଲେ । ତେଣୁ ସେମାନଙ୍କ ବିରୋଧରେ ଅନୁରୂପ ଭାବେ କାର୍ଯ୍ୟାନୁଷ୍ଠାନ ନେବ କି କମିଶନରେଟ ପୋଲିସ ।