ସାବଧାନ ଗାଡିଚାଳକ ! ଗାଡିରେ ଫ୍ୟାନ୍ସି ନମ୍ବର ପ୍ଲେଟ୍, ଉଚ୍ଚ ସ୍ୱର ଯୁକ୍ତ ହର୍ଣ୍ଣ ଲାଗିଥିଲେ ଦେବାକୁ ହେବ ମୋଟା ଅଙ୍କର ଜୋରିମାନା ।
ସାବଧାନ ଗାଡିଚାଳକ ! ଆପଣଙ୍କ ଗାଡିରେ ଲଗାଇଛନ୍ତି କି ଫ୍ୟାନ୍ସି ନମ୍ବର ପ୍ଲେଟ୍ କିମ୍ବା ଉଚ୍ଚ ସ୍ୱର ବା କର୍କଶ ଯୁକ୍ତ ହର୍ଣ୍ଣ । ତେବେ ତୁରନ୍ତ ଏହାକୁ କାଢି ନିଅନ୍ତୁ । ନହେଲେ ଦେବାକୁ ପଡିବ ମୋଟା ଅଙ୍କର ଜୋରିମାନା । ଟ୍ୱିନ୍ ସିଟି ଭୁବନେଶ୍ୱର ଓ କଟକରେ ଦିନକୁ ଦିନ ବାଇକ ଚୋରି କିମ୍ବା ବାଇକରେ ଅପରାଧ ହେଉଥିବା ଭଳି ଘଟଣା ଦିନକୁ ଦିନ ବଢି ବଢି ଚାଲିଥିବା ବେଳେ, ଏହାକୁ ରୋକିବା ପାଇଁ କଡା ପଦକ୍ଷେପ ନେଇଛି କମିଶନରେଟ୍ ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଓଭର ସ୍ପିଡ୍ ଠାରୁ ଆରମ୍ଭ କରି ହେଲମେଟ୍ ଏବଂ କର୍କଶ ଶବ୍ଦ କରୁଥିବା ସାଇଲେନ୍ସର ଲଗାଇଥିବା ଗାଡିଚାଳକଙ୍କୁ ଗୋଡାଇ ଗୋଡାଇ ଧରୁଛି ପୋଲିସ । ଆଜି କଟକର ବିଭିନ୍ନ ଛକରେ କମିଶନରେଟ୍ ପୋଲିସ ପକ୍ଷରୁ କଡା ଚେକିଂ କରାଯାଇଥିଲା । ଯେଉଁଥିରେ ଅନେକ ଗାଡିଚାଳକ ଧରାପଡିବା ସହ ଜୋରିମାନା ମଧ୍ୟ ଦେଇଥିଲେ ।
ଆଉ ସବୁଠାରୁ ବଡ କଥା ହେଉଛି, ଯେଉଁ ଗାଡି ଗୁଡିକରେ ଫ୍ୟାନ୍ସି ନମ୍ବର ପ୍ଲେଟ ଓ ଉଚ୍ଚ ସ୍ୱର ଯୁକ୍ତ ହର୍ଣ୍ଣ ବା କର୍କଶ ଶବ୍ଦ କରୁଥିବା ହର୍ଣ୍ଣ ଲାଗିଥିଲା, ସେଗୁଡିକୁ ପୋଲିସ ନିଜେ ରେଞ୍ଚି ସାହାଯ୍ୟରେ ଓପାଡି ଦେବା ସହ ସେଗୁଡିକୁ ଜବତ କରିଛି । ଏହା ସହ ଉକ୍ତ ଗାଡି ଚାଳକଙ୍କ ଠାରୁ ମଧ୍ୟ ପୋଲିସ ମୋଟା ଅଙ୍କର ଜୋରିମାନା ଆଦାୟ କରିଛି । ତେବେ ଆଗାମୀ ଦିନରେ ଚେକିଂକୁ ଜୋରଦାର କରାଯିବ ବୋଲି ଜଣାପଡିଛି । ଆଜି କଟକରେ ଏହି ଅଭିଯାନ ଆରମ୍ଭ ହୋଇଥିବା ବେଳେ ଆଗକୁ ରାଜଧାନୀ ଭୁବନେଶ୍ୱରରେ ମଧ୍ୟ ଜୋରଦାର ଚେକିଂ ହେବ ବୋଲି ସୂଚନା ମିଳିଛି ।