୨୦୧୯ ନିର୍ବାଚନ ପୂର୍ବରୁ ଶକ୍ତି ଗୋଟାଉଛି କଂଗ୍ରେସ : ରାଜ୍ୟସଭା ଉପାଧ୍ୟକ୍ଷ ପଦ ଦେଇ ବିଜେଡିକୁ ମନାଇବା ଫର୍ମୁଲା ଉପରେ ଜାତୀୟ ଗଣମାଧ୍ୟମରେ ଚର୍ଚ୍ଚା
କନକ ବ୍ୟୁରୋ : ପୁଣି ଜାତୀୟ ଗଣମାଧ୍ୟମରେ ବିଜେଡିକୁ ନେଇ ଚର୍ଚ୍ଚା । ଦିଲ୍ଲୀରେ ମମତା ବାନାର୍ଜୀଙ୍କୁ ଅହମ୍ମଦ ପଟେଲ ଭେଟିବା ପରେ ଏହି ଚର୍ଚ୍ଚା ଜୋର ଧରିଛି । କୁହାଯାଉଛି ୨୦୧୯ ପୂର୍ବରୁ ଶକ୍ତି ସଂଗ୍ରହ କରୁଛି କଂଗ୍ରେସ । ଯେଉଁଥିପାଇଁ ଆଂଚଳିକ ଦଳଗୁଡିକର ସମର୍ଥନ ଜରୁରୀ ହୋଇପଡିଛି । ବିଶେଷ କରି ବିଜେଡି ଓ ଟିଆରଏସ ଉପରେ କଂଗ୍ରେସ ଆଖି ପକାଇଛି । ଆଉ ରାଜ୍ୟସଭାରେ ୯ଜଣ ସାଂସଦ ଥିବା ବିଜେଡିକୁ ରାଜ୍ୟସଭା ଉପାଧ୍ୟକ୍ଷ ଥୋପ ପକାଇ ଅଣଏନଡିଏ ମେଂଟ ଆଡକୁ କଂଗ୍ରେସ ଆକୃଷ୍ଟ କରିପାରେ ବୋଲି ଚର୍ଚ୍ଚା ହେଉଛି । ହେଲେ ଏଭଳି ସମ୍ଭାବନାର ଭାଗ୍ୟ ନିର୍ଭର କରୁଛି ନବୀନଙ୍କ ନିଷ୍ପତି ଉପରେ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁସାରେ ରାଜ୍ୟସଭା ଉପାଧ୍ୟକ୍ଷ ପିଜେ କୋରିଆନଙ୍କ ସ୍ଥାନରେ ଜଣେ ଅଣ ଏନଡିଏ ନେତାଙ୍କୁ ବସାଇବାକୁ ଚାହୁଁଛି କଂଗ୍ରେସ । ଆଉ ଏହି ମର୍ମରେ ୟୁପିଏ ଅଧ୍ୟକ୍ଷା ସୋନିଆ ଗାନ୍ଧିଙ୍କ ରାଜନୈତିକ ସଚିବ ଅହମ୍ମଦ ପଟେଲ, ଟିଏମସି ନେତ୍ରୀ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭେଟି ଆଲୋଚନା କରିଛନ୍ତି । ରବିବାର ନୀତି ଆୟୋଗ ବୈଠକ ଅବସରରେ ମମତାଙ୍କ ସହ ପ୍ରାୟ ଘଂଟାଏ କାଳ ଏନେଇ ଚର୍ଚ୍ଚା କରିଛନ୍ତି ।
ତେବେ ଗୁରୁତ୍ୱପୂର୍ଣ୍ଣ କଥାଟି ହେଉଛି, ରାଜ୍ୟସଭା ଉପାଧ୍ୟକ୍ଷ ପଦ ଲାଗି କଂଗ୍ରେସ ପ୍ରାର୍ଥୀ ଦେବ ନା ଅନ୍ୟ ରାଜନୈତିକ ଦଳର ପ୍ରାର୍ଥୀଙ୍କୁ ସମର୍ଥନ କରିବ ତାହା ସ୍ପଷ୍ଟ ହୋଇନାହିଁ । ଆଉ ୨୦୧୯ ପୂର୍ବରୁ ବିଜେପି ବିରୋଧୀ ମେଂଟର ଯେଉଁ ପରିକଳ୍ପନା କରାଯାଉଛି ସେଥିରେ ବିଜେଡି ଓ ଟିଏମସିର ଯୋଗଦାନ ଜରୁରୀ ହୋଇପଡିଛି । ଉଭୟ କଂଗ୍ରେସ ଓ ବିଜେପିଠାରୁ ସମାନ ଦୂରତା ରଖିଆସୁଥିବା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ମନାଇବା ପାଇଁ ରାଜ୍ୟସଭା ଉପାଧ୍ୟକ୍ଷ ଥୋପ ପକାଇ ପାରନ୍ତି ଅଣଏନଡିଏ ମେଂଟ ।
ରାଜ୍ୟସଭାରେ ବିଜେପି ନେତୃତ୍ୱାଧିନ ଏନଡିଏରେ ଅଛନ୍ତି ୮୮ ଜଣ ସଦସ୍ୟ । ସେହିପରି କଂଗ୍ରେସ ନେତୃତ୍ୱରେ ୟୁପିଏରେ ଅଛନ୍ତି ୫୮ ଜଣ ସଦସ୍ୟ । ତୃଣମୂଳ କଂଗ୍ରେସ, ଏଆଇଏଡିଏମକେ, ସମାଜବାଦୀ ପାର୍ଟିର ୧୩ ଜଣ ଲେଖାଏଁ ସାଂସଦ ଅଛନ୍ତି । ଏହା ତଳକୁ ରହିଛି ବିଜେଡିର ୯ ଜଣ ସାଂସଦ । ସଂସଦର ଉଚ୍ଚ ସଦନର ସଦସ୍ୟମାନେ ହିଁ କେବଳ ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଭାଗ ନେଉଥିବାରୁ ବିଜେଡି ଏକ ନିର୍ଣ୍ଣାୟକ ଭୂମିକା ତୁଲାଇବାକୁ ଯାଉଛି । ହେଲେ ବିଜେପି ସମେତ କଂଗ୍ରେସଠାରୁ ଦୂରେଇ ରହୁଥିବା ନବୀନ ଏହି ପ୍ରସଙ୍ଗରେ କି ପଦକ୍ଷେପ ନେବେ ତାହା ଯଥେଷ୍ଟ ଗୁରୁତ୍ୱ ରଖୁଛି ।
୨୦୧୯ ସାଧାରଣ ନିର୍ବାଚନ ପୂର୍ବରୁ ବିଜେପିକୁ ରୋକିବା ପାଇଁ ଶକ୍ତି ଗୋଟାଉଥିବା କଂଗ୍ରେସ ଆଂଚଳିକ ଦଳଗିଡିକର ସମର୍ଥନ ଆବଶ୍ୟକ କରୁଛି । ଆଉ ରାଜ୍ୟସଭା ଉପାଧ୍ୟକ୍ଷ ନିର୍ବାଚନରୁ ଏହାର ମୂଳଦୁଆ ପକାଇବାକୁ ପ୍ରସ୍ତୁତି କରୁଛି । ଏଥିରୁ ଗୋଟିଏ କଥା ସ୍ପଷ୍ଟ ଯେ, ଦୀର୍ଘ ୧୮ବର୍ଷ ହେଲା ଦୁଇଟି ଜାତୀୟ ଦଳକୁ ନିର୍ବାଚନୀ ମୈଦାନରେ ଧୂଳି ଚଟାଇଥିବା ବିଜେଡି ଓ ଏହାର ନେତା ନବୀନ ପଟ୍ଟନାୟକଙ୍କୁ ମୋଦି ବିରୋଧୀ ମେଂଟରେ ସାମିଲ କରିବା ପାଇଁ କଂଗ୍ରେସ ଜୋର ଲଗାଇ ଦେଇଛି ।