କନକ ବ୍ୟୁରୋ : ପୁଣି ତେଜିଲା ଚାଉଳ କଳି । ରାଜନୈତିକ ଲଢ଼େଇ ଭିତରେ ଶ୍ରେୟ ନେବାର ପ୍ରତିଯୋଗିତା । କେନ୍ଦ୍ର ଓ ରାଜ୍ୟ ଭିତରେ ଟଙ୍କିକିଆ ଚାଉଳକୁ ନେଇ ଚାଲିଥିବା ଏହି ପ୍ରତିଦ୍ୱନ୍ଦିତା, ଏବେ ଆଉ ଗୋଟିଏ ପାଦ ଆଗକୁ ଯାଇଛି, ଯେତେବେଳେ କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର, ଓଡ଼ିଶାରେ ଆସି କହିଛନ୍ତି-ଏହା ନବୀନ ଚାଉଳ ନୁହେଁ, ମୋଦି ଚାଉଳ ।
Kanak News is now on WhatsApp
Join and get latest news updates delivered to you via WhatsApp
ଗରିବ ଲୋକଙ୍କ ପାଇଁ ଆସୁଥିବା ଚାଉଳକୁ କେମିତି ବ୍ରାଣ୍ଡିଂ କରାଯାଉଛି କେନ୍ଦ୍ରମନ୍ତ୍ରୀଙ୍କ ଏହି ମନ୍ତବ୍ୟରୁ ସ୍ପଷ୍ଟ ବାରି ହେଉଛି । ଆଉ ଏହି ପନ୍ଥା ଆପଣାଇବାରେ ବିଜେଡି ବି ପଛରେ ନାହିଁ । କାହିଁକି ନା’ ଓଡ଼ିଶାରେ ଯେତେବେଳେ ଏହି ଯୋଜନାର ଆରମ୍ଭ ହୋଇଥିଲା, ନବୀନ ପଟ୍ଟନାୟକ ଏହି ଚାଉଳ ଦେଉଛନ୍ତି ବୋଲି ଏକ ପ୍ରକାର ପ୍ରଚାର କରାଗଲା ।
ଟଙ୍କିକିଆ ଚାଉଳ ଦେଉଛି କିଏ ? କାହାର ରହୁଛି କେତେ ଭାଗିଦାରୀ ?
ଗରିବ ଲୋକଙ୍କୁ ଏକ ଟଙ୍କାରେ ମାସକ ମୁଣ୍ଡପିଛାରେ ମିଳୁଛି ୫ କେ.ଜି ଚାଉଳ । ଚାଉଳର ପ୍ରକୃତ ଦାମ ହେଉଛି କେ.ଜି ପିଛା ୩୦ ଟଙ୍କା । ଯେଉଁଥିରେ କେନ୍ଦ୍ର ସରକାର ଦେଉଛନ୍ତି ୨୭ ଟଙ୍କା । ରାଜ୍ୟ ସରକାର ଦେଉଛନ୍ତି ୨ଟଙ୍କା । ଆଉ ବଳକା ଟଙ୍କାଟିଏ ଦେଉଛନ୍ତି ଉପଭୋକ୍ତା ।
ଚାଉଳକୁ ନେଇ ରାଜନୀତି ? ଶ୍ରେୟ ନେବାକୁ ପ୍ରତିଯୋଗିତା
ଏ ଯେଉଁ ଟଙ୍କିକିଆ ଚାଉଳକୁ ନେଇ କେନ୍ଦ୍ର ଓ ରାଜ୍ୟ ମଧ୍ୟରେ ଶ୍ରେୟ ପାଇଁ ଲଢ଼େଇ ଚାଲିଛି । ତା’ ପଛରେ ବି ରହିଛି ରାଜନୀତି । ୨୦୦୯ରେ ଏହି ଚାଉଳ, ବିଜେଡିକୁ ଶାସନକୁ ଫେରିବା ପାଇଁ ସହାୟକ ହୋଇଥିଲା ବୋଲି ଚର୍ଚ୍ଚା ହୁଏ । ଆଉ ଆଜି ଯେତେ ବେଳେ କେନ୍ଦ୍ରମନ୍ତ୍ରୀ, ଏହାକୁ ମୋଦି ଚାଉଳ ବୋଲି କହିଛନ୍ତି-ଚିହିଁକି ଉଠିଛି ବିଜେଡି ।
୨୦୦୮ରେ ତକ୍ରାଳୀନ କେନ୍ଦ୍ର ସରକାର ଚାଉଳ ଯୋଗାଇବା ଆରମ୍ଭ କରିବା ପରେ ସଂପୃକ୍ତ ରାଜ୍ୟମାନେ ଆଉ କିଛି ସବ୍ସିଡି ନେଇ ଏହାକୁ ଏକ ଟଙ୍କିଆ ଚାଉଳରେ ପରିଣତ କରିଥିଲେ । ଯାହାକୁ ନେଇ ସବୁବେଳେ କେନ୍ଦ୍ର ଓ ରାଜ୍ୟ ମଧ୍ୟରେ ଟଣାଓଟରା ଲାଗି ରହିଛି ।