ବିଦେଶୀ ମିଡିଆରେ ବିଜେଡିର ଚର୍ଚ୍ଚା ! ଲଣ୍ଡନରେ ପ୍ରକାଶିତ ଅନ୍ତର୍ଜାତୀୟ ପତ୍ରିକା ‘ଦ ଇକୋନୋମିଷ୍ଟ’ ପ୍ରକାଶ କଲା ରିପୋର୍ଟ
କନକ ବ୍ୟୁରୋ : ଅନ୍ତର୍ଜାତୀୟ ମର୍ଯ୍ୟାଦା ସଂପନ୍ନ ପତ୍ରିକା ଦି ଇକୋନୋମିଷ୍ଟରେ ବିଜୁ ଜନତା ଦଳ ସଂପର୍କରେ ପ୍ରକାଶ ପାଇଛି ରିପୋର୍ଟ । ଯେଉଁଥିରେ ବିଜେଡିକୁ ଭାଙ୍ଗିବା ପାଇଁ ବିଜେପି ପ୍ରୟାସ ଚଳାଇଥିବା ଉଲ୍ଲେଖ କରାଯାଇଛି । ‘ଅନ୍ୟାନ୍ୟ ରାଜ୍ୟ ଉପରେ ଆଖି ପକାଇଛି ବିଜେପି । ବିହାରରେ ନୀତିଶ କୁମାରଙ୍କ ସହଯୋଗୀଙ୍କୁ ଆଇନର ଜାଲରେ ଛନ୍ଦି ଦେବାପରେ ପଟ୍ଟ ପରିବର୍ତ୍ତନ ପାଇଁ ତାଙ୍କୁ ବାହାନା ମିଳିଗଲା । ଠିକ ସେହିପରି ଓଡିଶାରେ ୧୭ବର୍ଷ ହେଲା ମୁଖ୍ୟମନ୍ତ୍ରୀ ଥିବା ନବୀନ ପଟ୍ଟନାୟକଙ୍କ ବିରୋଧରେ ତଦନ୍ତ, ସେହିଭଳି ଏକ ଅବସର ସୃଷ୍ଟି କରିପାରେ । ନବୀନଙ୍କ ଦଳର କିଛି ସଦସ୍ୟ ବିଜେପିଠାରୁ ଭଲ ଅଫର ଅପେକ୍ଷାରେ ଅଛନ୍ତି । ତାମିଲନାଡୁରେ ମଧ୍ୟ ସରକାରରରେ ଥିବା ଗୋଷ୍ଠୀକୁ ହାତ କରି ବିଜେପି କ୍ଷମତାକୁ ଆସିବାକୁ ଚାହୁଁଛି ।’
Kanak News is now on WhatsApp
Join and get latest news updates delivered to you via WhatsApp
କିଛିଦିନ ତଳେ ବରିଷ୍ଠ ସାମ୍ବାଦିକ ତଥା ଇଣ୍ଡିଆ ଟୁଡେ ଗ୍ରୁପର କନସଲଟିଂ ଏଡିଟର ରାଜଦୀପ ସରଦେଶାଇ ମଧ୍ୟ ଏହି ମର୍ମରେ ଟ୍ୱିଟ କରିଥିଲେ – ‘ଏଆଇଏଡିଏମକେ ପରେ ବିଜେଡିର ପାଳି । ଭାଗ ଭାଗ ହେବ ବିଜୁ ଜନତା ଦଳ । ଓଡିଶାରେ ଶାସନ କରୁଥିବା ବିଜେଡିରେ ବଡ ଧରଣର ଫାଟର ଆଶଙ୍କା କରିଥିଲେ ଜାତୀୟ ଗଣମାଧ୍ୟମର ସାମ୍ବାଦିକ ରାଜଦୀପ ସରଦେଶାଇ । ଟ୍ୱିଟ୍ କରି ରାଜଦୀପ ଲେଖିଥିଲେ, ତାମିଲନାଡୁରେ ଆନ୍ନା ଡିଏମକେ ଭାଗ ହେବା ଭଳି ବିଜେଡି ବି ଭାଗଭାଗ ହେବ ।’
ଭୁବନେଶ୍ୱରରେ ବିଜେପିର ଜାତୀୟ କାର୍ଯ୍ୟକାରିଣୀ ପୂର୍ବରୁଟ୍ୱିଟ୍ କରିଥିଲେ ବିଜେଡି ସାଂସଦ ତଥାଗତ ଶତପଥୀ । ‘ଭୁବନେଶ୍ୱରରେ ବିଜେପିର ଦୁଇ ଦିନିଆଜାତୀୟ କାର୍ଯ୍ୟକାରିଣୀ ପୂର୍ବରୁ ବିଜେଡିର ନାଁ ଆଉ ଚିହ୍ନକୁ ନେଇଯିବାକୁ ଚାଲିଛି ମସୁଧା । ଆଉ ଏଥିରେ ଜଣେ ସାଂସଦ ବି ତାଙ୍କ ପାଇଁ କାମ କରୁଛନ୍ତି । ଯଦି ଦଳରେ ବିଭାଜନ ଘଟେ ତେବେ ଆଗୁଆ ନିର୍ବାଚନ କରିବାକୁ ବିଜେପି ଚିନ୍ତା କରିବ ।’
ପୂର୍ବ ଭାରତରେ ପଶ୍ଚିମବଙ୍ଗ ଓ ଓଡିଶାରେ ବିଜେପିର ପ୍ରଭାବ ବଢାଇବା ପାଇଁ କେନ୍ଦ୍ରୀୟ ନେତାମାନେ ରଣନୀତି ପ୍ରସ୍ତୁତ କରୁଛନ୍ତି । ବିଶେଷ କରି ଓଡିଶାରେ ପଂଚାୟତ ନିର୍ବାଚନରେ ଟିକିଏ ଭଲ ପ୍ରଦର୍ଶନ ପରେ ଓଡିଶା ପାଇଁ ଅଧିକ ଉତ୍ସାହିତ ହୋଇପଡିଛି ବିଜେପି । ଆଉ ଏହି ସମୟରେ ଦି ଇକୋନୋମିଷ୍ଟ ଭଳି ଏକ ଅନ୍ତର୍ଜାତୀୟ ପତ୍ରିକାରେ ଏହି ଚର୍ଚ୍ଚା ରାଜ୍ୟର ରାଜନୈତିକ ପାଣିପାଗକୁ ସରଗରମ କରିଦେଇଛି ।