ବୈଜୟନ୍ତଙ୍କ ଆଉ ଏକ ଟ୍ୱିଟ୍! ଲେଖିଲେ ପ୍ରତିଷ୍ଠା କରିଥିବା ଦଳକୁ ଛାଡିବାର ଇଚ୍ଛା ନାହିଁ କିନ୍ତୁ ବିଜେଡିରୁ ତଡିଦେବା ପାଇଁ ଚାଲିଛି ଶକ୍ତିଶାଳୀ ଷଡଯନ୍ତ୍ର
କନକ ବ୍ୟୁରୋ : ବିଜେଡି ସାଂସଦ ବୈଜୟନ୍ତ ପଣ୍ଡାଙ୍କ ବିରୋଧରେ ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ ତଦନ୍ତ ରିପୋର୍ଟ ଦେବା ପରେ ପୁଣି ଟ୍ୱିଟ୍ କରିଛନ୍ତି ସାଂସଦ । ଲେଖିଛନ୍ତି ଯେଉଁ ଦଳକୁ ସେ ପ୍ରତିଷ୍ଠା କରିଥିଲେ ତାକୁ ଛାଡିବା ପାଇଁ ଇଚ୍ଛା ନାହିଁ । ହେଲେ ବିଜେଡିରୁ ତଡିଦେବା ଲାଗି ଶକ୍ତିଶାଳୀ ଷଡଯନ୍ତ୍ର ଚାଲିଛି । ନିଜ ନିର୍ବାଚନ କ୍ଷେତ୍ରରେ ତୃଣମୂଳ ସ୍ତରର ନେତା ଓ କର୍ମୀଙ୍କୁ ବିଶ୍ୱାସକୁ ନନେଇ ସାଂସଦ ମନମୁଖୀ କାମ କରୁଥିବା ଅଭିଯୋଗ ଆସିବା ପରେ ଦଳର ଦୁଇ ବରିଷ୍ଠ ନେତ୍ରୀଙ୍କୁ ତଦନ୍ତ ଦାୟିତ୍ୱ ଦେଇଥିଲେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ଅନେକ ଛକାପଂଝା ଭିତରେ ମୁଖ୍ୟମନ୍ତ୍ରୀଙ୍କୁ ତଦନ୍ତ ରିପୋର୍ଟ ଦେଇଥିଲେ କେନ୍ଦ୍ରାପଡା ପର୍ଯ୍ୟବେକ୍ଷକ ଦାୟିତ୍ୱରେ ଥିବା ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ । ଗଣମାଧ୍ୟମକୁ ପ୍ରତିକ୍ରିୟାରେ କହିଥିଲେ ଯେ, ଦଳୀୟ ନେତା ଓ କର୍ମୀଙ୍କୁ ସେ ଭେଟିଥିଲେ । ଅଧିକାଂଶ ଲୋକ ସାଂସଦଙ୍କ ବିରୋଧରେ ମତାମତ ଦେଇଥିବା ସେ ରିପୋର୍ଟ ଦେଇଛନ୍ତି । ସେହିପରି ଅନ୍ୟଜଣେ ବରିଷ୍ଠ ନେତ୍ରୀ ଉଷାଦେବୀଙ୍କୁ ମଧ୍ୟ କଟକ ଜିଲ୍ଲା ନିଶ୍ଚିନ୍ତକୋଇଲି ଓ ସାଲେପୁରରୁ ଆସିଥିବା ଅଭିଯୋଗର ତଦନ୍ତ ଦାୟିତ୍ୱ ଦିଆଯାଇଥିଲା । ହେଲେ ଉଷା ଦେବୀ ଏପର୍ଯ୍ୟନ୍ତ ତଦନ୍ତ ଆରମ୍ଭ କରିଥିବା ନେଇ ସୂଚନା ନାହିଁ । ଆଶା କରାଯାଉଛି ଦୁଇଟି ଯାକ ତଦନ୍ତ ରିପୋର୍ଟ ମିଳିବା ପରେ ସାଂସଦ ବୈଜୟନ୍ତ ପଣ୍ଡାଙ୍କ ବିରୋଧରେ କିଛି କାର୍ଯ୍ୟାନୁଷ୍ଠାନ ଗ୍ରହଣ କରିପାରନ୍ତି ନବୀନ ।
ନିଶ୍ଚିନ୍ତକୋଇଲିରେ ଏକ ପାଣିଟାଙ୍କି ଉଦଘାଟନକୁ ନେଇ ସବୁ ବିବାଦର ସୂତ୍ରପାତ ହୋଇଥିଲା । ସାଂସଦଙ୍କୁ ବିରୋଧ କରିଥିଲେ ବ୍ଲକ ଅଧ୍ୟକ୍ଷଙ୍କ ସମେତ କର୍ମୀ । ମୁଖ୍ୟମନ୍ତ୍ରୀଙ୍କୁ ଭେଟି ସାଂସଦଙ୍କ ବିରୋଧରେ ଫେରାଦ ହୋଇଥିଲେ । ଏହାପରେ କେନ୍ଦ୍ରାପଡା ସଂସଦୀୟ ନିର୍ବାଚନ କ୍ଷେତ୍ରର ବିଭିନ୍ନ ବ୍ଲକରୁ କର୍ମୀମାନେ ଆସି ପ୍ରତିଦିନ ନବୀନ ନିବାସରେ ଫେରାଦ ହେଉଛନ୍ତି ।