ପ୍ରଥମେ ଦଳରୁ ନିଲମ୍ବିତ ହେଲେ ବୈଜୟନ୍ତ, ଏବେ ସାଂସଦ ପଦରୁ ଇସ୍ତଫା ମାଗୁଛି ବିଜେଡି !
କନକ ବ୍ୟୁରୋ : ଦୀର୍ଘ ଦିନର ସଂପର୍କ ପରେ ଏବେ ବିଜେଡି ଓ ସାଂସଦ ବୈଜୟନ୍ତ ପଣ୍ଡା ପରସ୍ପରର ଚିର ଶତ୍ରୁ ପାଲଟି ଯାଇଛନ୍ତି । ଦଳରୁ ନିଳମ୍ବନ କରିବା ପରେ ଏବେ ସାଂସଦ ପଦରୁ ବୈଜୟନ୍ତ ଇସ୍ତଫା ଦିଅନ୍ତୁ ବୋଲି ଦାବି କରିଛି ବିଜେଡି । ପ୍ରେସ୍ କନଫରେନସ କରି ବୈଜୟନ୍ତଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛି ବିଜେଡି । ବିଜେଡି କହିଛି, ନିୟମିତ କର୍ମଚାରୀ ଭାବେ ଇମ୍ପାରୁ କୋଟି କୋଟି ଟଙ୍କା ଦରମା ନେଇଥିଲେ ବି ନିର୍ବାଚନ ସତ୍ୟପାଠରେ ଲୁଚାଇଥିଲେ ବୈଜୟନ୍ତ । ସେପଟେ ବୈଜୟନ୍ତ ନିଲମ୍ବିତ ହେବା ପରେ ଆଜି ପ୍ରଥମ ଥର ପାଇଁ କେନ୍ଦ୍ରାପଡା ଯାଇ ସମର୍ଥକଙ୍କୁ ଭେଟିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନ ତଳେ ବିଜେଡିରୁ ସାଂସଦ ବୈଜୟନ୍ତ ପଣ୍ଡାଙ୍କୁ ଦଳରୁ ନିଲମ୍ବିତ କରିବା ପରେ ଏବେ ସାଂସଦ ପଦରୁ ଇସ୍ତଫା ଦେବାକୁ ଦାବି କରିଛି କେନ୍ଦ୍ରପଡ଼ା ବିଜେଡି । ଆଉ ଏହି ଦାବି କରିବାର କାରଣ କହିବାକୁ ଯାଇ ସାଂଘାତିକ ଅଭିଯୋଗ ଆଣିଛି ଦଳ ।
ବିଜେଡିର ଅଭିଯୋଗ ହେଉଛି:
କର୍ମଚାରୀ ଭଳି ଇମ୍ପାର ଉପସଭାପତି ଭାବେ ଦରମା ନେଇଛନ୍ତି ବୈଜୟନ୍ତ।ବାର୍ଷିକ ଦରମା ଓ ଭତ୍ତା ବାବଦରେ ୨ କୋଟି ୭୯ ଲକ୍ଷ, ୧କୋଟି ୪୫ ଲକ୍ଷ, ୧ କୋଟି ୬୧ ଲକ୍ଷ ଏବଂ ୭ କୋଟି ୬୬ ଲକ୍ଷ ଟଙ୍କା ନେଇଛନ୍ତି । ନିର୍ବାଚନ ପାଇଁ ଦେଇଥିବା ସତ୍ୟପାଠରେ ଏହି ତଥ୍ୟ ନଦେଇ ଗୋପନ ରଖିଛନ୍ତି ବୈଜୟନ୍ତ । ବୈଜୟନ୍ତ ଇମ୍ଫା କମ୍ପାନିର ଉପସଭାପତି ପଦରେ ରହି କୋଟି କୋଟି ଟଙ୍କା ଦରମା ଆକାରରେ ନେଇଛନ୍ତି । ଏହି ସବୁ ତଥ୍ୟ ଦଳ ତଥା ଦଳ ମୁଖିଆଙ୍କୁ ବୈଜୟନ୍ତ ଲୁଚାଇ ରଖିଛନ୍ତି । ଏହି ସବୁ ଗୋପନୀୟ ତଥ୍ୟ ନିର୍ବାଚନ ସତ୍ୟପାଠରେ ଦର୍ଶାଇ ନାହାନ୍ତି ବୈଜୟନ୍ତ । ଏଭଳି କରି ବୈଜୟନ୍ତ କେନ୍ଦ୍ରପଡାବାସୀଙ୍କୁ ଠକିଛନ୍ତି । ତେଣୁ ନୈତିକତା ଦୃଷ୍ଟିରୁ କେନ୍ଦ୍ରାପଡା ସାଂସଦ ପଦରୁ ବୈଜୟନ୍ତ ତୁରନ୍ତ ଓହରିଯିବା ସହ ଇସ୍ତଫା ଦିଅନ୍ତୁ ବୋଲି ବିଜେଡି ଦାବି କରିଛି । ତେବେ ଏଭଳି କରି ବୈଜୟନ୍ତଙ୍କ ପକ୍ଷଛେଦନ କରିବା ପାଇଁ ବିଜେଡି ପକ୍ଷରୁ ଆରମ୍ଭ ହୋଇଛି ଉଦ୍ୟମ ।
ତେବେ ଏହି ଅଭିଯୋଗକୁ ବୈଜୟନ୍ତଙ୍କ ଅଫିସ ପକ୍ଷରୁ ଖଣ୍ଡନ କରାଯାଇଛି । ପୁଣି ଥରେ ତୃତୀୟ ମହଲାକୁ ଟାର୍ଗେଟ କରିଛି ବୈଜୟନ୍ତଙ୍କ ଅଫିସ । ଲୋକଙ୍କୁ ବିଭ୍ରାନ୍ତ କରିବାକୁ ତୃତୀୟ ମହଲା ଷଡଯନ୍ତ୍ର ରଚିଥିବା କୁହିଛନ୍ତି ତାଙ୍କ ରାଜନୈତିକ ସଚିବ । ସେପଟେ ନିଲମ୍ବନ ପରେ ଆଜି ପ୍ରଥମ ଥର ପାଇଁ କେନ୍ଦ୍ରାପଡ଼ା ଯାଇ ନିଜ ସମର୍ଥନଙ୍କ ସହ ଆଲୋଚନା କରିଛନ୍ତି । ସମର୍ଥନଙ୍କ ସହ ଏକ ରାଲିରେ ବଳଦେବ ଜୀଉ ମନ୍ଦିର ଦର୍ଶନ କରିଛନ୍ତି ବୈଜୟନ୍ତ ।ଦୀର୍ଘ ୨୦ ବର୍ଷର ନିବିଡ଼ ସଂପର୍କ ପରେ ଏବେ ବୈଜୟନ୍ତ୍ ଓ ବିଜେଡି ପରସ୍ପରର ଶତ୍ରୁ ପାଲଟି ଯାଇଛନ୍ତି । ଏବଂ ନିର୍ବାଚନ ସତ୍ୟପାଠରେ ସତ୍ୟ ଲୁଚାଇବାର ଅଭିଯୋଗ ଆଣି ବୈଜୟନ୍ତଙ୍କୁ ହରଡଘଣାରେ ପକାଇଦେଇଛି ବିଜେଡି । ଏହି ନିର୍ଦ୍ଦିଷ୍ଟ ଅଭିଯୋଗର ବୈଜୟନ୍ତ କଣ ଜବାବ ରଖୁଛନ୍ତି, ତାହା ଉପରେ ସମସ୍ତଙ୍କ ନଜର ।