ବଜେଟ ଅଧିବେଶନ ପାଇଁ ଦଳୀୟ ସାଂସଦଙ୍କୁ ସୁପ୍ରିମୋଙ୍କ ମନ୍ତ୍ର । ବିଧାନ ପରିଷଦ ପାଇଁ ଦାବି ଦୋହରାଇବ ବିଜେଡି, ସିଏଏକୁ ସମର୍ଥନ, ଏନଆରସିକୁ ବିରୋଧ ।
କନକ ବ୍ୟୁରୋ : ଆସନ୍ତା ୩୧ ତାରିଖରୁ ଆରମ୍ଭ ହେଉଛି, ସଂସଦର ବଜେଟ୍ ଅଧିବେଶନ । ଆଉ ଏହି ଅଧିବେଶନରେ ବହୁ ପ୍ରତିକ୍ଷିତ ଓଡିଶା ବିଧାନ ପରିଷଦ ଦାବି ପୂରଣ ପାଇଁ ଅଂଟା ଭିଡିଛନ୍ତି ରାଜ୍ୟ ସରକାର । ଏନେଇ କେନ୍ଦ୍ରର ସହମତି ସୃଷ୍ଟି କରିବା ପାଇଁ ଆଜି ସଂସଦୀୟ ଦଳ ବୈଠକରେ ଦଳୀୟ ସାଂସଦଙ୍କୁ ଗୁରୁମନ୍ତ୍ର ଦେଇଛନ୍ତି ସୁପ୍ରିମୋ ନବୀନ ପଟ୍ଟନାୟକ । ସେହିପରି ସଂସଦୀୟ ଦଳ ବୈଠକରେ ଏନପିଆରକୁ ନେଇ ଦୁଇଟି ଆପତି ଉଠାଇଛି ଦଳ ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ଦେଢ଼ ବର୍ଷ ଧରି କେନ୍ଦ୍ର କୋର୍ଟରେ ଗଡୁଥିବା ଓଡ଼ିଶା ବିଧାନ ପରିଷଦ ଦାବି, ହୁଏତ ସଂସଦର ବଜେଟ୍ ଅଧିବେଶନରେ ଏକ ନିର୍ଣ୍ଣାୟକ ମୋଡ଼ ଆଡକୁ ଗତି କରିପାରେ । ଦୀର୍ଘ ବର୍ଷ ଧରି ଯେଉଁ ବିଧାନ ପରିଷଦର ପରିକଳ୍ପନା କରିଛନ୍ତି ରାଜ୍ୟ ସରକାର, ସେ ସଂପର୍କରେ କେନ୍ଦ୍ରର ସହମତି ସୃଷ୍ଟି କରିବା ପାଇଁ ସଂସଦୀୟ ଦଳ ବୈଠକରେ ଗୁରୁମନ୍ତ୍ର ଦେଇଛନ୍ତି ଦଳୀୟ ସୁପ୍ରିମୋ ନବୀନ ପଟ୍ଟନାୟକ ।
ମୋଦି ସରକାରଙ୍କ ବିପଦ ବେଳାର ବନ୍ଧୁ ସାଜି ଅନେକ ପ୍ରସଙ୍ଗରେ ସହଯୋଗ କରିଥିବା ବିଜେଡି, ଏବେ ସ୍ୱାଭାବିକ ଭାବେ ବିଜେପିର ସହଯୋଗ ଆବଶ୍ୟକ କରିବ, ଯେତେବେଳେ ସଂସଦରେ ବିଧାନ ପରିଷଦ ବିଲ୍ ପାସ୍ କରିବା ପାଇଁ ସମର୍ଥନ ଆବଶ୍ୟକ କରୁଛି । ଏପଟେ, ଆସନ୍ତା ଏପ୍ରିଲ ମାସରେ ୪ଟି ରାଜ୍ୟସଭା ଆସନ ଖାଲି ପଡୁଥିବାରୁ ଅଶାୟୀ ନେତାଙ୍କୁ ଆଶ୍ୱାସନାର ମାଧ୍ୟମ ପାଲଟିପାରେ ବିଧାନ ପରିଷଦ ।
ସିଏଏସକୁ ସମର୍ଥନ ଏବଂ ଏନଆରସିକୁ ବିରୋଧ ଭିତରେ ଏନପିଆର୍ ପ୍ରସଙ୍ଗରେ ଏକ ବଡ଼ ଧରଣ ଚର୍ଚ୍ଚା କରିଛି ବିଜେଡି ।ସଂସଦୀୟ ଦଳ ବୈଠକରେ ଏନପିଆରକୁ ନେଇ ଦୁଇଟି ଆପତି ଉଠାଇଛି ଦଳ ।ପ୍ରଥମରେ-୧୩ ନମ୍ବର କଲମର ସବସେକ୍ସନ୍ ଦୁଇରେ ଥିବା ନାଗରିକଙ୍କ ତଥ୍ୟ ସଂଗ୍ରହ କଲା ବେଳେ ସଂପୃକ୍ତ ନାଗରିକ ତାଙ୍କ ବାପା-ମାଙ୍କ ଜନ୍ମ ସ୍ଥାନ ସଂପର୍କରେ ତଥ୍ୟ ରଖିବେ । ଯାହାକୁ ବିଜେଡି ବିରୋଧ କରିଛି । ଦ୍ୱିତୀୟରେ ଜନଗଣନା ସମୟରେ ଏସସି, ଏସସିଙ୍କ ଭଳି ଓବିସିଙ୍କ ଗଣନା ପାଇଁ ସ୍ୱତନ୍ତ୍ର କଲମ୍ ଯୋଡ଼ିବାକୁ ଦାବି କରିଛି ବିଜେଡି ।
ଏସବୁ ଭିତରେ ଓଡ଼ିଶାର ସ୍ୱାସ୍ଥ୍ୟ ସମ୍ମଳିତ ପ୍ରସଙ୍ଗ ଯେମିତି କି ରେଲୱେ, କ୍ଲିନ୍ ଏନର୍ଜି ସେସ୍, ଜିଏସଟି କ୍ଷତିପୂରଣ, ଆନ୍ତଃରାଜ୍ୟ ଜଳ ବିବାଦ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଦଳୀୟ ସାଂସଦଙ୍କ ସହ ଚର୍ଚ୍ଚା କରିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।