ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ମୋଦିଙ୍କ ରାସ୍ତାରେ ନବୀନ । ପ୍ରଧାନମନ୍ତ୍ରୀଙ୍କ ‘ମନ୍ କି ବାତ୍’ ପରି ଆରମ୍ଭହେବ ମୁଖ୍ୟମନ୍ତ୍ରୀଙ୍କ ‘ବିଜୁ ଗାଁ ରେଡିଓ’ କାର୍ଯ୍ୟକ୍ରମ । ରାଜ୍ୟ ସରକାର ଖୁବ୍ ଶୀଘ୍ର ଆରମ୍ଭ କରିବାକୁ ଯାଉଛନ୍ତି ଏହି ରେଡିଓ ପ୍ରସାରଣ । ଏହା ମାଧ୍ୟମରେ କୃଷକ ମାନଂକୁ ଜରୁରୀ ତଥ୍ୟ ପ୍ରଦାନ କରାଯିବ । ଏହି କାର୍ଯ୍ୟକ୍ରମ ଦ୍ୱାରା ଗ୍ରାମାଂଚଳର ଲୋକଙ୍କୁ ମୁଖ୍ୟତଃ କୃଷି, ସମବାୟ, ଜଳସେଚନ, ସ୍ୱାସ୍ଥ୍ୟ, ଶିକ୍ଷା, ବିପର୍ଯ୍ୟୟ ପରିଚାଳନା ଓ ସଂସ୍କୃତି ସମ୍ପର୍କରେ ଆବଶ୍ୟକ ସୂଚନା ଓ ତଥ୍ୟ ପ୍ରଦାନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସଚିବାଳୟରେ ଓୟୁଏଟି କୁଳପତି ସୁରେନ୍ଦ୍ରନାଥ ପଶୁପାଳକ କମ୍ୟୁନିଟି ରେଡିଓ କାର୍ଯ୍ୟକ୍ରମ ସମ୍ପର୍କରେ ଉପସ୍ଥାପନା ଦେବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାକୁ କାର୍ଯ୍ୟକାରୀ କରିବାକୁ ନିର୍ଦେଶ ଦେଇଛନ୍ତି । ଏହି କାର୍ଯ୍ୟକ୍ରମ ପ୍ରତିଦିନ ୬ଟାରୁ ୭ଟା ପର୍ଯ୍ୟନ୍ତ ପ୍ରସାରିତ ହେବ । ଏବଂ ୮ଟାରୁ ୯ଟା ପର୍ଯ୍ୟନ୍ତ ପୁନଃ ପ୍ରସାରଣ ହେବା ପାଇଁ ପ୍ରସ୍ତାବ ରହିଛି । ସବୁଠାରୁ ବଡ କଥା ହେଉଛି ମାସକୁ ଥରେ ଦଶ ମିନିଟ ପାଇଁ ମୁଖ୍ୟମନ୍ତ୍ରୀଙ୍କ ବାର୍ତା ପ୍ରସାରଣ କରାଯିବ । ଲୋକଙ୍କଠାରୁ ମତାମତ ସଂଗ୍ରହ କରାଯାଇ ସେମାନଙ୍କ ସମସ୍ୟାର ସମାଧାନ ପାଇଁ ସୂଚନା ଦିଆଯିବ ବୋଲି ଜଣାପଡିଛି ।