ପ୍ରଚାର ଯୁଦ୍ଧ ପରେ ବାକ୍ ଯୁଦ୍ଧ !ବିଜେପୁରରୁ ଭୁବନେଶ୍ୱର। ପ୍ରେସ କନଫରେନ୍ସ ବନାମ ପ୍ରେସ କନଫରେନ୍ସ
କନକ ବ୍ୟୁରୋ : ବିଜେପୁର ଉପନିର୍ବାଚନ ପାଇଁ ପ୍ରଚାରର ଶେଷ ଦିନରେ ଦେଖିବାକୁ ମିଳିଛି ଆରୋପ ପ୍ରତ୍ୟାରୋପର ଲଢେଇ । ଆଜି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ବିଜେପିର ଏକ ପ୍ରତିନିଧି ଦଳ ଜିଲ୍ଲାପାଳ, ଏସପି ଓ ନିର୍ବାଚନ କମିଶନଙ୍କ ପର୍ଯ୍ୟବେକ୍ଷକଙ୍କ ନିକଟରେ ଶାସକ ବିଜେଡି ବିରୋଧରେ ଅଭିଯୋଗ ଆଣିଛନ୍ତି । ଶାସନକଳ ଓ ବାହୁବଳ ଜରିଆରେ ବିଜେଡି ନିର୍ବାଚନ ଜିତିବାକୁ ଚେଷ୍ଟା କରୁଛି ବୋଲି ଧର୍ମେନ୍ଦ୍ର ଅଭିଯୋଗ କରିଛନ୍ତି । ଏପରିକି ବିଜେପୁର ଲଢେଇ ଆଉ ରାଜନୈତିକ ଲଢେଇ ହୋଇ ରହିନାହିଁ, ବରଂ ତୃତୀୟ ମହଲା ସହ ଲଢେଇ ଚାଲିଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ସେପଟେ ବିଜେଡି କହିଛି, ନିର୍ବାଚନ ହାରିଯିବା ଭୟରେ ବିଜେପି ଏଭଳି ଅଭିଯୋଗ ଆଣିଛି ।
Kanak News is now on WhatsApp
Join and get latest news updates delivered to you via WhatsApp
ବିଜେପୁର ଉପନିର୍ବାଚନକୁ ଆଉ ମାତ୍ର ଦେଢ ଦିନ ବାକି ଥିବା ବେଳେ ଆରମ୍ଭ ହୋଇଛି ଆରୋପ ପ୍ରତ୍ୟାରୋପର ରାଜନୀତି । ଏହିକ୍ରମରେ ମନ୍ତ୍ରୀ ସୁଶାନ୍ତ ସିଂଙ୍କ ବିରୋଧରେ ବିଜେପିର ଅଭିଯୋଗ । ଏପରିକି ନିର୍ବାଚନ ଶେଷ ହେବାଯାଏଁ ନିର୍ବାଚନ ମଣ୍ଡଳିରୁ ଦୂରରେ ରଖିବାକୁ ବିଜେପି ଦାବି କରିଛି । ସୁଶାନ୍ତ ଜଣେ ଅପରାଧୀ ପୃଷ୍ଠପୋଷକ ଥିବା ବ୍ୟକ୍ତି । ଏହାସହ ବିଜେପୁର ଅଞ୍ଚଳରେ ସେ ଆତଙ୍କରାଜ ଚଳାଇଛନ୍ତି । ତେଣୁ ତାଙ୍କୁ ବିଜେପୁର ନିର୍ବାଚନ ମଣ୍ଡଳୀରୁ ଦୂରେଇ ରଖିବା ସହ ତାଙ୍କ କାର୍ଯ୍ୟକଳାପକୁ ସିସିଟିଭିରେ ରେକର୍ଡ କରାଯାଉ ବୋଲି ବିଜେପି କହିଛି ।
ତେବେ ସୁଶାନ୍ତଙ୍କୁ ସୁରକ୍ଷା ଦେବା ପାଇଁ ଆଗେଇ ଆସିଛି ବିଜେଡି । ଯେଉଁ ବ୍ୟକ୍ତି ଡି ବ୍ରଦର୍ସଙ୍କ ଭଳି ଅପରାଧୀଙ୍କ ସହ ଲିଙ୍କରେ ରହିଛନ୍ତି ସେ ପୁଣି ଅପରାଧର ପାଠ ପଢାଉଛନ୍ତି । ବିଜେଡି ପାଲଟା ପ୍ରଶ୍ନ କରୁଛି, ଯିଏ ହିଂସା କରୁଛି ସିଏ ପୁଣି ପାଲଟା ଅଭିଯୋଗ ଆଣୁଛି ।ଯଦି ସୁଶାନ୍ତଙ୍କ ନାଁରେ କୌଣସି ଅପରାଧିକ ଅଭିଯୋଗର ପ୍ରମାଣ ରହିଛି ତେବେ ବିଜେପି ନିର୍ବାଚନ କମିଶନଙ୍କ ନିକଟରେ ଦାଖଲ କରୁ ବୋଲି ବିଜେହି କହିଛି । ବିଜେପୁର ଉପନିର୍ବାଚନ ପାଇଁ ପ୍ରଚାର ଲଢେଇ ଶେଷ ହୋଇଥିବା ବେଳେ ଏବେ ୨୪ ତାରିଖର ମତଦାନକୁ ଅପେକ୍ଷା । ଆଉ ଏତିକି ବେଳେ ବିଜେଡି ଉପରେ ଅଭିଯୋଗ ପାହାଡ ଲଦିଦେଇଛି ବିଜେପି ।
ଏତିକିରେ ସରିନଥିଲା କେନ୍ଦ୍ରମନ୍ତ୍ରୀଙ୍କ ଅଭିଯୋଗ । ତୃତୀୟ ମହଲା ଉପରେ ବି ପ୍ରଶ୍ନ ଉଠାଇଛନ୍ତି ଧର୍ମେନ୍ଦ୍ର । କହିଛନ୍ତି, ନିର୍ବାଚନ କାମରେ ସମସ୍ତଙ୍କୁ ଲଗାଇ ଦେଇଛି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ । ଏପରିକି ଖୋଦ୍ ମୁଖ୍ୟମନ୍ତ୍ରୀଙ୍କ ସଚିବ ୧୦୦ ଜଣ ଅଫିସରଙ୍କୁ ସ୍ପେଶାଲ ଛୁଟି ଦେଇ ବିଜେପୁରକୁ ପଠାଇଛନ୍ତି । ଏହି ଅଭିଯୋଗର ଉତ୍ତର ଦେଇ ବିଜେଡି କହିଛି ସଚିବାଳୟରେ କଣ ହେଉଛି ତାହା ଉପରେ କେନ୍ଦ୍ର ସରକାର ଗୁଇନ୍ଦାଗିରି କରୁଛି । ଗୋଟିଏ ପଟେ ବିଜେପି ଅଭିଯୋଗ କରୁଛି ଯେ ବିଜେଡି ନିର୍ବାଚନ ଜିତିବା ପାଇଁ ଶାସନକଳ ଓ ବାହୁବଳ ବ୍ୟବହାର କରୁଛି । ଅନ୍ୟପଟେ ବିଜେଡି କହୁଛି ନିର୍ବାଚନ ହାରିଯିବା ଜାଣି ଏଭଳି ଅଭିଯୋଗ ଆଣୁଛି ବିଜେପି । ଏସବୁ ଭିତରେ ବିଜେପୁରରେ କିଏ ବାଜି ମାରିବ ତାହା ଉପରେ ଏବେ ସମସ୍ତଙ୍କ ନଜର ।