ନୂଆ ମୁହଁକୁ ଭରସିଲେ ନବୀନ ! ଅନ୍ୟ ଦଳରୁ ଆସି ଶଙ୍ଖ ଧରିଧିବା ନେତାଙ୍କୁ ପ୍ରାଧାନ୍ୟ ଦେଲେ ବିଜେଡି ସୁପ୍ରିମୋ । 

611

କନକ ବ୍ୟୁରୋ : ନେତା ଆସିଲେ ଟିକେଟ୍ ନେଲେ । ବିଜେଡିର ୨୦୧୯ ନିର୍ବାଚନ ପ୍ରାର୍ଥୀ ତାଲିକାରେ ଅନେକ ନୂଆ ମୁହଁକୁ ଦେଖିବାକୁ ମିଳିଛି । ବିଶେଷ କରି ଯେଉଁମାନେ ନିଜ ଦଳ ଛାଡି ଶଙ୍ଖ ଧରିଥିଲେ, ସେମାନଙ୍କୁ ବିଜୁ ଜନତା ଦଳ ଟିକେଟ୍ ଦେଇଛି । ଏଥି ସହ ବିଜେଡି ଏକ ବାର୍ତା ଦେଇଛି ଯେ, ବିଜୁ ଜନତା ଦଳକୁ ଆସୁଥିବା ଅନ୍ୟ ଦଳର ନେତାଙ୍କୁ ଦଳ ପ୍ରାଧାନ୍ୟ ଦିଏ । ଏହି ରିପୋର୍ଟରେ ଦେଖନ୍ତୁ କିଏ କିଏ ନୂଆ ନେତା ପାଇଛନ୍ତି ବିଜେଡି ଟିକେଟ୍ ।

ସୁନୀତା ବିଶ୍ୱାଳ, ସୁନ୍ଦରଗଡ ଲୋକସଭା ପ୍ରାର୍ଥୀ 

ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ହେମାନନ୍ଦ ବିଶ୍ୱାଳଙ୍କ ଝିଅ ସୁନୀତା ବିଶ୍ୱାଳଙ୍କୁ ମିଳିଛି ସୁନ୍ଦରଗଡ ସାଂସଦ ଟିକେଟ୍ । ସୁନ୍ଦରଗଡ କଂଗ୍ରେସର କାର୍ଯ୍ୟକାରୀ ସଭାପତି ଥିବା ସୁନୀତା, କିଛି ଦିନ ତଳେ ବିଜେଡିରେ ଯୋଗ ଦେଇଥିଲେ । ସୁନୀତାଙ୍କୁ ଟିକେଟ୍ ଦେଇ ଏକାସଙ୍ଗେ ଆଦିବାସୀ ଏବଂ ମହିଳା କାର୍ଡ ଖେଳିଛନ୍ତି ନବୀନ ।

ଚନ୍ଦ୍ରଶେଖର ସାହୁ, ବ୍ରହ୍ମପୁର ଲୋକସଭା ପ୍ରାର୍ଥୀ

ପୂର୍ବତନ ମନ୍ତ୍ରୀ ତଥା ଦକ୍ଷିଣ ଓଡିଶାର ଟାଣୁଆ କଂଗ୍ରେସ ନେତା ଚନ୍ଦ୍ରଶେଖର ସାହୁଙ୍କୁ ବିଜେଡି ଦେଇଛି ବ୍ରହ୍ମପୁର ଲୋକସଭା ଟିକେଟ୍ । ଗତ ଦୁଇ ସାଧାରଣ ନିର୍ବାଚନରେ ଚନ୍ଦ୍ରଶେଖର, ସିଦ୍ଧାନ୍ତ ମହାପାତ୍ରଙ୍କ ଠାରୁ ହାରିବା ପରେ ବିଜେଡିରେ ସାମିଲ ହୋଇଥିଲେ ।

ବିକ୍ରମ ପଣ୍ଡା, ବ୍ରହ୍ମପୁର ବିଧାନସଭା ପ୍ରାର୍ଥୀ

ବିଧାୟକ ରମେଶ ଚନ୍ଦ୍ର ଚ୍ୟାଉପଟ୍ଟନାୟକଙ୍କ ଠାରୁ ତିନି ଥର ହେଲା ଅଳ୍ପ ବ୍ୟବଧାନରେ ହାରିବା ପରେ, ବ୍ରହ୍ମପୁରର ଯୁବ କଂଗ୍ରେସ ନେତା ବିକ୍ରମ ପଣ୍ଡା ମଧ୍ୟ ବିଜେଡିରେ ଯୋଗ ଦେଇଥିଲେ । ଏବେ ବିକ୍ରମଙ୍କୁ ବିଜେଡି ଦେଇଛି ବ୍ରହ୍ମପୁର ବିଧାନସଭା ଟିକେଟ୍ ।

ନବ ଦାସ, ଝାରସୁଗୁଡା ବିଧାୟକ ପ୍ରାର୍ଥୀ

ଝାରସୁଗୁଡା ବିଧାୟକ ତଥା କଂଗ୍ରେସର ହେଭିୱେଟ୍ ନେତା ନବ ଦାସ, ପ୍ରାୟ ଦୁଇ ମାସ ତଳେ ସାମିଲ ହୋଇଥିଲେ ବିଜେଡିରେ । ଏବେ ୨୦୧୯ ନିର୍ବାଚନରେ ନବ ଦାସ ଝାରସୁଗୁଡାରୁ ବିଜେଡି ଟିକେଟରେ ଲଢିବେ ।

ଦୁଷ୍ମନ୍ତ ନାୟକ, ଭବାନୀପାଟଣା ବିଧାୟକ ପ୍ରାର୍ଥୀ

କଳାହାଣ୍ଡି ଭବାନୀପାଟଣାର କଂଗ୍ରେସ ବିଧାୟକ ଦୁଷ୍ମନ୍ତ ନାଏକ ଗତ ଜୁଲାଇରେ ବିଜୁ ଜନତା ଦଳରେ ଯୋଗ ଦେଇଥିଲେ । ଦଳ ତାଙ୍କ ନେତୃତ୍ୱ ଏବଂ ସଂଗଠନ ଉପରେ ବିଶ୍ୱାସ ରଖି, ଭବାନୀପାଟଣା ବିଧାନସଭା ଟିକେଟ୍ ଦେଇଛି ।

ଯୋଗେଶ ସିଂହ, ସୁନ୍ଦରଗଡ ବିଧାନସଭା ପ୍ରାର୍ଥୀ

ସୁନ୍ଦରଗଡ ବିଧାୟକ ତଥା କଂଗ୍ରେସର ଟାଣୁଆ ନେତା ଯୋଗେଶ ସିଂହ ବିଜେଡିରେ ମିଶିଥିଲେ । ୨୦୧୪ର ବିଜେଡି ପ୍ରାର୍ଥୀ କୁସୁମ ଟେଟେଙ୍କ ବିରୋଧ ସତ୍ୱେ ଯୋଗେଶ ସିଂହଙ୍କୁ ବିଜେଡି, ଦଳକୁ ଆପଣେଇ ନେଇଥିଲା । ଏବେ ତାଙ୍କୁ ଦଳ ଦେଇଛି ସୁନ୍ଦରଗଡ ବିଧାନସଭା ଟିକେଟ୍ ।